ޓޫރިޒަމް ތަރައްގީކުރުމުގެ އިތުރު މަޝްރޫއުތައް އަންނަ އަހަރު ފެށިގެންދާނެ: ބަންޑާރަ ނައިބު
އިނގިރޭސި ވިލާތުން މިހާރު ވެސް ވަނީ ޓްރެވަލް އެޑްވައިސް ނެރެފައި
ވޯލްޑް ޓްރެވަލް މާކެޓަށް ރާއްޖެއިން ވަޑައިގެންނެވި ވަފްދުގެ އިސްވެރިޔަކަށް ހުންނެވީ ބަންޑާރަ ނައިބު
ރާއްޖޭގައި ޓޫރިޒަމް ތަރައްގީކުރުމުގެ އިތުރު މަޝްރޫއުތައް އަންނަ އަހަރު ފެށިގެންދާނެ ކަމަށް ވޯލްޑް ޓްރެވަލް މާކެޓްގައި ބޭއްވި ނޫސް ކޮންފަރެންސެއްގައި ބަންޑާރަ ނައިބު މުހައްމަދު އަނިލް ވިދާޅުވެއްޖެއެވެ.
ވޯލްޑް ޓްރެވަލް މާކެޓަށް ރާއްޖެއިން ދިޔަ ވަފްދުގެ އިސްވެރިޔަކަށް ހުންނެވި ބަންޑާރަ ނައިބު ފާހަގަކުރެއްވި މަޝްރޫއުތަކުގެ ތެރޭގައި ހިމެނެނީ ވެލާނާ އިންޓަރނޭޝަނަލް އެއަރޕޯޓް ތަރައްގީކުރުމުގެ މަޝްރޫ އާއި އަންނަ އަހަރުގެ ޖުލައި މަހުގެ ތެރޭ ހުޅުވޭ ޗައިނާ-މޯލްޑިވްސް ފްރެންޑްޝިޕް ބްރިޖްގެ މަޝްރޫއެވެ. މީގެ އިތުރުން ރާއްޖެ އާއި ރާއްޖެ އަންނަ ޓޫރިސްޓުންނަށް ވެސް ޚިދުމަތް ދެވޭނެ ގޮތަށް ގާއިމް ކުރެވޭ، ދުނިޔޭގެ ފެންވަރުގެ ސިއްހީ ޚިދުމަތެއް ތަރައްގީ ވެގެންދާނެ ކަމަށް އަނިލް ވިދާޅުވިއެވެ.
އޭގެ އިތުރުން ދިވެހި ސަރުކާރުން ގެންދަނީ ހުޅުމާލޭގައި ޔޫތު ސިޓީއެއް ބިނާކުރަމުން ކަން ބަންޑާރަ ނައިބު ފާހަގަކުރެއްވިއެވެ.
މި އަހަރުގެ ޖެނުއަރީ މަހުން ފެށިގެން އޯގަސްޓް މަހުގެ ނިޔަލަށް އިނގިރޭސި ވިލާތުން 68،007 ފަތުރުވެރިން ރާއްޖެ އައިސްފައި ވެއެވެ. އެއީ ދެވަނައަށް އެންމެ ގިނަ ޓޫރިސްޓުން އައި ގައުމެވެ.
އިނގިރޭސި ވިލާތުގައި ޓޫރިޒަމް އިޝްތިހާރު ކުރުމަށް ބަންޑާރަ ނައިބު ވާހަކަ ދައްކަވާފައިވާއިރު ރާއްޖޭގެ ސިޔާސީ މަސްރަހުގައި ހިނގަމުންދާ ކަންކަމާ ގުޅިގެން އިނގިރޭސި ވިލާތުން އަންނަނީ ޓްރެވަލް އެޑްވައިސް ނެރެމުންނެވެ.
