ރާއްޖެއަށް ދިފާއީ ފުރަތަމަ ރޮނގު މިއަޅާލެވޭނީ ޑިފެންސް ޑިޕްލޮމަސީގެ ތެރެއިން: ޝަމާލް
7 ސެޕްޓެމްބަރު 2020 | ހޯމަ 10:07މި ސަރަހައްދުގެ ގިނަ ގައުމުތަކުގެ އަމާޒަކީ މި ކަނޑަކީ ރައްކާތެރިތަނަކަށް ހެދުން
ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުﷲ ޝަމާލް
ރާއްޖެއަށް ދިފާއީ ފުރަތަމަ ރޮނގު މި އަޅާލެވެނީ ޑިފެންސް ޑިޕްލޮމަސީގެ ތެރެއިން ކަމަށް ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
އެމްއެންޑީއެފް އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝަމާލް ވިދާޅުވީ، ރާއްޖެއާއި ގާތް ގުޅުމެއް އޮންނަ ގައުމުތަކުގެ އަސްކަރިއްޔާ އާއި އެކު ގާތް ގުޅުމެއް ބޭއްވުމަކީ އެންމެ މުހިންމު އެއް ކަންތައް ކަމަށެވެ.
ޝަމާލް ވަނީ އިންޑިއާ ކަނޑުގެ ސަރަހައްދަކީ ވަރަށް ހަލަބޮލި ސަރަހައްދެއް ކަމަށާއި މިކަނޑުގެ ސަރަހައްދުގައި އެކި ކަހަލަ އޮއިވަރުތައް ދެމެމުންދާކަމަށް ފާހަގޮށް މިޒަމާނަކީ ޓްރާންސް ނެޝަނަލް ތްރެޓްސްތައް އާންމުވެފައިވާ ޒަމާނެއް ކަމަށް ވިދާޅުވެފައެވެ. އެގޮތުން ކަނޑުފޭރުމުގެ ނުރައްކަލާއި ޓެރަރިޒަމްގެ ނުރައްކަލާއި އިލިސިޓް ޓްރެފިކިންގެ ނުރައްކާވެސް ވަރަށް ބޮޑު ކަމަށް ޝަމާލް ފާހަގަކުރެއްވިއެވެ.
އިންޑިއާ ކަނޑުގެ ސަރަހައްދުގައި މިފަދަ އެތައް ނުކިއްސަރު ކަމެއް ހިނގަމުން ދާއިރު، މި ސަރަހައްދުގެ ގިނަ ގައުމުތަކުގެ އަމާޒަކީ މި ކަނޑަކީ ރައްކާތެރިތަނަކަށް ހެދުން ކަމަށާއި މިކަމުގައި ގުޅިގެން މަސައްކަތްކުރުން ވަރަށް މުހިންމު ކަމަށް ޝަމާލް ވިދާޅުވިއެވެ. އަދި މިފަދަ ނުރައްކާތަކަކީ ހުރިހާ ގައުމަކަށްވެސް ހުރި ނުރައްކާތަކެއް ކަމަށް ވެސް ވިދާޅުވިއެވެ.
ރާއްޖެ އަކީ މުޅިން އެކަހެރިވެފަ އޮތް ގައުމެއްގެ ގޮތުގައި އޮތުމުގެ ބަދަލުގައި ގައުމުތަކާއި އެކު ގުޅިގެން މަސައްކަތްކުރުމުގެ ވިސްނުން ގެންގުޅޭކަމަށް ޝަމާލް ފާހަގަކުރެއްވިއެވެ. އެގޮތުން، ގުދުރަތީ ގޮތުން އެންމެ ކައިރީގައި އަދި އެންމެ ބޮޑު ގައުމެއްގެ ގޮތުގައި މިއޮތީ އިންޑިއާ ކަމަށާއި އިންޑިއާ އާއި އެކު އޮންނަ ޒަމާންވީ ގުޅުން ފާހަގަކޮށް ޝަމާލް ވަނީ ރާއްޖެ އަށް ދިމާވާ ބޮޑެތި ދަތިތަކުގައި އާއި ހާދިސާތަކުގައި އިންޑިއާގެ ފަރާތުން ގިނަ އެހީތަކެއް ލިބޭކަން ފާހަގަކޮށްފައެވެ. ދިވެހި ސިފައިންގެ ތަމްރީން ޕްރޮގްރާމްތައް އިންޑިއާގެ އިތުރުން، ޗައިނާ، ޕާކިސްތާނު އަދި އެމެރިކާ އާއި ސައުދި އަރަބިއާ އާއި އެކު ވެސް ކުރިއަށް ގެންދާ ކަމަށް ޝަމާލް ފާހަގަކުރެއްވިއެވެ.
މީގެ އިތުރުން، އިންޑިއާ ކަނޑުގައި ހިނގާ ނުރައްކާތެރި ކަންތައްތަކުން ދިވެހި މަސް ކަނޑުތައް ހިމާޔަތްކުރުމަށް އެމްއެންޑީއެފް އިން ފާއިތުވި 12 އަހަރު ކުރަމުން ދިޔަ މަސައްކަތުގައި އިންޑިއާގެ އެހީ އާއި އެކު ރާއްޖޭގެ ސާފަސް އަދި އޭރިއަލް ސަވެއިލަންސްގެ މަސައްކަތްވެސް ކުރެވިފައިވާ ކަމަށް ޝަމާލް ފާހަގަކުރެއްވިއެވެ.
ޝަމާލް ވަނީ މިއަދު މަސައްކަތް ކުރަމުން ގެންދާ މޮޑަލް އަކީ އެހެން ގައުމުތަކާއި ގުޅިގެން، ރާއްޖޭގެ ފަރާތުން އެގައުމުތަކަށް ލިބޭ ރައްކާތެރި ކަމާއި އެހެން ގައުމުތަކުން ރާއްޖެއަށް ލިބޭ ރައްކާތެރިކަން ކަށަވަރުކޮށް މަސައްކަތްކުރުން ކަމަށްވެސް ވިދާޅުވެފައެވެ.
