ހޯނޑެއްދޫ އާއި މަޑަވެލީގެ ރައްޔިތުންނަށް ނަފްސާނީ އަދި އިޖްތިމާއީ އެހީތެރިކަން ފޯރުކޮށްދިނުމުގެ މަސައްކަތް ފަށައިފި
12 ސެޕްޓެމްބަރު 2020 | ހޮނިހިރު 11:32މިމަސައްކަތް ކުރަނީ ތިނަދޫގައި ގާއިމްކޮށްފައިވާ ފެމެލީ އެންޑް ޗިލްޑްރަން ސަރވިސް ސެންޓަރުން
ގދ.ހޯނޑެއްދޫ، އެރަށުން 38 މީހަކު ކޮވިޑް-19ށް ވަނީ ޕޮޒިޓިވްވެފައި
ކޮވިޑް-19ށް ޕޮޒިޓިވް ގިނަ ކޭސްތަކެއް ގދ. ހޯނޑެއްދޫއިން ފެނުމާއި ގުޅިގެން ގދ. ހޯނޑެއްދޫ އާއި ގދ.މަޑަވެލީގެ ނާޒުކު ހާލަތްތަކުގައިވާ ފަރާތްތަށް ދެނެގަނެ ނަފްސާނީ-އިޖްތިމާއީ އެހީތެރިކަން ފޯރުކޮށްދިނުމުގެ މަސައްކަތް ފަށައިފިއެވެ.
ޖެންޑަރ މިނިސްޓްރީގެ ދަށުން މި މަސައްކަތް ކުރަނީ ހުވަދު އަތޮޅު ދެކުނުބުރީ ތިނަދޫގައި ގާއިމްކޮށްފައިވާ ފެމެލީ އެންޑް ޗިލްޑްރަން ސަރވިސް ސެންޓަރުންނެވެ.
އެގޮތުން ހޯނޑެއްދޫ އަދި މަޑަވެލި ހިމެނޭހެން ދެ ރަށުގައި ތިބި ނުކުޅުދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުންނާއި ދާންމަތިވެފައިވާ ފަރާތްތަކާއި އެކަނިވެރި މައިންގެ އިތުރުން ފަގީރު ހާލަތުގައި ހިމެނޭ ފަރާތްތަކުގެ މައުލޫމާތު އެއްކޮށް އެ ފަރާތްތަކަށް ގުޅައި ހާލު ބެލުމުގެ މަސައްކަތް ފަށާފައިވާ ކަމަށް ޖެންޑަރ މިނިސްޓްރީން ބުނެއެވެ.
ޖެންޑަރ މިނިސްޓްރީން ބުނީ މި މަސައްކަތުގެ ތެރެއިން އެ ދެ ރަށުގެ ކައުންސިލް އިދާރާތަކުން ގޭބިސީ ތަކުގެ ހާލަތު ބަލައި މިނިސްޓްރީގެ ސަމާލު ކަމަށް ގެނެސްފައިވާ އާއިލާތަކުގެ އަސާސީ ބޭނުންތައް ފުއްދުމަށް ވަގުތުން ފޯރުކޮށްދޭންޖެހޭ އެހީގެ ތަކެތި މޯލްޑިވްސް ޕޮލިސް ސަރވިސްގެ އެހީތެރިކަމާއެކު އެ އާއިލާތަކަށް ފޯރުކޮށްދީފައިވާ ކަމަށެވެ.
މީގެ އިތުރުން ސިއްހީ މިފަދަ ކާރިސާއެއްގައި އެންމެ ހިރާސް ބޮޑު އެއް ބައެއްގެ ގޮތުގައި ކުޑަކުދިން ހިމެނިގެން ދާނެތީ ގދ. ފެމެލީ އެންޑް ޗިލްޑްރަން ސަރވިސް ސެންޓަރަށް މި ދެ ރަށުން ހުށަހެޅިފައިވާ މައްސަލަތަކަށް ޚާއްސަ ސަމާލުކަމެއްދީ ފޯނުން ގުޅައިގެންނާއި ކައުންސިލް އިދާރާގެ އެހީތެރިކަމާއެކު ހާލަތު ބަލައި މޮނިޓަރ ކުރަމުންދާ ކަމަށް މިނިސްޓްރީން ބުނެއެވެ.
ޖެންޑަރ މިނިސްޓްރީން ބުނީ ހޯނޑެއްދޫ އިން ކޮވިޑް-19ގެ ކޭސްތައް ފެންނަމުންދާ މިދަނޑިވަޅުގައި އެ މާހައުލުގައި ދިރިއުޅެމުންދާ ފަރާތްތަކަށް ބޭނުންވާ ސައިކޮލޮޖިކަލް ފަސްޓް އެއިޑް އަދި ނަފްސާނީ އިޖްތިމާއީ އެހީތެރިކަން ފެމެލީ އެންޑް ޗިލްޑްރަން ސަރވިސް ސެންޓަރުގެ އިޖްތިމާއީ ޚިދުމަތްތެރިން ފޯރުކޮށްދެމުންދާ ކަަމަށެވެ.
ލޮކްޑައުންގެ ހާލަތުގައި މިނިސްޓްރީ އިން އިޖްތިމާއީ އެހީތެރިކަން ފޯރުކޮށްދިނުމަށް ގާއިމްކޮށްފައިވާ ހިލޭ ގުޅޭ ނަންބަރު 1421 މި ދެ ރަށަށް ޚާއްސަކޮށް އަލުން ޚިދުމަތް ދޭން ފަށާފައިވާ ކަމަށް ޖެންޑަރ މިނިސްޓްރީން ބުނެއެވެ.
