ހޯމަ ދުވަހުން ފެށިގެން 6 މީހުންނަށްވުރެ ގިނައިން އެއްވެ އުޅުން ޔޫކޭގައި މަނާ ކުރަނީ
14 ސެޕްޓެމްބަރު 2020 | ހޯމަ 04:10ޕޮޒިޓިވްވި މީހުންގެ އަދަދު 3،330 އަށް އަރައިފައިވެ
ޔޫކޭގެ އާމު ރައްޔިތުން
އިނގިރޭސިވިލާތު ގައި ކޮރޯނާވައިރަސް ޖެހޭ މީހުންގެ އަދަދު އަނެއްކާވެސް އިތުރުވެއްޖެއެވެ.
މެއި މަހަށް ފަހު ފުރަތަމަ ފަހަރަށް އިނގިރޭސިވިލާތު ގައި މި ނުރައްކާތެރި ބަލި ޖެހިގެން ޕޮޒިޓިވްވި މީހުންގެ އަދަދު ވަނީ 3000ށްވުރެ އިތުރުވެފައެވެ.
އެހެންކަމުން ކޮވިޑްގެ ކޭސްތައް އިތުރުވާން ފެށުމުން ލޮކްޑައުން ފިޔަވަޅުތައް ވަރުގަދަ ކުރުމަށް އެ ގައުމުގެ ސަރުކާރުން ވަނީ ނިންމާފައެވެ. އެގޮތުން 14 ސެޕްޓެމްބަރުވާ ހޯމަ ދުވަހުން ފެށިގެން ހަ މީހުންނަށްވުރެ ގިނައިން އެއްތަނެއްގައި އެއްވެ ނޫޅެވޭނެ ކަމަށް ވަނީ ކަނޑައަޅާފައެވެ.
މި ފިޔަވަޅުތައް ވަރުގަދަ ކުރަން މި ޖެހުނީ ވޭތުވެދިޔަ ސައްވީސް ގަޑިއިރު މި ބަލި ޖެހިގެން މަރުވި މީހުންގެ އަދަދު ފަހަކަށް އެރުމުން ވެސް މެއެވެ. މިހާރު މި ބަލި ޖެހިގެން މުޅި ޖުމްލަ 41،623 މީހުން ވަނީ މަރުވެފައެވެ.
ހަ މީހުނަށްވުރެ ގިނަ މީހުންނަށް އެއްތަނެއްގައި އެއްވެ ނޫޅެވޭ ގޮތް އެގައުމުގެ ސަރުކާރުން ނިންމާފައިވީ ނަމަވެސް މީހުން އެންމެ ގިނައިން އެއްވެ އުޅޭ ތަންތަން ކަމުގައިވާ ސްކޫލްތަކާއި ވިޔަފާރިތައް އަދި ފިހާރަތަކާއި ކެފޭ، ރެސްޓޯރެންޓް ފަދަ ތަންތަން ހުޅުވާފައި ބެހެއްޓުމަށް ވަނީ ނިންމަވާފައެވެ. އެހެންނަމަވެސް ހަ މީހުންނަށްވުރެ ގިނަގިނަ މީހުންނަށް ތަންތަނުގައި ގްރޫޕް ހަދައިން އެއްވެ ނޫޅެވޭނެ ކަމަށް ވަނީ ބުނެފައެވެ.
އަދި، މި އަމުރާ ހިލާފްވާ މީހުން ޖޫރިމަނާ ކުރުމަށް ވެސް އެ ގައުމުގެ ސަރުކާރުން ވަނީ ނިންމަވާފައެވެ. އެގޮތުން ފުރަތަމަ ފަހަރަށް މި ގަވާއިދާ ހިލާފުވެއްޖެނަމަ 100 ޔޫރޯ އިން އަދި ތަކުރާރުވެއްޖެނަމަ 3،200 ޔޫރޯ އާ ހަމަޔަށް ޖޫރިމަނާ ކުރުމަށް ވެސް އެ ޤައުމުން ވަނީ ނިންމާފައެވެ.
