ބާސެލޯނާގެ ކޯޗް ލުއިސް އެންރީކޭ އެޓީމަށް ކޯޗުކަން ކޮށްދިން ފަހު މެޗުގައި އެޓީމުން ސްޕެނިޝް ކަޕުގެ ޗެމްޕިއަންކަން ހޯދައިފި އެވެ.

ބާސާއިން ސްޕެނިޝް ކަޕުގެ ޗެމްޕިއަންކަން ހޯދީ ހޮނިހިރު ދުވަހުގެ ރޭ އަލަވޭސް އާއި ދެކޮޅަށް ކުޅުނު ފައިނަލް މެޗް ކާމިޔާބުކޮށްގެންނެވެ. ސަސްޕެންޝަނުގެ ސަބަބުން ލުއިސް ޝުއަރޭޒް އާއި ސާޖިއޯ ރޮބާޓޯ ނުލައި ކުޅުނު ބާސާއިން މެޗް ކާމިޔާބުކުރީ 3-1 ގެ ނަތީޖާއަކުންނެވެ.

މެޗުގައި ފުރަތަމަ ލަނޑު ޖަހާ ލީޑު ނަގާފައި ވަނީވެސް ބާސާއިންނެވެ. އެގޮތުން މި ލަނޑު މެޗުގެ 30 ވަނަ މިނެޓުގައި ކާމިޔާބުކޮށްދިނީ ލިއޮނަލް މެސީ އެވެ. ނަމަވެސް ލީޑުގައި ބާސާއަށް ކުޅެވޭވަރުވީ ކުޑަ ވަގުތުކޮޅަކުއެވެ. 33 ވަނަ މިނެޓުގައި ތިއޯ ހެނާންޑޭޒްގެ ލަނޑުން އަލަވޭސް ވަނީ ނަތީޖާ ހަމަހަމަ ކޮށްދައެވެ.  ނަމަވެސް ބާސާއިން ވަނީ ކުޅުން ވަރުގަދަކޮށް ހަމަލާތަށް އުފައްދާން ދައްޓާފައެވެ. އެގޮތުން

ފުރަތަމަ ހާފުގެ ފަހުކޮޅުގައި ބާސާއިން ވަނީ ކައިރިކައިރީގައި ދެ ލަނޑު ކާމިޔާބުކޮށް ލީޑު ފުޅާކޮށްފައެވެ. ބާސާއަށް ދެވަނަ ފަހަރަށް ލީޑު ނަގައިދިނީ ބްރެޒިލްގެ ފޯވާޑް ނޭމާއެވެ. ލީޑު ފުޅާކޮށްދިނީ ޕަކޯ އަލެސެއާ އެވެ.

ރޭގެ މެޗަށްފަހު ބާސާގެ ކޯޗްކަމުގެ މަގާމުން ވަކިވަމުން ލުއިސް އެންރީކޭ ބުނީ، ބާސާގައި ހޭދަކުރި ކާމިޔާބު ދިވަސްތަށް، ތައްޓަކާއެކު ނިންމާލެވުމުން އުފާކުރާ ކަމަށާއި، އަބަދުވެސް ބޭނުންވީ ސަޕޯޓަރުންނަށް އިފާވެރި ވަގުތެއްގައު ޓީމު ދޫކޮށްލުމަށް ކަމަށެވެ. މީގެ އިތުރުންވެސް އެންރީކޭ ބުނީ، ބާސާގައި ހޭދަކުރި ދުވަސްތަކުގައި އޭނާއަށް ލިބުނު އުތުރު އުފާވެރިކަމެއް އޮތް ކަމަށާއި، ލިއޮނަލް މެސީ އާއި މަސައްތަކް ކުރެވުން އެއީ އޭނާއަށް ލިބުނު އިތުރު އުފާވެރިކަމެއް ކަމަށެވެ.

ތިން ސީޒަނަށްފަހު ބާސާގެ ކޯޗުކަމުން އެންރީކޭ ވަކި ވާއިރު މިއީ އޭނާގެ އިރުޝާދުގެ ދަށުން ބާސާ ހޯދި 9 ވަނަ ތައްޓެވެ. އެޓީމުން ވަނީ ޖުމްލަ 29 ފަހަރު ސްޕެނިޝް ކަޕް ކާމިޔާބުކޮސްފައެވެ.

ބާސާގެ ކޯޗުކަމުގެ މަގާމު ހުސްވުމާއިއެކު ދެން އެމަގާމާއި ހަވާލުވާނެ ކަމަށް ބޮޑަށް ބެލެވެނީ އެތްލެޓިކް ބިލްބާއޯގެ ކުރީގެ ކޯޗް އާނަސްޓޯ ވަލްވޭޑޭ އެވެ. މީޑިއާ ރިޕޯޓްތަށް ބުނާގޮތުން ދެދުވަގެއްގެ ތެރޭގައި ބާސާއިން ރަސްމީކޮށް އިއުލާން ކުރާނެ އެވެ.