ޖޭއެސްސީ އަށް ސީއެސްސީގެ ރައީސް ނާސިހު އައްޔަން ކުރައްވައިފި
ގާނޫނުއަސާސީ ބުނާގޮތުން ޖޭއެސްސީގައި ސީއެސްސީގެ ރައީސް ހިމެނިވަޑައިގަންނަވާ
ސީއެސްސީގެ މެމްބަރުކަމުގެ ލިޔުން ރައީސް ހަވާލުކޮށްދެއްވަނީ، މިއަދު ވަނީ ސީއެސްސީގެ ރައީސްގެ ހައިސިއްތުން ޖޭއެސްސީގެ މެމްބަރުކަމަށް މުހައްމަދު ނާސިހް އައްޔަން ކުރައްވާފައި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޖުޑީޝަލް ސަރވިސް ކޮމިޝަން (ޖޭއެސްސީ) ގެ މެންބަރުކަމުގެ މަޤާމަށް މ. ފަލްކަންގެ، މުޙައްމަދު ނާޞިޙް ޢައްޔަން ކުރައްވައިފި އެވެ.
ރައީސުލްޖުމްހޫރިއްޔާ، އެ މަޤާމަށް މުޙައްމަދު ނާޞިޙު ޢައްޔަން ކުރައްވާފައި ވަނީ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 158 ވަނަ މާއްދާގެ (ކ) އާއި، ޖުޑީޝަލް ސަރވިސް ކޮމިޝަނުގެ ޤާނޫނުގެ ގެ 3 ވަނަ މާއްދާގެ 7 ވަނަ ނަންބަރުގައި ބަޔާންކޮށްފައިވާ ގޮތުގެމަތިން، ސިވިލް ސަރވިސް ކޮމިޝަން (ސީއެސްސީ)ގެ ރައީސްގެ ހައިސިއްޔަތުން ނެވެ.
ޖުޑީޝަލް ސަރވިސް ކޮމިޝަންގެ މެންބަރު ކަމަށް މުޙައްމަދު ނާޞިޙް ޢައްޔަން ކުރެއްވުމުގެ ކުރިން، އެ ކޮމިޝަނުގެ މެންބަރުކަމުގެ ހުވައި، އެ މަނިކުފާނު ރައީސުލްޖުމްހޫރިއްޔާގެ ކުރިފުޅުމަތީގައި ކުރެއްވިއެވެ. އަންގާރަ ދުވަހުގެ މެންދުރު ރައީސުލްޖުމްހޫރިއްޔާގެ އޮފީހުގައި މިކަމަށްޓަކައި ބޭއްވެވި ޚާއްޞަ ރަސްމިއްޔާތުގައި އެ މަނިކުފާނަށް ހުވައި ލައިދެއްވީ އުއްތަމަ ފަނޑިޔާރު އަޙްމަދު މުޢުތަޞިމް ޢަދުނާނެވެ.
ޖުޑީޝަލް ސަރވިސް ކޮމިޝަނަކީ ޝަރުއީ ކޯޓުތަކާޢި ފަނޑިޔާރުގެ ސްލޫކީ މައްސަލަތައް ބެލުމަށް ގާނޫނުއަސާސީގެ ދަށުން އުފައްދާފައިވާ ކޮމިޝަނެކެވެ.
އެކޮމިޝަނުގައި ޖުމްލަ މެމްބަރުން ތިއްބަވައެވެ. އެއީ، ރައްޔިތުންގެ މަޖިލީހުގެ ރައީސްގެ ހައިސިއްޔަތުން ކުރީގެ ރައީސް މުހައްމަދު ނަޝީދު އާއި ރައީސުލްޖުމްހޫރިއްޔާގެ މެމްބަރު މަސްތޫރު ހުސްނީ އާއި، ރައްޔިތުންގެ މަޖިލީހުގެ މެމްބަރުންގެ ތެރެއިން މަޖިލީހުން ކަނޑައަޅާ މެމްބަރު ހިސާން ހުސައިން އާއި ސުޕްރީމް ކޯޓުގެ ފަނޑިޔާރުންގެ މަޖިލީހުން އާއިޝާ ޝުޖޫން މުހައްމަދު އާއި ހައިކޯޓުގެ ފަނޑިޔާރުންގެ ތެރެއިން އަލީ ސަމީރު އާއި ދަށު ކޯޓުތަކުގެ ފަނޑިޔާރުންގެ ތެރެއިން އަލީ ޝަރީފް އާއި އާއްމުންގެ ތެރެއިން މަޖިލީހުން ކަނޑައަޅާ މެމްބަރު އާމިނަތު އުއްމުކުލްޘޫމް އާއި ސިވިލް ސަރވިސް ކޮމިޝަނުގެ ރައީސް މުހައްމަދު ނާޞިހް އާއި އެޓަރނީ ޖެނެރަލް އިބްރާހީމް ރިފްއަތު އަދި ގާނޫނީ ވަކީލުންގެ ތެރެއިން ބަރ ކައުންސިލްގެ މެމްބަރު އަބްދުލް މާނިއު ހުސައިން އެވެ.
