ކ. މާލެ
|
8 ސެޕްޓެންބަރ 2020 | އަންގާރަ 01:02
ހޯމަ ދުވަހު ބާސާއިން ކުރިއަށްގެންދިޔަ ފަރިތަކުރުންތަކުގައި މެސީ ބައިވެރިވަނިކޮށް
ހޯމަ ދުވަހު ބާސާއިން ކުރިއަށްގެންދިޔަ ފަރިތަކުރުންތަކުގައި މެސީ ބައިވެރިވަނިކޮށް
ގެޓީ އިމޭޖަސް
މެސީ ފަރިތަކުރުންތަކަށް ނުކުތުން
ބާސާގެ ފަރިތަކުރުންތަކަށް މެސީ ނުކުމެއްޖެ
 
އަންނަ ސީޒަނުގައި ބާސާގައި މަޑުކުރަން މެސީ ނިންމީ އެ ކުލަބުގެ މެނޭޖުމަންޓުން އެއްބަސްވުމަށް ލުއި ދިނުމަށް ދެކޮޅު ހެދުމުން
 
ހޯމަ ދުވަހު ބާސާއިން ކުރިއަށްގެންދިޔަ ފަރިތަކުރުންތަކުގައި މެސީ ވަނީ ބައިވެރިވެފައި

ބާސެލޯނާގެ ކެޕްޓަން ލިއޮނެލް މެސީ އެޓީމުގެ ފަރިތަކުރުންތަކުގައި ބައިވެރިވާން ފަށައިފިއެވެ.

އައު ސީޒަނަށް ތައްޔާރުވުމަށް ބާސާއިން މިދިޔަ ހަފުތާގައި ޕްރީ-ސީޒަން ފެށި ނަމަވެސް، ޓްރާންސްފާގެ މައްސަލައިގައި މެސީ ބާސާގެ ފަރިތަކުރުންތަކަށް ނުކުމެފައެއް ނުވެއެވެ. އެކަމަކު ހޯމަ ދުވަހު ބާސާއިން ކުރިއަށްގެންދިޔަ ފަރިތަކުރުންތަކުގައި މެސީ ވަނީ ބައިވެރިވެފައެވެ.

މީގެ ކުރިން މެސީ ވަނީ ބާސާ ދޫކޮށްލަން ނިންމައި، އެކަން އެ ކުލަބުގެ މެނޭޖުމަންޓަށް އަންގާފައެވެ. ބާސާއާއެކު މެސީ ހަދާފައިވާ އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތްއިރު، މިހާރު އޮތް ގޮތުންނަމަ މި ޓްރާންސްފާ ބާޒާރުގައި މެސީ ގެންދަން ބޭނުންވާ ކުލަބަކުން، އެއްބަސްވުން އުވާލަން 700 މިލިޔަން ޔޫރޯ ދައްކަން ޖެހޭނެއެވެ. އެހެންކަމުން މެސީ ވަނީ އެއްބަސްވުން ބަދަލުކޮށް، މި ޓްރާންސްފާ ބާޒާރުގައި ހިލޭ އެ ކުލަބު ދޫކޮށް ދިޔުމުގެ ފުރުސަތު ތަނަވަސްކޮށްދިނުމަށް އެދެފައެވެ.

އެކަމަކު މެސީގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސް ނުވުމާ ގުޅިގެން، މެސީ ވަނީ އޭނާގެ ނިންމުން ބަދަލުކޮށް ކުރިއަށް އޮތް ސީޒަނުގައި ބާސާގައި މަޑުކުރުމަށް ނިންމާފައެވެ. ބާސާގައި މަޑުކުރަން ނިންމިކަން އިއުލާންކޮށް މެސީ ދިން އިންޓަވިއުއެއްގައި ބުނީ ބާސާ ދޫކޮށްލަން އޭނާ ބޭނުންވި ކަމަށާއި، އެކަމަކު އޭނާގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސްވެފައި ނުވުމާއެކު، ކޯޓަށް ގޮސްގެން ބާސާ ދޫކޮށްލާން މަސައްކަތްކުރަން ބޭނުންނުވާތީ، ކުލަބުގައި މަޑުކުރަން ނިންމީ ކަމަށެވެ. އަދި ބާސާ ގޮވައިގެން އޭނާ ދުވަހަކުވެސް ކޯޓަށް ނުދާނެ ކަމަށާއި، ބާސާ ދޫކޮށްލަން ބޭނުންވި ނަމަވެސް، ކުލަބު ދެކެ އޮންނަ ލޯބި ދުވަހަކުވެސް ކުޑަ ނުވާނެ ކަމަށް ވަނީ ބުނެފައެވެ.

އުމުރުން މިހާރު 33 އަހަރުގެ މެސީ އަންނަ ސީޒަނުގައި ބާސާގައި މަޑުކުރި ނަމަވެސް، އެއްބަސްވުން ހަމަވުމާއެކު އަންނަ ސީޒަން ނިމުމުން ހިލޭ ޓްރާންސްފާއެއްގެ ދަށުން އޭނާ ކުލަބު ދޫކޮށްލާނެ ކަމަށް ބެލެވެއެވެ.

ނެދަލެންޑްސްގެ ރޮނާލްޑް ކޫމަންގެ އިރުޝާދުގެ ދަށުން އަންނަ ސީޒަނަށް ބާސާއިން ތައްޔާރުވަމުން އަންނައިރު، ބާސާއިން ލީގުގައި ފުރަތަމަ މެޗެއް ކުޅޭނީ މި މަހުގެ 27 ވަނަ ދުވަހުއެވެ. އެ ދުވަހު ބާސާ ނުކުންނާނީ ވިޔަރެއާލާ ދެކޮޅަށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
100%
0%
0%
0%
0%
ކޮމެންޓް