މި ސަރުކާރުގެ ތިން އަހަރުގައި 4،000 ކުދިން ވަޒީފާގެ ބާޒާރަށް ވަނީ ތަމްރީނު ކުރެވިފައި: މިނިސްޓަރު
2008 އަހަރުން 2013 ވަނަ އަހަރަށް ވަޒީފާގެ ބާޒާރަށް ތަމްރީނުކުރެވިފައިވަނީ 52 ޒުވާނުން
އެޑިއުކޭޝަން މިނިސްޓްރީ ޓިވެޓް ޕްރޮގްރާމް
ފާއިތުވެދިޔަ ތިން އަހަރު ތެރޭގައި 4،000 ވުރެ ގިނަ ކުދިން ވަޒީފާގެ ބާޒާރަށް ތަމްރީނު ކުރެވިފައިވާ ކަމަށް އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވެއްޖެ އެވެ.
ޓެކްނިކަލް އެންޑް ވޮކޭޝަނަލް އެޑިޔުކޭޝަން އެންޑް ޓްރެއިނިންގ އޮތޯރިޓީ (ޓިވެޓް) އިން ކުރާ މަސައްކަތްތައް ހަރުދަނާ ކުރުމަށް ބޭއްވި ފޯރަމްގައި އެޑިޔުކޭޝަން މިނިސްޓަރ ޑރ. އާއިޝަތު ޝިހާމް ވިދާޅުވީ މަސައްކަތްތެރިކަމާއި ހުނަރުގެ ދާއިރާތަކަށް ޒުވާނުން ތަމްރީނު ކުރުމަކީ މި ސަރުކާރުން އަހައްމިޔަތު ކަމެއް ދެއްވާ ކަމެއް ކަމަށެވެ.
ދެހާސް އަށްވަނަ އަހަރާއި 2013 ވަނަ އަހަރާއި ދެމެދު ޓިވެޓް އޮތޯރިޓީގެ ޕްރޮގްރާމްތަކުން ވަޒީފާގެ ބާޒާރަށް ތަމްރީނުކުރެވިފައިވަނީ 52 ޒުވާނުން ނަމަވެސް، ވޭތުވެ ދިޔަ ތިން އަހަރު ދުވަހުގެ ތެރޭގައި 4762 ޒުވާނުން ވަޒީފާގެ ބާޒާރަށް ތަމްރީނުކުރެވިފައިވާ ކަމަށް މިނިސްޓަރ ވިދާޅުވި އެވެ.
އޮސްޓްރޭލިއާ ސަރުކާރުގެ ހިލޭ އެހީގައި ކުއީންސްލޭންޑް ޔުނިވަރސިޓީ އޮފް ޓެކްނޮލަޖީ އާއި އެޑިޔުކޭޝަން މިނިސްޓްރީގެ ޓިވެޓް އޮތޯރިޓީ ގުޅިގެން ފެށި އެއްދުވަހުގެ ފޯރަމްގައި ކުންފުނިތަކާއި، ސްކޫލްތައް އަދި ޒުވާނުންގެ ތެރެއިން 37 ފަރާތެއް ބައިވެރިވެފައިވާ ކަމަށް އެޑިއުކޭޝަނުން ބުނެ އެވެ.
އޭގެ ތެރޭގައި މަޓީ، މަސީ، އެސްޓީއޯ، އެމްއޭސީއެލް އަދި އެމްޓީސީސީ އާއި ފޯސީޒަން ރިސޯޓް ފަދަ ރާއްޖޭގެ ބޮޑެތި ކުންފުނިތައް ހިމެނެ އެވެ.
މި ފޯރަމް ގެ މަގްސަދަކީ ފަންނީ ދާއިރާތަކަށް ޒުވާނުން އަހުލުވެރިކުރުވަން ޓިވެޓް އޮތޯރިޓީން ހިންގާ ތަފާތު ކޯސްތަކާއި ޕްރޮގްރާމަތަކުގައި އެކުގައި މަސައްކަތްކުރާ ކުންފުނިތަކާއި އެއްތަނަކުން ބައްދަލުކޮށް މަޝްވަރާކޮށް، ގުޅުން ބަދަހި ކުރުން ކަމަށް އެޑިއުކޭޝަން މިނިސްޓްރީން ބުނެ އެވެ.
