ޕީއެންސީގެ ނައިބު ރައީސް ސައީދު ކުއްލި ގޮތަކަށް ޗައިނާ އަށް
ސައީދަކީ ޗައިނާ އިން އަގުބޮޑު ލޯނުތައް ނެގުމުގައި އިސްދައުރެއް އަދާކުރި ފަރާތެއް
ޕީއެންސީގެ ނައިބް ރައީސް ސައީދު ރައްޔިތުންގެ މަޖިލީހުގެ ކޮމިޓީއެއްގައި
އިދިކޮޅު ޕީޕަލް ނެޝަނަލް ކޮންގްރެސް (ޕީއެންސީ) ގެ ނައިބު ރައީސް މުހައްމަދު ސައީދު ކުއްލި ގޮތަކަށް ޗައިނާ އަށް ފުރާވަޑައިގެންފި ކަމަށް ވަރަށް އިތުބާރު ހުރި ގޮތެއްގައި ރާއްޖެއެމްވީ އަށް މައުލޫމާތު ލިބިއްޖެއެވެ.
ރާއްޖެ.އެމްވީ އަށް މައުލޫމާތު ލިބިފައިވާ ގޮތުގައި ރައްޔިތުންގެ މަޖިލީހުގެ މާވަށު ދާއިރާގެ މެމްބަރުކަން ވެސް ކުރައްވާ ސައީދު ޗައިނާ އަށް ފުރާވަޑައިގެންނެވީ ހުކުރު ދުވަހުގެ ރޭ ދުބާއި މަގުންނެވެ. ނަމަވެސް ކޮވިޑް-19 ގެ ހާލާތާ ގުޅިގެން އެކި ގައުމުތަކުގައި ގިނަ ފިޔަވަޅުތަކެއް އަޅައި، ޗައިނާގެ ފަތުރުވެރިން ރާއްޖެ އައުން މަނާކޮށްފައިވާ މި ދަނޑިވަޅުގައި ސައީދު ޗައިނާއަށް މިހާ ފަސޭހައިން ދަތުރު ކުރެއްވޭ ގޮތް ވުމުން ގިނަ ސުވާލުތަކެއް ވަނީ އުފެދިފައެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި އިކޮނޮމިކް މިނިސްޓަރު ކަމުގެ މަގާމު އަދާކުރެއްވި ސައީދު އަކީ ޗައިނާއާ ވަރަށް ގާތް ގުޅުމެއް ބާއްވަމުން ގެންދަވާ ބޭފުޅެކެވެ. އަދި ޗައިނާއިން ބޮޑެތި އިންޓަރެސްޓް ރޭޓުގައި ލޯނުތައް ރާއްޖޭގެ ނަމުގައި ނެގުމުގައި ސައީދުވަނީ މުހިންމު ދައުރެއް އަދާކުރައްވާފައެވެ.
ސައީދު ޗައިނާ އަށް ވަޑައިގެންނެވި ދަނޑިވަޅަކީ އިންޑިއާ އާ މެދު ދިވެހިންގެ ހިތްތަކުގައި ނަފްރަތު އުފައްދަން ޕީޕީއެމް އާއި ޕީއެންސީ އިން ވަރަށް ބޮޑަށް އަޑު އުފުލަމުންދާ ދަނޑިވަޅެކެވެ. އިންޑިއާ ސިފައިން ރާއްޖޭގައި ބައިތިއްބަން ސަރުކާރުން މަސައްކަތް ކުރަނީ ކަމަށް ބުނެ އިދިކޮޅުން ދަނީ އަޑު އުފުލަމުންނެވެ. ނަމަވެސް ސަރުކާރުން ވަނީ އެވާހަކަތައް ދޮގުކޮށްފައެވެ.
ސައީދުގެ ދަތުރުފުޅާ ބެހޭ ގޮތުން ރާއްޖެއެމްވީއަށް މައުލޫމާތު ދިން ފަރާތުން ބުނެފައިވަނީ، އޭނާގެ މި ދަތުރުފުޅުގެ މަގްސަދަކީ ސަރުކާރާ ދެކޮޅަށް ހިންގާ ހަރަކާތްތަކަށް ފައިސާ ހޯދުން ކަމަށް ގަބޫލު ކުރެވޭ ކަމުގައެވެ.
