މެލޭޝިއާގެ އާއްމު އިންތިޚާބު: ވޯޓުލުން ފެށިގެން ކުރިއަށް ދަނީ

މެލޭޝިއާގައި ބާއްވާ ތާރީޚި އާއްމު އިންތިޚާބުގެ ވޯޓުލުން ފެށިގެން ކުރިއަށް އެބަދެއެވެ.

ވޯޓުލުން ފެށުނީ މިއަދު ރާއްޖެ ގަޑިން ފަތިހު 5:00ގައެވެ. އަދި ރާއްޖެ ގަޑިން މެންދުރުފަހު 2:00 އާއި ހަމަޔަށް ވޯޓުލުން ކުރިއަށް ދާނެއެވެ. އިންތިޚާބުގެ ނަތީޖާތައް މިރޭ އެނިގެންދާނެއެވެ.

މި އިންިތިޚާބަކީ ބޮޑުވަޒީރު ނަޖީބު ރައްޒާޤްއާއި އިދިކޮޅު ލީޑަރު އަދި ކުރީގެ ބޮޑުވަޒީރު މަހާތީރު މުހައްމަދުގެ ވަރުގަދަ ކުރިމަތިލުމަކަށް ވެގެންދާނެއެވެ. އަދި މިއީ މެލޭޝިއާއަށް މިނިވަންކަން ލިބުނުފަހުން މިދިޔަ 61 އަހަރު އެޤައުމުގައި ވެރިކަން ކުރި ބަރިސާން ނެޝަނަލް ކޯލިޝަނަށް ކުރިމަތިވާ އެންމެ ބޮޑު ޗެލެންޖެވެ.

ބަރިސާން ނެޝަނަލް އާއި، އެކޯލިޝަންގައި ހިމެނޭ އެންމެ ބޮޑު ޕާޓީކަމަށްވާ ޔުނައިޓެޑް މެލޭސް ނޭޝަނަލް އޯގަނައިޒޭޝަން (އަމްނޯ)ގެ މަޤްބޫލުކަން ފާއިތުވި އަހަރުތަކުގައި ބޮޑުވަޒީރު ނަޖީބް ރައްޒާޤްގެ ވެރިކަމުގައި ވަނީ ކުޑަވެފައެވެ. މިހާރުގެ އިދިކޮޅު ލީޑަރު މަހާތީރު މުހައްމަދަކީ އަމްނޯގެ ކުރީގެ ލީޑަރެވެ. އެހެންނަމަވެސް 2016ވަނަ އަހަރު އެމަނިކުފާނު އަމްނޯ ދޫކުރައްވައި، ބޮޑުވަޒީރު ނަޖީބު ރައްޒާޤާއި ދެކޮޅަށް ތެދުވެވަޑައިގަތީ ސަރުކާރާއި ބޮޑުވަޒީރު އިންތިހާއަށް ކޮރަޕްޓްވެފައިވާ ކަމަށް ތުހުމަތުކުރައްވައެވެ. ކުރިން ދިގު މުއްދަތަކަށް ބޮޑުވަޒީރުކަން ކުރެއްވުމަށްފަހު މަޤާމުން ވަކިވެވަޑައިގެން ހުންނެވި އުމުރުފުޅުން މިހާރު 92 އަހަރުވެފައިވާ މަހާތީރު އަނެއްކާވެސް ސިޔާސީ މައިދާނަށް ނިކުމެވަޑައިގެން، އަނެއްކާވެސް ބޮޑު ތާޢީދެއް ވަނީ ހޯއްދަވާފައެވެ.

2013ވަނަ އަހަރު ބޭއްވި އާއްމު އިންތިޚާބުގައިވެސް އިދިކޮޅު ފަރާތްތަކުން ވަނީ އޭގެ ކުރިން ނުހޯދޭ މިންވަރުގެ ކާމިޔާބީއެއް ހޯދާފައެވެ.

އިންތިޚާބުގެ ވޯޓުލުން ކުރިއަށްދާއިރު އިލެކްޝަންސް ކޮމިޝަން ވަކި ފަރާތަކަށް ޖެހިފައިވާކަމަށް ގިނަ ބަޔަކު ދަނީ ތުހުމަތުކުރަމުންނެވެ. އަދި ޕޯސްޓަލް ވޯޓިންގ މެދުވެރިކޮށް ވޯޓުލީ ފަރާތްތަކުގެ ވޯޓުތަކަށް ބަދަލުގެންނަކަމުގެ ޝަކުވާއާއި، މަރުވެފައިތިބި މީހުންގެ ނަންތައް ވޯޓަރސް ލިސްޓްގައި އަދިވެސް ހިމެނުން ފަދަ ކަންކަން ޖަމްއިއްޔާތަކުން ފާހަގަކުރެއެވެ.

އިދިކޮޅު ފަރާތްތަކުން މި އިންތިޚާބު ކާމިޔާބުކޮށްފިނަމަ މަހާތީރު ވެވަޑައިގަންނަވާނީ ދުނިޔޭގައި ހުންނެވި އުމުރުން އެންމެ ދުވަސްވީ ބޮޑުވަޒީރަށެވެ.

މި އިންތިޚާބަށް ނިކުންނަވާއިރު ބޮޑުވަޒީރު ނަޖީބު ރައްޒާޤަށް ކުރިމަތިވެވަޑައިގެންފައިވާ އެންމެ ބޮޑު ގޮންޖެހުމަކީ އެމަނިކުފާނުގެ މައްޗަށް ކުރެވޭ ކޮރަޕްޝަންގެ ތުހުމަތުތަކެވެ. އެތުހުމަތުތަކުން އެމަނިކުފާނު ބަރީޢަވެވަޑައިގެންފައިވާކަމަށް މެލޭޝިއާގެ އިދާރާތަކުން ބުނިނަމަވެސް، އެމައްސަލަތައް ދުނިޔޭގެ އެހެން ބައެއް ޤައުމުތަކުން ދަނީ އެމައްސަލަ އަދިވެސް ތަހުޤީޤުކުރަމުންނެވެ.

މި އިންތިޚާބުގައި މެލޭޝިއާގެ ޤާނޫނު ހަދާ މަޖިލީހުގެ 222 ގޮނޑިއާއި، އެޤައުމުގެ 13 ސްޓޭޓްގެ ތެރެއިން 12 ސްޓޭޓެއްގެ ސްޓޭޓް ސަރުކާރުތަކުގެ އެސެމްބްލީތަކަށްވެސް މެމްބަރުން އިންތިޚާބުކުރާނެއެވެ. އިންތިޚާބުގައި ވޯޓުލުމުގެ ހައްޤު ލިބިގެންވާ މީހުންގެ އާބާދީ 14.5 މިލިއަނަށް އަރައެވެ.

އިންތިޚާބުގައި މެލޭޝިއާގެ މުސްލިމް އާބާދީއަށް ނަޖީބް ރައްޒާޤްގެ ކޯލިޝަނުން ބޮޑަށް އަމާޒު ހިފާފައިވާއިރު، މުސްލިމުންގެ އިތުރުން ބައިމަދު ޗައިނާ އަދި އިންޑިއާ ދަރިކޮޅުގެ ވޯޓު ލިބޭނެކަމަށް ބެލެވެނީ މަހާތީރުގެ ކޯލިޝަނަށެވެ.