ކ. މާލެ
|
6 ސެޕްޓެންބަރ 2020 | އާދީއްތަ 17:16
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލިސް
ރައްޔިތުންގެ މަޖިލީހުގެ ދެ ވަނަ ދައުރު
ދެ ވަނަ ދައުރުގައި 68 އިންސައްތަ މަސައްކަތް ފުރިހަމަ ކުރުމަށްފަހު މަޖިލިސް ޗުއްޓީ އަށް
 
ޖަލްސާތައް ހުއްޓުމެއްނެތި ކުރިޔަށް ގެންދިޔުމުގައި މަޖިލީހުގެ އިދާރާގެ މުވައްޒަފުންގެ މަސައްކަތްތައް ފާހަގަކުރެއްވި
 
ކޮމިޝަންތަކަށް މެމްބަރުން އައްޔަނުކޮށްފައިވޭ
 
ޖިނާއީ އިޖުރާތުގެ ޤާނޫނަށް މުހިންމު އިސްލާހުތަކެއް ގެނެވުނު ކަމަށާއި ފެނާއި ނަރުދަމާގެ ބިލް ފާސްކޮށްފައިވޭ

ރައްޔިތުންގެ މަޖިލީހުގެ މިއަހަރުގެ ދެ ވަނަ ދައުރުގެ ޖަލްސާތައް ފަށާފައިވަނީ ޖޫން މަހުގެ 1 ވަނަ ދުވަހު އެވެ. ސެޕްޓެމްބަރ މަހުގެ 6 ވަނަ ދުވަހު ދައުރުގެ ފަހު ޖަލްސާ ބާއްވާފައިވާއިރު ޖުމްލަ 34 ޖަލްސާ އެއް މި ދައުރުގައި ބާއްވާފައިވެއެވެ. މަޖިލީހުގެ ގަވާއިދު ބުނާ ގޮތުން ދެ ވަނަ ދައުރުގެ ޖަލްސާތައް ކުރިޔަށް ދާނީ ޖޫން މަހުން ފެށިގެން އޮގަސްޓް މަހުގެ ނިޔަލަށެވެ. ނަމަވެސް ޓޫރިޒަމް މިނިސްޓަރ ޑރ އަބްދުﷲ މައުސޫމަށް ރުހުން ދިނުމުގެ މައްސަލަ ނުނިންމާ ޗުއްޓީއަށް ނުދާންވެގެން ދައުރު ދިގުދައްމާލުމަށް މަޖިލީހުން ފާސްކުރިއެވެ. އަދި ސެޕްޓެމްބަރ މަހުގެ 7 ވަނަ ދުވަހާ ހަމައަށް ދައުރު ދިގުދައްމާލުމަށް ފާސްކޮށް ސެޕްޓެމްބަރ މަހުގެ 6 ވަނަ ދުވަހު ދައުރުގެ ފަހު ޖަލްސާ ބާއްވާ ޑރ މައުސޫމަށް ރުހުން ދިނުމަށްފަހު މިއަހަރު ފުރަތަމަ ފަހަރަށް މަޖިލިސް މިވަނީ ޗުއްޓީއަށް ގޮސްފައެވެ.

މިއަހަރުގެ ފުރަތަމަ ދައުރުގައި މަޖިލިސް ޗުއްޓީއަށް ގޮސްފައެއް ނުވެއެވެ. މެއި މަހު މަސައްކަތް ކުރުމަށްފަހު ޖޫން މަހު ދެވަނަ ދައުރުގެ ޖަލްސާތައް ފަށާ މިއަދާ ހަމައިން މިދައުރު ނިންމާލިއިރު ކުރީ ދައުރާއެކު މިދައުރަށް އައި މަސައްކަތްތަކާއެކު 68 އިންސައްތަ މަސައްކަތް މި ދައުރުގައި ނިންމާފައިވާ ކަމަށް މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރ އީވާ އަބްދުﷲ ވިދާޅުވިއެވެ. އާދިއްތަ ދުވަހު ބޭއްވި މި ދައުރުގެ ފަހު ޖަލްސާ ނިންމާލައްވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އީވާ ވަނީ މިދައުރުގައި މަޖިލީހަށް ނިންމުނު މަސައްކަތްތަކުގެ ޚުލާސާ އެއް ދެއްވާފައެވެ.

ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ދެވަނަ ދައުރުގެ ފަހު ޖަލްސާގައި ވާހަކަދައްކަވަނީ

ދެ ވަނަ ދައުރުގައި ނިންމުނު މަސައްކަތްތައް އަދަދުތަކުން

21 ބިލް

9 ގަރާރު

ސަރުކާރުން ހުށަހަޅާފައިވާ 18 މައްސަލަ

ރިޔާސަތުން ހުށަހަޅާފައިވާ 11 މައްސަލަ

16 ކުއްލި މައްސަލަ

މެމްބަރުން ހުށަހަޅުއްވާފައިވާ 3 މައސަލަ

29 އެހެނިހެން މައްސަލަ

ވަޒީރުންނާއި 30 ސުވާލު

އީވާ ވިދާޅުވީ މިދައުރުގައި ރައްޔިތުންނާއި ގުޅުންހުރި މުހިންމު ބިލްތަކެއް މަޖިލީހަށް ނިންމާލެވިފައިވާ ކަމަށެވެ. އެގޮތުން ޖިނާއީ އިޖުރާތުގެ ޤާނޫނަށް މުހިންމު އިސްލާހުތަކެއް ގެނެވުނު ކަމަށާއި ފެނާއި ނަރުދަމާގެ ބިލް ފާސް ކުރެވި ދިވެހިރާއްޖޭގެ ޤާނޫނީ ފަންނުގެ ބިލް ފާސް ކުރެވުނުކަން އީވާ ފާހަގަކުރެއްވިއެވެ.

ފާސްކުރެވުނު ބިލްތަކުގެ ތެރެއިން މުހިންމު މަސައްކަތްތަކެއް ކުރެވުނު، ޖިނާއީ އިޖުރާތުގެ ޤާނޫނަށް މުހިންމު އިސްލާހުތަކެއް ގެނެވުނު، ފެނާއި ނަރުދަމާގެ ބިލް ފާސްކުރެވުނު ދިވެހިރާއްޖޭގެ ޤާނޫނީ ފަންނުގެ ބިލް ފާސްކުރެވުނު ،އއެއްގަމު ދަތުރުފަތުރުގެ ޤާނޫނަށް އިސްލާހު ގެނެވުނު އަދި ރާއްޖޭގައި ވިޔަފާރީގެ ދާއިރާގައި ވާދަވެރިން އުފައްދާ ދެމެހެއްޓުމުގެ ބިލް ފާސްކުރެވުނު، ސަރުކާރުގެ ފަރާތުން ހުޅުދޫ ދާއިރާގެ މެމްބަރ އިލްޔާސް ލަބީބު ހުށަހަޅުއްވާ ދިވެހިރާއްޖޭގެ ވަޒީފާއާ ބެހޭ ޤާނޫނަށް މުހިންމު އިސްލާހުތަކެއް ގެނެސް ފާސްކުރެވުނު. އަދި ފޯއްމުލަކު މެދުދާއިރާގެ މެމްބަރ ހުސައިން މުހައްމަދު ދީދީ ހުށަހަޅުއްވާ އާންމު ސިއްހަތު ކުއްލި ނުރައްކަލުގެ ބިލް 2020 ފާސްކުރެވުނު
މަޖިލީހުގެ ނައިބު ރައީސް އީވާ އަބްދުﷲ

މީގެއިތުރުން ކޮމިޝަންތަކަށް މެމްބަރުން އައްޔަނު ކުރުމާއި މުހިންމު މުއާހަދާތަކެއްގައި ބައިވެރިވުމަށް މަޖިލީހުން ރުހުން ދީފައިވާ ކަމަށް އީވާ ވިދާޅުވިއެވެ.

ބްރޯޑްކާސްޓިންގ ކޮމިޝަނަށް މެމްބަރުން އައްޔަނުކުރެވުނު ، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ ދަށުން ރާއްޖޭގައި އަލަށް ޗިލްޑްރަންސް އޮމްބަޑްސްޕާސަންގެ މަގާމަށް ރައްޔިތުންގެ މަޖިލީހުން މީހަކު އައްޔަނުކުރެވުނު. ޓެކްސް އެޕީލް ޓްރައިބިޔުނަލް އަށް އައްޔަނުކުރެވު، ރާއްޖޭގެ ޤާނޫނު އަސާސީގެ 93 ވަނަ މާއްދާގެ ދަށުން އިންޓަރނޭޝަނަލް ކޮންވެންޝަން ފޯރދަ ޕްރޮޓެކްޝަން އޮފް އޯލް ޕާސަން ފްރޮމް އެންފޯސް ޑިސަޕިއަރަންސަށް ރައްޔިތުންގެ މަޖިލީހުން ރުހުންދިން. އޭގެއިތުރުން އޮޕްޝަނަލް ޕްރޮޓޮކޯލް ޓު ދަ އިންޓަރނޭޝަނަލް ކޮންވެންޝަން އޮން އޮކޮނިމިކް ސޯޝަލް އެންޑް ކަލްޗަރަލް ރައިޓްސް އަށް މަޖިލީހުން ރުހުންދިން. ހިޔުމަން ރައިޓްސް ކޮމިޝަނަށް މެމްބަރުން އައްޔަނުކުރެވުނު. ސްޕްރީމް ކޯޓަށް ފަނޑިޔާރުން އައްޔަނުކުރެވުނު ، ސިވިލް ސަރވިސް ކޮމިޝަނަށް މެމްބަރުން އައްޔަނުކުރެވުނު
މަޖިލީހުގެ ނައިބު ރައީސް އީވާ އަބްދުﷲ

މީގެއިތުރުން ކޮވިޑް 19 އާ ގުޅިގެން ސަރުކާރުން ކުރަމުންދާ މަސައްކަތަށް 17 ކޮމިޓީއަކުން އެކަންކަން ދިރާސާކޮށް ރައީސުލްޖުމްހޫރިއްޔާ އަށާއި ސަރުކާރަށް ލަފާ އަރުވާފައިވާ ކަން އީވާ ފާހަގަކުރެއްވިއެވެ. މީގެއިތުރުން ކޮވިޑް-19 ގެ ބަލިމަޑުކަމުގައި ދުނިޔޭގެ ޤާނޫނު ހަދާ މަޖިލީސްތައް ބަންދުކޮށް މަސައްކަތްތައް ހުއްޓުމަކަށް އައި ނަމަވެސް ރާއްޖޭގެ ރައްޔިތުންގެ މަޖިލީހުން އެއްވެސް ދުވަހެއް ނަގާނުލާ އޮންލައިންކޮށް ޖަލްސާތައް ކުރިޔަށް ގެންގޮސްފައިވާކަން އީވާ ފާހަގަކުރެއްވިއެވެ. ދުނިޔޭގައިވެސް ފުރަތަމަ ފަހަރަށް އޮންލައިންކޮށް ޤާނޫނު ހަދާ މަޖިލީހެއްގެ ޖަލްސާތައް ބޭއްވި މަޖިލީހަކަށް ރާއްޖޭގެ ރައްޔިތުންގެ މަޖިލިސް ވާއިރު އެކަން އިންޓަރނޭޝަނަލް ޕާލަމަންޓްރީ ޔޫނިއަނުން ފާހަގަކޮށް ރާއްޖޭގެ މަޖިލިސް ނަމޫނާ ދައްކާފައިވާ ކަމަށް އީވާ ވިދާޅުވި އެވެ.

އަދި މަޖިލީހުގެ ޖަލްސާތައް ހުއްޓުމެއް ނެތި ކުރިޔަށް ގެންދިޔުމުގައި މަޖިލީހުގެ އިދާރާގެ މުވައްޒަފުންގެ މަސައްކަތްތައް ފާހަގަކުރައްވާ އީވާ ވަނީ މުވައްޒަފުންނަށް ޝުކުރު އަދާ ކުރައްވާފައެވެ.

މެމްބަރުންނަށް އެނގިވަޑައިގަންނަވާނެ ކޮވިޑް-19 ގެ ހާލަތުގައި އެންމެ ދުވަހެއްގެ ބްރޭކެއްވެސް ރައްޔިތުންގެ މަޖިލީހުން ނުނަގާ. އަޅުގަނޑުމެންނަށް މެމްބަރުންނަށް އެހާ ފުރިހަމައަށް މެދުކެނޑިމެއްނެތި ކުރިޔަށް ގެންދެވުނީ ރައްޔިތުންގެ މަޖިލީހުގެ މުވައްޒަފުން ހީވާގި ކަމާއެކީގައި އެމަސައްކަތްކޮށްދެއްވަން ތިއްބެވީތީ. އެހެންވީމާ އަޅުގަނޑު ވަރަށް ބޮޑަށް މެމްބަރުންގެ ނަމުގައި ސްޓާފުންނަށް ޝުކުރުދަންނަވަން.
މަޖިލީހުގެ ނައިބު ރައީސް އީވާ އަބްދުﷲ
މަޖިލީހުގައި މަސައްކަތްކުރާ ބައެއް މުވައްޒަފުން އިދާރީ މޭޒުގައި

ދެ ވަނަ ދައުރުގެ ޖަލްސާތައް ނިންމާލުމަށް ފަހު ޗުއްޓީއަށް ގޮސްފައިވާއިރު ދެން ރައްޔިތުންގެ މަޖިލީހުގެ ޖަލްސާތައް ފަށާނީ އަންނަ އޮކްޓޯބަރ މަހު އެވެ. މިއަހަރުގެ ތިން ވަނަ ދައުރުގެ ޖަލްސާތައް އޮކްޓޯބަރ އަދި ނޮވެމްބަރ މަހު ކުރިޔަށްދާނެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ސިމާހާ ނަސީމް
0%
0%
0%
0%
0%
0%
ކޮމެންޓް