ރާއްޖެޓީވީގެ އަބުރު ފަންޑުފޮށި ލަންކާއަށް!
ލަންކާގައި ތިބި ގިނަ އަދަދެއްގެ ދިވެހިން ރާއްޖެޓީވީގެ ފަންޑަށް އެހީތެރިކަން ފޯރުކޮށްދިނުމަށް ދަނީ އެދެމުން
ރާއްޖެޓީވީއަށް އެހީވުމަށް ރާއްޖޭގެ އެކި ސަރަހައްދުތަކުގައި ދަނީ ފަންޑުފޮށި ބަހައްޓަމުން
ރައީސް އަބްދުﷲ ޔާމީންގެ އަބުރާ ބެހުނު ކޮންޓެންޓެއް ބްރޯޑްކާސްޓް ކުރި ކަމަށް ބުނެ ބްރޯޑްކާސްޓިންގ ކޮމިޝަނުން އަމިއްލައަށް އިސްނަގައިގެން ބެލި މައްސަލައެއްގައި އެއް މިލިއަން ރުފިޔާއިން ރާއްޖެޓީ ޖޫރިމަނާ ކުރުމާ ގުޅިގެން އެ ފައިސާ ދެއްކުމަށް ރައްޔިތުންނަށް ފުރުސަތު ދިނުމުގެ ގޮތުން ރާއްޖެ ޓީވީން ހުޅުވި "އަބުރުފުޅު ފަންޑު" ފޮށި ލަންކާގައި ވެސް ބަހައްޓަން ނިންމައިފިއެވެ.
ރާއްޖެޓީވީގެ ބިޒްނަސް ޑިވެލޮޕްމެންޓް މެނޭޖަރު ސިމާނާ އިސްމާއިލްފުޅު ވިދާޅުވީ، ފަންޑު ފޮއްޓެއް ލަންކާގައި ބެހެއްޓުމަށް ނިންމީ ލަންކާގައި ތިބި ގިނަ އަދަދެއްގެ ދިވެހިން ރާއްޖެޓީވީގެ މި ފަންޑަށް އެހީތެރިކަން ފޯރުކޮށްދިނުމަށް ބޭނުންވެގެން އެދެމުންދާތީ ކަމަށެވެ.
ސިމާނާ ވިދާޅުވީ، އެއްމިލިއަން ރުފިޔާއަކީ ބޮޑު އަދަދެއް ކަމަށާއި، އެދަދު ހަމަކުރުމަށް ރާއްޖެޓީވީގެ ފަރާތުން ގިނަ މަސައްކަތްތަކެއް ކުރަން ޖެހޭ ކަމަށެވެ. އެހެންކަމުން ކޮންމެ ބޭފުޅަކު ވެސް އެބޭފުޅަކަށް ވެވުނު މިންވަރަކުން އެހީތެރިކަން ފޯރުކޮށްދިނުމަކީ ވަރަށް އެދޭ ކަމެއް ކަމަށް ސިމާނާ ވިދާޅުވިއެވެ. ސިމާނާ ވިދާޅުވީ، ކުރީގެ ޖޫރިމަނާ ދެއްކުމަށް ވެސް ގިނަ ދިވެހި ރައްޔިތުންގެ އެއްބާރުލުން ލިބުނު ކަމަށާއި އެ ފަރާތްތަކަށް ވަރަށް ބޮޑަށް ޝުކުރު އަދާކުރާ ކަމަށެވެ. އަދި މިފަހަރުވެސް އެފަދަ ބޮޑު ތަރުހީބެއް ލިބޭނެކަމަށް ރާއްޖެޓީވީން އުއްމީދުކުރާ ކަމަށް ސިމާނާ ވިދާޅުވިއެވެ.
ލަންކާގައި ބަހައްޓާ ފަންޑު ފޮށި ހުންނާނީ ނާވަލް ރޯޑް ފޯތްލޭން (4TH) 69/10) ގައި ކަމަށް ރާއްޖެޓީވީން ބުންޏެވެ.
ލަންކާގައި އަބުރު ފަންޑްފޮށި ހުންނަ ލޮކޭޝަން ޓްވިޓާ ފޭސް ބުކް އަދި ސޯޝަލް މީޑިއާގެ ވަސީލަތްތަކުގެ އެހީގައި އެނގިގެންދާނެ ކަމަށް ބިޒްސްނަސް ޑިވެލޮޕްމެންޓް މެނޭޖަރު ސިމާނާ ވިދާޅުވިއެވެ.
އަބުރުފުޅު ފަންޑް ހުޅުވުމުގެ އިތުރުން ރާއްޖެޓީވީން ވަނީ މޯލްޑިވްސް ބްރޯޑްކާސްޓިން ކޮމިޝަނުން ބޭއިންސާފުން ކަންކަން ކުރިއަށް ގެންދާ ކަމަށް ގަބޫލުކުރާތީ އެ ކޮމިޝަންގެ މެންބަރުންގެ އިތުބާރު ނެތްކަމަށް ގޮވާލާ ޕެޓިޝަނެއްގައި ވެސް ސޮއިކުރަން ފަށާފައެވެ. މި ޕެޓިޝަނުގައި ގިނަ ބަޔަކު ސޮއިކުރަމުން އަންނަ އިރު ރާއްޖެ ޓީވީގެ ހުރިހާ މުވައްޒަފުން ވެސް މިހާރު ވަނީ މި ޕެޓިޝަނުގައި ސޮއިކޮށްފައެވެ.
