ޗެލްސީއަށް ކުޅެމުން އައި އިންގްލޭންޑްގެ ކުރީގެ ކެޕްޓަން ޖޯން ޓެރީ އެސްޓަން ވިލާއަށް ސޮއިކޮށްފިއެވެ.

ކުރިއަށް އޮތް ސީޒަނުގައި ޗެމްޕިއަންޝިޕް ކުޅޭ އެސްޓަން ވިލާއަށް ޓެރީ ބަދަލުވެފައިވަނީ އެއް އަހަރު ދުވަހުގެ އެއްބަސްވުމެއްގެ ދަށުން ކަމަށް ރިޕޯޓްތައް ބުނެއެވެ.

ޓެރީ ހޯދުމަށް ތުރުކީގެ ގަލަސަތަރާއި، ވެސްޓްބްރޮމްވިޗް، ސްވެންސީ އަދި ދުނިޔޭގެ ނަން މަޝްހޫރު ގިނަ ކްލަބްތަކުން މަސައްކަތްކޮށްފައިވާއިރު، އޭނާ ވަނީ ހުރިހާ ކްލަބެއްގެ ހުށަހެޅުންތައް ރިޖެކްޓްކުރުމަށްފަހު އެސްޓަންވިލާއަށް ބަދަލުވެފައެވެ.

އެސްޓަންވިލާއަށް ބަދަލުވުމަށްފަހު ޓެރީ ބުނީ އެ ކްލަބަކީ އޭނާ ވަރަށް ބަލައިގަންނަ ކްލަބެއް ކަމަށާއި، އެ ކްލަބުގައި ކޮލެޓީ ރަނގަޅު ކުޅުންތެރިން އަދި ރަނގަޅު ކޯޗެއް ހުންނަ ކަމަށެވެ. އެސްޓަންވިލާގެ ކޯޗަކީ ސްޓީވް ބްރޫސްއެވެ.

މީގެއިތުރުން ޓެރީ ބުނީ އެސްޓަންވިލާއަށް ބަދަލުވެވުމުން އޭނާ ވަރަށް ހިތްހަމަޖެހިފައިހުރި ކަމަށާއި، ރަނގަޅު ކާމިޔާބީތަކެއް އެ ކްލަބާއެކު ހޯދަން ކެތްމަދުވެފައި ހުރި ކަމަށެވެ.

ސްކައި ސްޕޯޓްސްއަށް މީގެކުރިން ދިން އިންޓަވިއުއެއްގައި 22 އަހަރަށްފަހު ފަހު ޗެލްސީ ދޫކޮށްލި ޓެރީ ބުނީ އޭނާ އެނބުރި ކައިރި މުސްތަގުބަލެއްގައި ވެމްބްލީ ސްޓޭޑިއަމުން ފެނިދާނެ ކަމަށާއި، އެހެންނަމަވެސް ދެން އޭނާ ފެންނާނީ ކޯޗެއްގެ ގޮތުގައި ކަމަށެވެ.

ޗެލްސީގެ ޖޫނިއަރ ޓީމުންފެށިގެން އެކުލަބާއިއެކު ޓެރީ ވަނީ ޖުމްލަ 22 އަހަރު އެޓީމުގައި ހޭދަކޮށްފައެވެ. ނޮޓިންގްހަމް ފޮރެސްޓަށް ލޯން އެއްބަސްވުމެއްގެ ދަށުން 2000 ވަނަ އަހަރު ދާންޖެހުނު ނަމަވެސް އެނޫން އެހެން ކުލަބަކަށް އޭނާ ކުޅެފައެއް ނުވެއެވެ.

ޗެލްސީގައި ހުނަރުން ފުރިފައިވާ ޒުވާން މޮޅެތި ކުޅުންތެރިން ތިބުމުން އެކުޅުންތެރިންނަށް ފުރުސަތު ދޭންޖެހޭ ކަމަށް ޓެރީ ބުންޏެވެ.

ޗެލްސީއަށް 2000 ވަނަ އަހަރު ފުރަތަމަ ލަނޑު ކާމިޔާބުކޮށްދިން ޓެރީވަނީ އެޓީމަށް ޖުމްލަ 66 ލަނޑު ޖަހައިދީފައެވެ. އަދި ޗެލްސީ އާއި ޕްރިމިއާ ލީގުގެ ތާރީހުގައި އެންމެ ގިނަ ލަނޑު ޖެހި ޑިފެންޑަރަކީ ވެސް ޓެރީއެވެ.

ޗެލްސީއަށް ޓެރީ ކުޅުނު ޖުމްލަ 713 މެޗުގެ ތެރެއިން 578 މެޗު ކުޅެފައި ވަނީ ކެޕްޓަން ބޭންޑް އަޅައިގެންނެވެ.