އިނގިރޭސި ވިލާތުން ސިޔާސީ ހިމާޔަތް ހޯއްދަވައިގެން ހުންނެވި ކުރީގެ ރައީސް މުހައްމަދު ނަޝީދު ލަންކާއަށް ވަޑައިގަންނަވައިފިއެވެ.
އެމަނިކުފާނު ލަންކާއަށް ވަޑައިގެންފައި ވަނީ އާދިއްތަ ދުވަހު ހެނދުނު އެވެ.
މިދަތުރުފުޅާ ގުޅޭ ގޮތުން އެމްޑީޕީން ރަސްމީކޮށް އެއްވެސް އެއްޗެއް ހާމަކޮށްފައެއް ނެތެވެ.
އެމްޑީޕީގެ އިސް އޮފިޝަލަކު ވިދާޅުވި ގޮތުގައި، ރައީސް ނަޝީދު ކޮލަމްބޯއަށް ވަޑައިގަންނަވަނީ ރާއްޖޭގެ މަޝްރަހާބެހޭ ގޮތުންނާއި އެމްޑީޕީގެ ކަންކަމާ ގުޅޭ ގޮތުން، ޕާޓީގެ ގައުމީ މަޖިލީހުގެ މެމްބަރުންނާއި އެޑްވައިޒަރީ ކޮމިޓީއާ ބައްދަލު ކުރެއްވުމަށެވެ.
ނަމަވެސް މި ބައްދަލުވުމުގެ ރަސްމީ އެޖެންޑާގައި ހިމެނިފައިވާ ކަންކަމެއް އަދި އެނގިވަޑައިނުގަންނަވާ ކަމަށް ވެސް، ރާއްޖެއެމްވީއާ ވާހަކަ ދެއްކެވި އެމްޑީޕީގެ އޮފިޝަލް ވިދާޅުވި އެވެ.
ރައީސް ނަޝީދު ލަންކާއަށް ވަޑައިގަންނަވާތީ، އެމްޑީޕީގެ ގިނަ މެމްބަރުންތަކެއް ވަނީ ލަންކާއަށް ގޮސްފަ އެވެ.
އެމްޑީޕީގެ އިސް ބޭފުޅުންނާ ބައްދަލުކުރެއްވުމުގެ އިތުރަށް، ރައީސް ނަޝީދު އެމްޑީޕީގެ އާންމު މެމްބަރުނާއި ސަޕޯޓަރުންނާ ވެސް ބައްދަލުކުރައްވާނެ ކަމަށާއި އެ ބައްދަލުކުރެއްވުން އޮންނާނީ ފެބްރުއަރީ 2 ގައި ކަމަށް ވެސް މައުލޫމާތު ވަނީ ލިބިފަ އެވެ.
މި ސަރުކާރުން ޓެރަރިޒަމްގެ ދައުވާކޮށް 13 އަހަރަށް ޖަލަށް ހުކުމްކޮށްފައިވާ ރައީސް ނަޝީދު އިނގިރޭސި ވިލާތަށް ވަޑައިގެންނެވިތާ މިހާރު ވަނީ އަހަރެއް ފުރިފަ އެވެ. އިނގިރޭސި ވިލާތުގައި ހުންނެވުމަށް ފަހު މީގެ ކުރިން ވެސް އެ މަނިކުފާނު ވަނީ ލަންކާއަށް ވަޑައިގެންފަ އެވެ.
ޖަލު ހުކުމެއްގައި ހުންނެވި ނަމަވެސް، އެނބުރި ރާއްޖެ ވަޑައިގަންނަވާނެ ކަމަށް ރައީސް ނަޝީދު ވަނީ ވިދާޅުވެފަ އެވެ.
ރައީސް ނަޝީދު ލަންކާ އަށް ވަޑައިގަންނަވާ ވާހަކަ އާއި ދިވެހިންނާ ބައްދަލުކުރައްވާ ވާހަކަ އެމްޑީޕީން ދޮގުކުރެއެވެ. އެ ޕާޓީގެ ޗެއާޕާޗަންގެ ނައިމު އަލީ ނިޔާޒް ވިދާޅުވީ ރައީސް ނަޝީދު ލަންކާ އަށް ވަޑައިގަންނަވާ ނަމަ އެކަން ރައީސް ނަޝީދުގެ އޮފީހުން ހާމަކުރާނެ ކަމަށެވެ.
