ދުނިޔޭގައި އެންމެ ހަލުވިކަމާއެކު ކޮވިޑް-19 ފެތުރެމުންދާ ލެޓިން އެމެރިކާ ސަރަހައްދުގައި ވައިރަސް ޖެހުނު މީހުންގެ އަދަދު 8 މިލިއަނަށް އަރައިފިއެވެ.

މިސަރަހައްދުގެ ބައެއް ގައުމުތަކުގައި ވައިރަސް ފެތުރޭ މިންވަރު ދަށް ކުރެވިފައިވާ ކަމަށް ރިޕޯޓްތައް ބުނެއެވެ. ބުދަ ދުވަހު އެސަރަހައްދުގައި ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު ވަނީ އޭގެ ކުރީ ހަތް ދުވަހު ދުވާލެއްގެ މައްޗަށް ވައިރަސް ޖެހިގެން ރިޕޯޓް ކުރި 80،512 ން 67،173 މީހުންނަށް މަދުވެފައެވެ.

ލެޓިން އެމެރިކާ ސަރަހައްދުން އެންމެ ހާލަތު ގޯސް ގައުމަކީ ބްރެޒިލްއެވެ. ބްރެޒިލް އަކީ ތިން ވަނަ އަށް އެންމެ ގިނަ މީހުންނަށް ވައިރަސް ޖެހޭ އަދި ދެ ވަނަ އަށް އެންމެ ގިނަ މީހުން މި ބަލީގައި މަރުވެގެން ރިޕޯޓްކުރަމުން އަންނަ ގައުމެވެ. ބްރެޒިލްގައި ވައިރަސް ޖެހުނު މީހުންގެ އަދަދު 4.2 މިލިއަނަށް އަރާފައިވާއިރު މަރުވި މީހުންގެ އަދަދު ވަނީ 128،000ށް ވުރެ މަތިވެފައެވެ.

އެހެންނަމަވެސް ފާއިތުވި ދުވަސްތަކުގައި ބްރެޒިލްގައި ވައިރަސް ޖެހޭ މީހުންގެ އަދަދު ވަނީ ދަށަށް ދާން ފަށާފައެވެ. ބުރާސްފަތި ދުވަހު އެ ގައުމުގައި 40،557 މީހުންނަށް ވަނީ ވައިރަސް ޖެހިފައެވެ.

މީގެއިތުރުން އެވްރެޖް ގޮތެއްގައި ކޭސްތައް ފެންނަ މިންވަރު ޕެރޫ އާއި ކޮލަމްބިއާ އަދި މެކްސިކޯ އިން ވެސް ވަނީ ދަށަށް ގޮސްފައެވެ. މި ގައުމުތަކަކީ ބްރެޒިލް އަށް ފަހު އެ ސަރަހައްދުން އެންމެ ގިނަ މީހުންނަށް ވައިރަސް ޖެހިގެން ރިޕޯޓް ކުރަމުން އަންނަ ގައުމުތަކެވެ.

މެކްސިކޯ އިން ބުރާސްފަތި ދުވަހު 4857 މީހުންނަށް ވައިރަސް ޖެހިފައިވާއިރު މަރުވެފައިވަނީ 554 މީހުންނެވެ. އެއާއެކު އެ ގައުމުގައި ވައިރަސް ޖެހުނު މީހުންގެ އަދަދު ވަނީ 652،364ށް އަރާފައެވެ. އަދި މަރުވި މީހުންގެ އަދަދު ވަނީ 69،649ށް އަރާފައެވެ.

މުޅި ދުނިޔެއިން ނުވަ ލައްކައަށް ވުރެ ގިނަ މީހުންނަށް ވައިރަސް ޖެހިގެން ރިޕޯޓް ކުރަމުން އަންނައިރު އެންމެ ގިނަ އިން މީހުން މަރުވެގެން ރިޕޯޓް ކުރަމުން އަންނަނީ އެމެރިކާ، ބްރެޒިލް، އިންޑިޔާ އަދި މެކްސިކޯ އިންނެވެ.

ލެޓިން އެމެރިކާ ސަރަހައްދުގެ ގިނަ ގައުމުތަކެއްގެ ލީޑަރުން ވަނީ ކޮވިޑް-19 އާ ގުޅިގެން އެ ގައުމުތަކުގެ އިގްތިޞާދަށް ވަމުންދާ ގެއްލުމުން ސަލާމަތްވާނެ ގޮތްތަކާއި ގުޅޭގޮތުން މަޝްވަރާ ކޮށްފައެވެ.

އެސަރަހައްދުގެ ފަތުރުވެރި ކަމަށް އެކަނިވެސް މިއަހަރު 230 ބިލިއަން އެމެރިކާ ޑޮލަރުގެ ގެއްލުމެއް ވާނެކަމަށް ވަނީ ލަފާ ކޮށްފައެވެ.