ސާޓާ އެވޯޑްސްގެ ހަފްލާ އައްޑޫގައި!

ފަތުރުވެރިކަމުގެ ދާއިރާއަށް ހާއްސަކޮށްގެން ބާއްވާ ސަރަހައްދީ ޓްރެވަލް އެވޯޑު، ސައުތް އޭޝިއަން ޓްރެވަލް އެވޯޑްސް (ސާޓާ) އެވޯޑް އައްޑޫ ސިޓީގެ އީކުއޭޓަރ ވިލެޖްގައި ބާއްވަން ނިންމައިފިއެވެ.

ހައިރައިޒުން އިންތިޒާމުކޮށްގެން ބާއްވާ އެވޯޑަށް 450 އަށް ވުރެ ގިނަ ފަރާތްތަކުން ނޮމިނޭޓްވާއިރު ސާޓާގެ ރާއްޖޭގެ އިވަލުއޭޝަން ވަނީ ފަށާފައެވެ.

މި އެވޯޑްގެ ޕްލެޓިނަމް ޕާޓްނާއަކީ އުރީދޫއެވެ. އަދި ގޯލްޑް ޕާޓްނަރަކީ ހޯކްސް ޕްރައިވެޓް ލިމިޓެޑެވެ. ސިލްވާ ޕާޓްނަރުންގެ ގޮތުގައި މާލޭ އޭރިއޭޓެޑް ވޯޓާ ކޮމްޕެނީ ޕްރައިވެޓް ލިމިޓެޑާއި އޭޝިއާ ފޯވާޑިން ޕްރައިވެޓް ލިމިޓެޑު ހިމެނެއެވެ. އަދި ސާޓާގެ ޓްރެވަލް ޕާޓްނާއެއްގެ ގޮތުގައި ހަމަޖެއްސީ އެމްވީ ހޮޓެލްސްއެވެ.

ރާއްޖޭގެ އިވެލުއޭޝަން ނިމިފައިވާއިރު ދެން އޮތީ މިމަހުގެ 19 އިން 22 އަށް ކޮލަމްބޯގައި ކުރިއަށް ގެންދާ އިވެލުއޭޝަންއެވެ. މީގެ އިތުރުން ދެކުނު އިންޑިއާ އިވެލުއޭޝަން އޮންނާނީ 23 އިން 27 އަށް ބެންގަލޫރުގައެވެ. އަދި ދެކުނު އިންޑިއާ އިވެލުއޭޝަން މިމަހުގެ 27 އިން 29 އަށް ނިއުދިއްލީގައި ކުރިއަށް ގެންދިއުމަށް ނިންމާފައިވެއެވެ.

މި އިވެންޓް މިދިޔަ އަހަރު ބޭއްވީ ލަންކާގެ މައުންޓް ލެވީނިއާ ހޮޓެލްގައެވެ.

މިފަހަރު މި އިވެންޓް އައްޑޫ ސިޓީގައި ބޭއްވުމަކީ ރާއްޖޭގެ ދެކުނު ފަތުރުވެރިކަމަށް ލިބިގެންދާނެ ބޮޑު ކުރިއެރުމެކެވެ.