ދެ ކޮމިޝަނަކުން ހުސްވެފައިވާ މެންބަރުކަމުގެ މަގާމަށް ބޭފުޅުން އައްޔަންކުރެއްވުމަށް ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހު ރައްޔިތުންގެ މަޖިލީހަށް ހުށަހަޅުއްވައިފިއެވެ.

އަންގާރަ ދުވަހު ރައީސުލްޖުމްހޫރިއްޔާ މަޖިލީހަށް ހުށަހަޅުއްވާފައި ވަނީ ނޭޝަނަލް އިންޓެގްރިޓީ ކޮމިޝަނަށާއި، ހިއުމަން ރައިޓްސް ކޮމިޝަނުން ހުސްވެފައިވާ މެންބަރު ކަމަށް އައްޔަންކުރައްވާ ބޭފުޅުންގެ ނަންތަކެވެ.

ނޭޝަނަލް އިންޓެގްރިޓީ ކޮމިޝަނުގެ މެންބަރުކަމަށް ކުރިމަތިލުމަށް ހުޅުވާލައިފައިވަނީ އެ ކޮމިޝަންގެ ރައީސްގެ މަޤާމުގައި ހުންނެވި އަހުމަދު ސުލެއިމާން މަޤާމުން ވަކިކުރެއްވުމަށްފަހުއެވެ. ސުލައިމާން ވަކިކުރުމަށް ރައީސުލްޖުމްހޫރިއްޔާއަށް ލަފާއެރުއްވުމަށް ފާސްކޮށްފައިވަނީ ރައްޔިތުންގެ މަޖިލީހުންނެވެ. އަދި ރައްޔިތުންގެ މަޖިލީހުގެ ލަފާފުޅާއެކު ރައީސް ސޯލިހް ވަނީ ސުލައިމާން ވަކިކުރައްވާފަ އެވެ.

އޭގެއިތުރުން ނޭޝަނަލް އިންޓެގްރިޓީ ކޮމިޝަނަށް 3 މެމްބަރަކު އައްޔަންކުރުމުގެ މަސައްކަތް ރައްޔިތުންގެ މަޖިލީހުން އަންނަނީ ކުރިއަށްގެންދަމުންނެވެ. އެންއައިސީގެ ތިން މެމްބަރުން އިސްތިއުފާދެއްވާފައިވާތީ އެމަގާމުތަކަށް ކުރިމަތިލުމަށް ހުޅުވާލި ފުރުސަތުގައި އެކަމަށް އެދުނު 17 ބޭފުޅުންގެ ނަންތައް އިތުރަށް ދިރާސާކުރުމަށް މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފަ އެވެ.

އެންއައިސީ އަކީ ފަސް މެމްބަރުންގެ މައްޗަށް އެކުލެވިފައިވާ ކޮމިޝަނަކަށްވާއިރު ކޮމިޝަންގައި މިހާރު ހުންނަވަނީ ދާދި ފަހުން މެމްބަރަކަށް އައްޔަން ކުރެއްވި ކާނަލް (ރޓޑ) އަހްމަދުޖިހާދު އެކަންޏެވެ.

އެންއައިސީގެ އިތުރުން ރައީސުލްޖުމްހޫރިއްޔާ ވަނީހިއުމަން ރައިޓްސް ކޮމިޝަނުން ހުސްވެފައިވާ މެންބަރު ކަމަށްވެސް ބޭފުޅަކު އައްޔަންކުރެއްވުމަށް ވަނީ ހުށަހަޅުއްވާފައެވެ.

ހިއުމަން ރައިޓްސް ކޮމިޝަންގެ ހުސްވެފައިވާ މެންބަރެއްގެ މަޤާމަށް ބޭފުޅަކު ޢައްޔަންކުރެއްވުމަށްޓަކައި ރައީސުލްޖުމްހޫރިއްޔާ ރައްޔިތުންގެ މަޖިލީހަށް ނަންތައް ހުށަހަޅުއްވާފައި ވަނީ، 2020 ޖުލައި 22 ވަނަ ދުވަހު އެ ކޮމިޝަނުގެ މެންބަރެއް ކޮމިޝަނުގެ މެންބަރުކަމުގެ މަޤާމުން ވަކިކުރައްވާފައިވާތީ، ހުސްވެފައިވާ މަޤާމަށް މެންބަރަކު ޢައްޔަންކުރެއްވުމަށްޓަކައެވެ.

ރައީސް އޮފީހުން ވަނީ ހޯމަ ދުވަހު ވެސް އެޗްއާރުސީއެމްގެ މެންބަރު ކަމުގެ މަޤާމަށް ކުރިމަތިލުމުގެ ފުރުސަތު ހުޅުވާލާފައެވެ. އެދުވަހު ފުރުސަތު ހުޅުވާލާފައި ވަނީ މެންބަރެއްގެ މެންބަރުކަމުގެ މުއްދަތު ހަމަވާތީ، އެ ކޮމިޝަނަށް މެންބަރަކު ޢައްޔަން ކުރެއްވުމަށްޓަކައި މެންބަރުކަމުގެ މަޤާމަށް ކުރިމަތިލެއްވުމުގެ ފުރުޞަތު، ހުޅުވައިލުމުން އެކަމަށް އެދިލެއްވި ފަރާތްތަކަށް، ރައްޔިތުންގެ މަޖިލީހުން ރުހުން ދެއްވާފައި ނުވާތީއެވެ.

އެޗްއާރުސީއެމްގެ މެންބަރުކަމުގެ ފޯމު ބަލައިގަތުމަށް ހަމަޖެހިފައިވަނީ މިހިނގާ ސެޕްޓެންބަރު މަހުގެ 21، 22 އަދި 23 ވަނަ ދުވަހު ހެނދުނު 09:30 އިން މެންދުރުފަހު 12:30 އަށް، ރައީސުލްޖުމްހޫރިއްޔާގެ އޮފީހުންނެވެ. އަދި ކޮމިޝަނުގެ މެންބަރު ކަމަށް ކުރިމަތިލުމަށް އެދޭ ފޯމު ރައީސް އޮފީހުގެވެބްސައިޓުން ޑައުންލޯޑްކުރެއްވޭނެ ކަމަށް އެ އޮފީހުން ބުންޏެވެ.