ފޮރިން މިނިސްޓަރ އަބްދުﷲ ޝާހިދު ކަރަންޓީނުގައި ހުންނަވާ އިވެންޓެއްގައި ބައިވެރިވެ ވަޑައިގަންފައިވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ އުސޫލުގެ ތެރެއިން ލިބިދޭ ހުއްދައެއްގެ ދަށުން ކަމަށް ހެލްތު އިމަރޖެންސީ އޮޕަރޭޝަން ސެންޓަރ(އެޗްއީއޯސީ) އިން ބުނެފިއެވެ.

ބޭރަށް ކުރެއްވި ދަތުރަކަށް ފަހު، މިދިޔަ ހުކުރު ދުވަހު އެނބުރި ވަޑައިގެން ކަރަންޓީނުގެ މުއްދަތު ފުރިހަމަކުރައްވަމުން ގެންދަވާ ފޮރިން މިނިސްޓަރު އަބްދުﷲ ޝާހިދު ވަނީ އިންޑިއާއިން ރާއްޖެއަށް 250 މިލިއަން އެމެރިކާ ޑޮލަރު ދިނުމަށް ބޭއްވި ރަސްމިއްޔާތުގައި ބައިވެރިވެވަޑައިގެންފައެވެ. އެކަމާއި ގުޅިގެން އިދިކޮޅު ޕީޕީއެމް/ޕީއެންސީ ހިމެނޭ ގޮތަށް ބައެއް އާންމުންގެ ފާޑުކިޔުންތައް ވަނީ އެޗްޕީއޭއަށާއި ސަރުކާރަށް އަމާޒުވެފައެވެ.

އެޗްއީއޯސީން ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރ ޝާހިދު ކަރަންޓީނުގައި ހުންނަވާ އިވެންޓްތަކުގައި ބައިވެރިވެ ވަޑައިގެންނަވާފައިވަނީ ކޮން އުސޫލަކުންތޯ އާއި އެއީ ވަކި މީހަކަށް ލިބޭ ވަކި ޚާއްސަ ހުއްދައެއްތޯ ނޫސްވެރިން ވަނީ ސުވާލުކޮށްފައެވެ. އެ ސުވާލަށް ޖަވާބު ދެއްވަމުން އެ ސެންޓަރުގެ ތަރުޖަމާން ޑރ. ނަޒްލާ ރަފީގް ވިދާޅުވީ އާންމު ފަރާތްތަކަށް ވެސް ބައެއް ކަންކަމުގައި ކަރަންޓީނުގައި ހުންނައިރު ވަކި އުސޫލުތަކެއްގެ މަތިން ވަކި ކަމަކަށް ނިކުންނަންޖެހޭތީ އެޗްޕީއޭއީން މީގެކުރިން ވެސް ހުއްދަ ދީފައިވާނެ ކަމަށެވެ. އެކަމަށް އެޗްޕީއޭއިން ވަކި ޚާއްސަ އުސޫލުތަކެއް އެކުލަވާލާފައިވާ ކަމަށާއި ޝާހިދަށް ހުއްދަ ދެވުނީ ދައުލަތުގެ ފަރާތުން ކޮންމެހެން އަދާކުރަން ޖެހޭ ޒިންމާ އެއް އަދާކުރުމަށް ކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ އާންމު ފަރާތްތަކުންވެސް ކުއްލިއަކަށް ހެލްތު އިމަރޖެންސީ އެއް ދިމާވެގެން ނުވަތަ އާއިލާގެ މީހަކަށް ކަމެއް ދިމާވެގެން ޖަނާޒާއަކަށް ދާންޖެހިގެންވެސް އެކަމަށް އެދުމުން ހުއްދަ ދީފައި ހުންނާނެ ކަމަށެވެ.

ޝާހިދު ކަރަންޓީނުގައި ހުންނަވާ އިވެންޓްގައި ބައިވެރިވެވަޑައިގަތުމާއި ގުޅިގެން ފާޑުކިޔުންތައް އަމާޒުވުމުން ފޮރިން މިނިސްޓްރީން ބުނެފައިވަނީ އިންޑިއާއިން ރާއްޖެއަށް 250 މިލިއަން އެމެރިކާ ޑޮލަރު ދިނުމަށް ބޭއްވި ރަސްމިއްޔާތުގައި ޝާހިދު ބައިވެރިވެވަޑައިގަތީ އެޗްޕީއޭގެ ޚާއްސަ ހުއްދައެއް ހޯއްދަވައިގެންކަމަށެވެ.

އޭގެ އިތުރުން، މި ހަފްތާއާއި އަންނަ ހަފްތާގައިވެސް މުހިއްމު ބައެއް ބައްދަލުވުންތައް އޮތުމުން، އެ ބައްދަލުވުންތަކުގައި ބައިވެރިވެވަޑައިގަތުމަށް އެޗްޕީއޭއިން ހުއްދަ ދީފައިވާ ކަމަށް މިނިސްޓްރީން ބުނެފައި ވެއެވެ. މި ބައްދަލުވުންތަކުގައި މިނިސްޓަރ ބައިވެރިވެވަޑައިގަންނަވަނީ އެޗްޕީއޭ ގެ ގައިޑްލައިންތަކާ އެއްގޮތަށް ކަމަށް ވެސް މިނިސްޓްރީން މައުލޫމާތު ދެއެވެ.