ރައީސް ޔާމީން ސަރުކާރުގައި މުއައްސަސާތަކުގެ ވެރިން ތިބީ ކަނުބަނދެފަ: އިލްހާމް
19 ސެޕްޓެމްބަރު 2020 | ހޮނިހިރު 04:05އެވެރިން މިހާރު ރިޕޯޓުތައް ނެރުމުގައި ވަރަށް ފަރިތަ
ޖުމްހޫރީ ޕާޓީގެ އެޑްވައިޒަރު އަދި ދަނގެތީ ދާއިރާގެ ކުރީގެ މެންބަރު އިލްހާމް އަހުމަދު
ކުރީގެ ރައީސް އަބްދުﷲ ޔާމީންގެ ސަރުކާރުގައި މުއައްސަސާތަކުގެ ވެރިން ތިބީ ކަނުބަނދެފައި ކަމަށާއި އެވެރިން މިހާރު ރިޕޯޓުތައް ނެރުމުގައި ވަރަށް ފަރިތަ ކަމަށް ޖުމްހޫރީ ޕާޓީގެ އެޑްވައިޒަރު އިލްހާމް އަހުމަދު ވިދާޅުވެއްޖެއެވެ.
ރައީސް އިބްރާހިމް މުހައްމަދު ޞާލިހުގެ ވެރިކަމުގައި އެކި މުއައްސަސާތަކުން ކުރަމުންދާ ކަންކަން ހާމަކަން ބޮޑު ގޮތެއްގައި ބަލައި އޮޑިޓްތައް ހަދަމުންދާއިރު، އެކަމުގައި ސަރުކާރުން ދަނީ މުއައްސަސާ ތަކަށާއި އޮޑިޓަރ ޖެނެރަލްއަށް އެއްބާރުލުން ދެއްވަމުންނެވެ. ވަކިން ހާއްސަ ގޮތެއްގައި ކޮވިޑް-19 އާއި ގުޅިގެން ކުރަމުންދާ ހަރަދުތަކުގެ އޮޑިޓް ރިޕޯޓުތައް ހަދައި އާންމު ކުރުން ވަނީ އިތުރުވެފައެވެ.
މިކަމަށް އިޝާރާތް ކުރައްވާ އިލްހާމު ކުރެއްވި ޓްވީޓެއްގައި ވިދާޅުވެފައިވަނީ މީގެ ދުވަސްތަކެއް ކުރިން މުއައްސަސާތަކުގައި ތިއްބެވީ ވެސް މިހާރު އެ މުއައްސަސާތަކުގައި ތިއްބެވި ވެރިން ކަމަށެވެ. އަދި އޭރު ގައުމުގައި ހިނގާދިޔަ ކަންކަން ހާމަކޮށް، ސުރުހީ އަޅާލަން ކެރުނު މުއައްސަސާއެއް ނެތްއިރު، މިއަދު އެންމެ އެކްޓިވްކޮށް މަސައްކަތް ކުރަނީ އެ މުއައްސަސާތަކުން ކަމަށް އިލްހާމު ވިދާޅުވިއެވެ.
އިލްހާމު ވިދާޅުވީ މުއައްސަސާތަކުގެ ތެރެއިން ފަރިތަކަމާއެކު ރިޕޯޓްތައް ނެރެމުންދާ ގިނަ މުއައްސަސާތަކުގައި މިހާރުވެސް ތިއްބެވީ މީގެކުރިން އެ މުއައްސަސާތައް ހިންގެވުމުގައި ވެރިންގެ ގޮތުގައި ތިއްބެވި ބޭފުޅުން ކަމަށެވެ.
އިލްހާމު ވިދާޅުވީ އޭރާއި މިހާރުގެ ތަފާތަކީ މުއައްސަސާތަކުގެ ވެރިންގެ ގޮތުގައި ތިއްބަވައިގެން ރިޕޯޓުތައް ނެރެން އެބޭފުޅުން ވަރަށް ފަރިތަ ކަމަށާއި އަދި ހިމަނަން ޖެހޭ މައުލޫމާތު ވެސް ނުހިމަނައި ރިޕޯޓުތައް ނެރުމަށް އެބޭފުޅުން ވަރަށް ކެރޭކަން ދައްކަން އުޅުއްވާ ކަމަށެވެ.
ކުރީގެ ރައީސް ޔާމީންގެ ސަރުކާރުގައި ގާނޫނާއި ހިލާފު ގިނަ ކަންތައްތަކެއް ފާޅުކަން ބޮޑު ގޮތެއްގައި ހިނގަމުން ދިޔައިރު، އެކަންކަން ބަލާ ފިޔަވަޅު އަޅަން ކެރުނު މުއައްސަސާއެއް ނެތެވެ. އަދި އެސަރުކާރުން ކުރަމުންދިޔަ ކަންކަމުގައި ބަސް ބުނެ ރިޕޯޓެއް އާންމު ކުރަން ނުކެރުނުއިރު، އެ މުއައްސަސާތަކުގެ ވެރިން ތިއްބެވީ ވަޒީފާގެ ބިރަށް ކަނުބަނދެ ތަޅު އެޅުވިފައެވެ.
މިސަރުކާރު ވެރިކަމަށް އައުމުގެ ކުރިން ރިޔާސީ އިންތިހާބުގެ ތެރޭގައި ރައީސް އިބްރާޙިމް މުހައްމަދު ޞާލިހު ވަނީ މުއައްސަސާތަކުގެ އޮޑިޓް ހާމަކަން ބޮޑު ގޮތެއްގައި ކުރިއަށް ގެންދަވާނެ ކަމަށާއި އެކަމުގައި އޮޑިޓަރ ޖެނެރަލަށް އެއްވެސް ސިޔާސީ ނުފޫޒެއް ނޯންނާނެ ކަމަށް ވިދާޅުވެފައެވެ. އަދި އޮޑިޓް ރިޕޯޓުތަކުން ފާހަގަވާ ކަންކަމުގައި ފިޔަވަޅު އަޅަން ޖެހޭ ފަރާތްތަކަށް ފިޔަވަޅު އެޅުމުގައި ފަހަތަަށް ޖެހި ވަޑައިނުގަންނަވާނެ ކަމަށް ވެސް ރައީސް ޞާލިހު ވަނީ ވިދާޅުވެފައެވެ.
