އަބަދުވެސް ހިތް އޮންނާނީ ޗެލްސީގައި: ޓެރީ

މި ސީޒަނަށް ފަހު ޗެލްސީއަށް ކުޅުން ހުއްޓާލާނެކަން އިއުލާންކޮށްފައިވާ އެ ޓީމުގެ ކެޕްޓަން ޖޯން ޓެރީ އެކުލަބާއި ވަކިވިޔަސް ހިތް އަބަދުވެސް އޮންނާނީ ޗެލްސީއާ އެކު ކަމަށް އޭނާ ބުނެފިއެވެ.

ޗެލްސީގެ ސީނިއާ ޓީމާއި 1998 ވަނަ އަހަރު ގުޅުނު ޓެރީ 19 އަހަރަށް ފަހު އެކުލަބު ދޫކޮށްލާނެކަން ހާމަކޮށްފައި ވަނީ ހޯމަދުވަހުގެ ރޭ ނެރުނު ބަޔާނެއްގައެވެ. އެކަން ޗެލްސީން ވެސް ވަނީ ކަށަވަރުކޮށްދީފައެވެ.

ޗެލްސީއަށް ކުޅުން ހުއްޓާލާކަން އިއުލާންކުރަމުން ޓެރީ ބުނެފައި ވަނީ މި ސީޒަން ތަށްޓަކާ އެކު ނިންމާލަން ކެތްމަދުވެފައިވާ ކަމަށެވެ.

ޓެރީ ބުނެފައި ވަނީ ޗެލްސީއަކީ ދިރިއުޅުމާ ގުޅިލާމެހިފައިވާ ކުލަބެއް ކަމަށެވެ. އަދި އެކަމުގެ ސަބަބުން ކުލަބަށް ދެވެން ހުރި ފުރިހަމަ އެއްބާރުލުން އަބަދު ވެސް ދޭނެ ކަމަށް އޭނާ ބުންޏެވެ.

ޗެލްސީގެ ޖޫނިއަރ ޓީމުންފެށިގެން އެކުލަބާއިއެކު ޓެރީ ވަނީ ޖުމްލަ 22 އަހަރު ހޭދަކޮށްފައެވެ. ނޮޓިންގހަމް ފޮރެސްޓަށް ލޯން އެއްބަސްވުމެއްގެ ދަށުން 2000 ވަނަ އަހަރު ދާންޖެހުނު ނަމަވެސް އެނޫން އެހެން ކުލަބަކަށް އޭނާ ކުޅެފައެއް ނުވެއެވެ.

ޗެލްސީގައި ހުނަރުން ފުރިފައިވާ ޒުވާން މޮޅެތި ކުޅުންތެރިން ތިބުމުން އެކުޅުންތެރިންނަށް ފުރުސަތު ދޭންޖެހޭ ކަމަށް ޓެރީ ބުންޏެވެ.

ޗެލްސީއަށް 2000 ވަނަ އަހަރު ފުރަތަމަ ލަނޑު ކާމިޔާބުކޮށްދިން ޓެރީވަނީ މިހާތަނަށް ޖުމްލަ 66 ލަނޑު ޖަހައިދީފައެވެ. އަދި ޗެލްސީ އާއި ޕްރިމިއާ ލީގުގެ ތާރީހުގައި އެންމެ ގިނަ ލަނޑު ޖެހި ޑިފެންޑަރަކީ ވެސް ޓެރީއެވެ.

ޗެލްސީއަށް ޓެރީ ކުޅުނު ޖުމްލަ 713 މެޗުގެ ތެރެއިން 578 މެޗު ކުޅެފައި ވަނީ ކެޕްޓަން ބޭންޑް އަޅައިގެންނެވެ.

ޓެރީ ބުނީ ޗެލްސީއަށް ކުޅުން ހުއްޓާލި ނަމަވެސް، އެހެން ކުލަބަކުން ފެނިދާނެ ކަމާ މެދު އެއްޗެއް ބުނަން އަވަސް ކަމަށެވެ.