އުރުދުންގައި ހުންނަ ސީރިޔާ ރެފިއުޖީ ކޭމްޕަކުން ކޮވިޑް ފެނިއްޖެ
10 ސެޕްޓެމްބަރު 2020 | ބުރާސްފަތި 00:41މި މީހުން ޕޮޒިޓިވްވީކަން އެނގުނީ ރެންޑަމް ސާމްޕްލިންގގެ ތެރެއިން
އުރުދުންގައި ހުންނަ ސީރިޔާގެ ރެފިއުޖީ ކޭމްޕް
އުރުދުންގައި ހުންނަ ސީރިޔާ ރެފިއުޖީ ކޭމްޕްގައި ދިރިއުޅެމުންދާ މީހުންގެ ތެރެއިން ދެ މީހަކު ކޮވިޑް ބައްޔަށް ޕޮޒިޓިވްވެފައިވާ ކަމަށް އދ. ގެ ރެފިއުޖީ އެޖެންސީން ބުނެފިއެވެ.
މިއީ އުރުދުންއިން މި ބަލި ފެނުނު ފަހުން، އެ ގައުމުގައި ދިރިއުޅެމުންދާ ސީރިޔާގެ ރެފިއުޖީ ކޭމްޕަކުން ބަޔަކު ޕޮޒިޓިވްވެގެން ރިޕޯޓްކުރެވުނު ފުރަތަމަ ފަހަރެވެ. މި ދެ މީހުން ޕޮޒިޓިވްވިކަން އެނގުނީ ރޭންޑަމް ސާމްޕަލިންގގެ ތެރެއިންކަމަށް އުރުދުންގެ އޮފިޝަލުންނާ ހަވާލާދީ ބޭރުގެ މީޑިއާތަކުން ވަނީ ރިޕޯޓްކޮށްފައެވެ.
އދ. ގެ ރަޖިސްޓްރީ ދައްކާ ގޮތުން އުރުދުންގައި ސީރިޔާގެ ހަ ލައްކައަށް ވުރެ ގިނަ އަދަދެއްގެ ރެފިއުޖީން ދިރިއުޅެމުން ދާއިރު، އެންމެ ގިނަ އަދަކަށް ސީރިޔާއަށް ނިސްބަތްވާ ރެފިއުޖީން ރަޖިސްޓްރީ ވެފައިވަނީ އެ ގައުމުގައެވެ. 2011 ވަނަ އަހަރުން ފެށިގެން ސީރިޔާގައި ހިނގަމުންދާ ދާޚިލީ ހަނގުރާމައިގެ ސަބަބުން އެތައް ލައްކަ ސީރިޔާ މީހުންނެއް ވަނީ އެ ގައުމު ދޫކޮށް ހިޖުރަކޮށްފައެވެ.
