އަފްޣާނިސްތާނުގެ ނައިބު ރައީސަށް އަމާޒުކޮށް ދިން ބޮމުގެ ހަމަލާއިން އެމަނިކުފާނު ސަލާމަތްވެވަޑައިގެންފި

އަފްޣާނިސްތާނުގެ ނައިބު ރައީސް އަމްރުﷲ ސޯލިހަށް އަމާޒުކޮށް ދިން ބޮމުގެ ހަމަލާއަކުން އެމަނިކުފާނު ސަލާމަތްވެ ވަޑައިގެންފިއެވެ.

ބުދަ ދުވަހުގެ ހެނދުނުގެ ވަގުތެއްގައި ދިން މި ހަމަލާގައި ވަނީ ހަ މީހަކު މަރުވެ ބާރަ މީހުންނަށް އެކި ވަރުގެ އަނިޔާ ލިބިފައެވެ.

ތާލިބާނުން ވަނީ މި ހަމަލާ ދިނުމުގައި އެމީހުންގެ އަތެއް ނުވާކަ މަށް ބުނެފައެވެ. ހަމަލާ ދީފައި މިވަނީ އަފްޣާނިސްތާން ސަރުކާރާއި ތާލިބާނުންނާ ދެމެދުގައި ސުލްހައިގެ ވާހަކަތައް ގަތަރުގެ ވެރި ރަށް ދޯހާގައި ބޭއްވުމަށް ކުޑަތަން ވެފައިވަނިކޮށެވެ.

ހަމަލާއާ ގުޅިގެން ސޯލިހުގެ އޮފީހުން ބުނީ އަފްޣާނިސްތާންގެ ދުޝްމިނުން ސޯލިހަށް އަމާޒުކޮށް ދިން ހަމަލާ ނާކާމިޔާބު ވެފައިވާ ކަމަށެވެ. އަދި އެ ހަމަލާ އިން ގެއްލުމެއް ނުލިބި ސޯލިހު ސަލާމަތްވެ ވަޑައިގަންފައިވާ ކަމަށް ސޯލިހުގެ އޮފީހުން ބުނެފައިވެއެވެ.

ސޯލިހުގެ ސްޕޯކްސްމަން ރޮއިޓަރސް އާ ވާހަކަދައްކަމުން ވިދާޅުވީ ބޮމުގެ ހަމަލާ އަމާޒުވެފައިވަނީ ސޯލިހު ދަތުރު ކުރައްވަމުން ގެންދެވި ކޮންވޯއީ އަށް ކަމަށެވެ. އަދި ސޯލިހުގެ ބައެއް ބޮޑީގާޑުންނަށް އަނިޔާވެފައިވާ ކަމަށް ސްޕޯކްސްމަން ވިދާޅުވިއެވެ.

ހަމަލާދިންތާ މާގިނަ އިރުތަކެއްނުވަނީސް ސޯލިހު ވަނީ ސޯޝަލް މީޑިއާގެ ހުރިހާ ޕްލެޓްފޯމުތަކެއްގައި ވީޑިއޯ މެދުވެރި ކުރައްވާ އެމަނިކުފާނުގެ ހާލަތު ބަޔާން ކުރައްވާފައެވެ. އެގޮތުން މޫނުން ތަންކޮޅެއް ފިހިގެން ދިޔުމާއި އަތަށް ލިބުނު އަނިޔާގެ އިތުރުން އެހެން އެއްވެސް ގެއްލުމެއް ލިބިވަޑަނުގަންނަވާ ކަމަށް ސޯލިހު ވަނީ ވީޑިއޯގައި ވިދާޅުވެފައެވެ.

ތާލިބާންގެ ސްޕޯކްސްމަން ޒަބީހުﷲ މުޖާހިދު ކުރެއްވި ޓްވީޓެއްގައި ވިދާޅުވީ މި ހަމަލާގެ ފަހަތުގައި ތާލިބާންގެ އަތެއްނުވާ ކަމަށެވެ.

މިހާތަނަށް އައިއިރު އަފްޣާނިސްތާނުގެ އިސް އޮފިޝަލުން އަވަހާރަ ކޮށްލުމަށް މިފަދަ އެތައް ހަމަލާއެއް ވަނީ ދީފައެވެ. އެހެންނަމަވެސް އަދި މިހާތަނަށް މިއިން އެއްވެސް ހަމަލާއެއް ކާމިޔާބު ވެފައެއްނުވެއެވެ.

މި ހަމަލާ ބައިނަލްއަގްވާމީ އެކި ޖަމިއްޔާތަކުންނާއި ގައުމުތަކުން އަންނަނީ ކުށްވެރި ކުރަމުންނެވެ. އޭގެތެރޭގައި ޔޫރަޕިއަން ޔޫނިއަން އާއި ޕާކިސްތާން ހިމެނެއެވެ.

އަފްޣާނިސްތާނުގެ އިސް އޮފިޝަލުންނާއި ޑިޕްލޮމެޓިކުން ވަނީ މިފަހަކުން އަފްޣާނިސްތާނުގައި ދެމުން ގެންދާ ހަމަލާތަކުގެ ސަބަބުން އަފްޣާނިސްތާން ސަރުކާރާއި ތާލިބާނާ ދެމެދު ފެށުމަށް ތައްޔާރުވަމުންދާ ސުލްހައިގެ ވާހަކަތަކަށް އެކަމުގެ ހިޔަނި އެޅިގެންދާނެ ކަމަށް ވިދާޅުވެ ވާހަކަ ދައްކަވާފައެވެ.