އާސެނަލަށް ކުޅެމުން އައި އާޖެންޓީނާގެ ގޯލްކީޕަރު އެމިލިއާނޯ މާޓިނޭޒް އެސްޓަން ވިލާއަށް ބަދަލުވެއްޖެއެވެ.

އުމުރުން 28 އަހަރުގެ ގޯލްކީޕަރު އެސްޓަން ވިލާއާ ގުޅުނީ 20 މިލިޔަން ޕައުންޑްގެ އަގަކަށެވެ. އަދި އޭނާ ވަނީ ވިލާއާއެކު ހަތަރު އަހަރުގެ އެއްބަސްވުމެއް ހަދާފައެވެ.

އާސެނަލްގެ ސީނިއާ ޓީމަށް 2012 ވަނަ އަހަރު ނެގި މާޓީނޭޒް އެޓީމަށް މާކަ ގިނަ މެޗުތަކެއް ކުޅެދީފައެއް ނުވެއެވެ. އެގޮތުން އޭނާ އާސެނަލްގެ ޖާޒީގައި ކުޅެފައިވަނީ އެންމެ 38 މެޗެވެ. އަދި 2012 ވަނަ އަހަރުން ފެށިގެން 2019 ވަނަ އަހަރުގެ ނިޔަލަށް މާޓިނޭޒް ވަނީ ލޯނު އުސޫލުން އެކި ކުލަބުތަކަށް ކުޅެފައެވެ. އޭގެ ތެރޭގައި ސްޕެއިންގެ ގެޓާފޭވެސް ހިމެނެއެވެ.

މާޓިނޭޒް ފަހުން ވިދާލީ މި އަހަރުގެ ޖޫން މަހު އާސެނަލްގެ އެއް ނަންބަރު ގޯލްކީޕަރު ބާންޑް ލެނޯއަށް އަނިޔާވި ހިސާބުން ފަށައިގެންނެވެ. އެގޮތުން މިދިޔަ ސީޒަނުގެ ފަހުކޮޅު އާސެނަލުން ކުޅުނު މެޗުތަކުގައި މާޓިނޭޒް ވަނީ މޮޅު ކުޅުމެއް ދައްކާފައެވެ. އަދި އާސެނަލުން މިދިޔަ ސީޒަނުގެ އިނގިރޭސި އެފްއޭ ކަޕާއި މި ސީޒަނުގެ ކޮމިނިޓީ ޝީލްޑް ކާމިޔާބުކުރިއިރު، މާޓިނޭޒް ވަނީ މި މެޗުތަކުގައި ތަފާތު ދައްކާފައެވެ.

ވިލާއިން މި ސީޒަނަށް މާޓިނޭޒްގެ ސޮއި ހޯދިއިރު، ދާދި ފަހުން އެޓީމުގެ ކެޕްޓަން ޖެކް ގްރީލިޝް ވަނީ ވިލާގެ އެއްބެސްވުން އިތުރު ފަސް އަހަރަށް އާކޮށްފައެވެ.

ޕްރިމިއާ ލީގުގައި ވާދަކުރަމުން އަންނަ ވިލާއިން މި ސީޒަނުގެ ޕްރިމިއާ ލީގުގައި އަދި މެޗެއް ކުޅެފައެއް ނުވެއެވެ. އެޓީމުން ލީގުގައި ކުޅޭ ފުރަތަމަ މެޗުގައި މި މަހުގެ 21 ވަނަ ދުވަހު ނުކުންނާނީ ޝެފީލްޑް ޔުނައިޓެޑާ ދެކޮޅަށެވެ.