ފާޑުކިޔުންތަކަށް ހިސާންގެ ރައްދު: ވަޒީފާގެ ގަޑި ނިމުމުން ވަކި ތަނެއްގައި ހުރުމަށް މަޖުބޫރު ކުރެވިގެން ނުވާނެ!
9 ސެޕްޓެމްބަރު 2020 | ބުދަ 18:13ރިސޯޓްތަކުގައި މަސައްކަތްކުރާ މުވައްޒަފުންގެ ޑިއުޓީ ނިމުމުން ރިސޯޓްް ދޫކޮށް މިހާރު ރަށަށްދެވޭނެ
ތުޅާދޫ ދާއިރާގެ މެމްބަރު ހިސާން ހުސެއިން
ވަޒީފާގެ ގަޑި ނިމުމުން ވަކި ތަނެއްގައި ހުރުމަށް މަޖުބޫރު ނުކުރެވޭނެ ކަމަށް ވިދާޅުވެ، ރިސޯޓުތަކުގައި މަސައްކަތް ކުރާ މުވައްޒަފުންގެ ޑިއުޓީ ގަޑި ނިމުމުން ރިސޯޓްް ދޫކޮށް ދެވޭ ގޮތަށް ވަޒީފާއާ ބެހޭ ގާނޫނަށް ގެނެވުނު އިސްލާހަށް އަމާޒުވާ ފާޑުކިޔުންތަކަށް ތުޅާދޫ ދާއިރާގެ މެމްބަރު ހިސާން ހުސެއިން ރައްދު ދެއްވައިފި އެވެ.
ރިސޯޓްތަކުގައި މަސައްކަތް ކުރާ މުވައްޒަފުންގެ ޑިއުޓީ ނިމުމުން ރިސޯޓްް ދޫކޮށް ދެވޭ ގޮތަށް ވަޒީފާއާ ބެހޭ ގާނޫނު އިސްލާހު ކުރުމަށް ހުށަހެޅުއްވީ ހިސާންއެވެ. ހިސާން ހުށަހެޅުއްވި އެ އިސްލާހުގައިވާގޮތުން މަސައްކަތު ގަޑި ނިމުމުން މަސައްކަތް ކުރާ ތަން ދޫކޮށް ދިއުމުގެ ހައްގު ކޮންމެ މުވައްޒަފަކަށް ވެސް ލިބިގެންވާ ކަމަށެވެ. އަދި އެކަމަށް ރިސޯޓްގެ އުޅަނދު ފަހަރު ނޫން އުޅަނދުތައް ވެސް ބޭނުން ކުރުމުގެ ހުއްދަ ލިބޭނެއެވެ.
ހިސާންގެ އިސްލާހް ފާސްވެފައިވަނީ 61 މެމްބަރުން ވޯޓާ އެކުއެވެ.
ވަޒީފާ އާއިބެހޭ ޤާނޫނަށް އެ އިސްލާހު ގެނައުމާއެކު ބައެއް ފަރާތްތަކުގެ ފާޑުކިޔުންތައް އަމާޒުވެފައިވެއެވެ. އެގޮތުން އެއީ ނުވާނެ ކަމެއް، ޤާނޫނެއްގައި ލިޔެ ފާސްކޮށްލުން ކަމަށް ބުނެ ބައެއް ފަރާތްތަކުން އެކަމަށް ފާޑުކިޔުންތައް އަމާޒު ކޮށްފައިވެއެވެ.
އެފަދަ ހަބަރަކާއި ގުޅުވައި، ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ކުރެއްވި ޓުވީޓަކަށް ރައްދުދެއްވައި، މެމްބަރު ހިސާން ވިދާޅުވީ މައިންތަކުގައި މީހުން ގެންގުޅުނުހެން މުވައްޒަފުން ބަންދުކޮށްގެން ރިސޯޓުތަކުގައިި ގެންގުޅެވިދާނެ ކަމަށް ގަބޫލުކޮށް ވާހަކަދެއްކުމަކީ މާބޮޑު ނުރައްކަލެއް ކަމަށެވެ. މިއީ 2020 ވަނަ އަހަރު ކަމަށް ވިދާޅުވެ ހިސާން ވިދާޅުވީ ވަޒީފާގެ ގަޑި ނިމުމުން ވަކިތަނެއްގައި ހުރުމަށް މަޖުބޫރުކޮށްގެން ނުވާނެ ކަމަށެވެ.
މީގެކުރިން އަމަލު ކުރަމުން އަންނަ ގޮތުން ނަމަ މުވައްޒަފުގެ ވަޒީފާގެ ގަޑި ނިމުނަސް ރިސޯޓުން ދެވެނީ މެނޭޖްމެންޓުގެ ހުއްދަ ލިބިގެންނެވެ. އެއީ ރަށާ ކިތަންމެ ގާތުގައި އޮންނަ ރިސޯޓެއް ނަމަވެސް، އެކަން އޮންނަނީ އެގޮތަށެވެ. ނަމަވެސް ޤާނޫނަށް ގެނެވުނު ބަދަލާއެކު އެއީ މުވައްޒަފުގެ ހައްޤެކެވެ.
