ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ރާއްޖޭގައި އިއުލާނު ކޮށްފައިވާ އާންމު ސިއްހީ ކުއްލި ނުރައްކަލުގެ ހާލަތު ހަތް ވަނަ ފަހަރަށް އިތުރުކޮށްފިއެވެ.

ހެލްތް މިނިސްޓްރީއާ ވަގުތީ ގޮތުން ހަވާލުވެވަޑައިގެން ހުންނެވި މުހައްމަދު އަސްލަމް އާދިއްތަ ދުވަހު ނެރުއްވި ބަޔާނެއްގައި ވިދާޅުވީ، ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުުރު ކޮށްފައިވަނީ ރާއްޖޭގައި ކޮވިޑް-19 ބަލި ފެތުރުމުގެ ނުރައްކާ އަދިވެސް އޮތުމުންނެވެ. އެހެން ކަމުން ސިއްހީ ކުއްލި ނުރައްކަލުގެ ހާލަތު އޮކްޓޫބަރު މަހުގެ ހަވަނަ ދުވަހާ ހަަމަޔަށް އިތުރު ކޮށްފައިވާ ކަމަށެވެ.

އަދި އެ ނުރައްކާ ކުޑަކޮށް، އާންމު ރައްޔިތުންގެ ސިއްހަތާއި ރައްކާތެރިކަން ކަށަވަރު ކުރުމަށްޓަކައި ހާއްސަ ފިޔަވަޅުތަކެއް އަޅަން ޖެހޭ ކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ލަފާދެއްވާފައިވާތީ ކަމަށް ވެސް މިނިސްޓަރު އަމީން ސޮއި ކުރައްވާ ނެރުނު ބަޔާނުގައި ވިދާޅުވިއެވެ.

ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާނު ކޮށްފައިވަނީ، ކޮވިޑް-19ގެ ކޭސްތަކެއް ރާއްޖެއިން ފެނުމާއި ގުޅިން 12 މާރޗު ގައެވެ. އޭގެ ފަހުން މިއީ ސިއްހީ ކުއްލި ނުރައްކަލުގެ ހާލަތު އިތުރު ކުރި ހަތް ވަނަ ފަހަރެވެ. ސިއްހީ ކުއްލި ނުރައްކަލުގެ ހާލަތުގެ ދަށުން މައިމޫނާ އަބޫބަކުރް އަށް ބޮޑެތި ބާރުތަކެއް ލިބެއެވެ.

ސިއްހީ ކުއްލި ނުރައްކަލުގެ ހާލަތު އިތުރު ކޮށްފައިވާއިރު ކޮވިޑް-19 ގެ ކޭސްތަކުގެ އަދަދު އަދިވެސް އުޅެނީ މަތީގައެވެ. މިދިޔަ އޮގަސްޓު މަހުން ފެށިގެން މި މަހުގެ މިހާތަނާއި ހަމަޔަށް އާއްމުކޮށް ދުވާލެއްގެ މައްޗަށް 100ށް ވުރެ ގިނަ ކޮވިޑުގެ ކޭސްތައް ދަނީ ރިޕޯޓް ކުރެވެމުންނެވެ.

ނަމަވެސް ބައެއް ދުވަސްތަކުގައި ކޭސްތަކުގެ އަދަދު 100 އިން ދަށަށް ދެއެވެ. މީގެ ކުރިން ރަށްރަށުން ކޭސްތައް ރިޕޯޓް ކުރެވޭ އަދަދު ދަށެވެ. އެކަމަކު މިހާރު އެ އަދަދުވެސް ވަނީ މައްޗަށް ޖެހިލާފައެވެ.