ފެނަކައިގެ އެއްވެސް މުވައްޒަފަކު ސިޔާސީ ކަމެއްގައި ވަޒީފާއިން ވަކި ނުކުރާނެ: އެމްޑީ

ރައީސް އިބްރާހިމް މުހައްމަދު ސޯލިހުއާ ގުޅުވައިގެން ޓްވީޓެއްކުރި ކަމަށް ބުނެ ފެނަކަ ކޯޕަރޭޝަން ލިމިޓެޑްގެ މުވައްޒަފަކު ވަޒީފާއިން ވަކިކުރިކަމަށް ދެކެވޭ ވާހަކަތައް އެ ކުންފުނިން ދޮގުކޮށްފިއެވެ.

އޮންލައިން މީޑިއާތަކުގައި ރިޕޯޓްކޮށްފައިވާ ގޮތުން، ފެނަކަ ކުންފުނީގެ ލޮޖިސްޓިކް ޑިޕާޓްމެންޓުގައި މަސައްކަތްކުރާ އަހުމަދު ރަޝީދު ވަޒީފާއިން ވަކި ކޮށްފައިވަނީ ރައީސް ސޯލިހު ކީރިތި ކުރެއްވި ކަމަށް ބުނެ ކުރި ޓްވީޓަކާއި ގުޅިގެންނެވެ. އަދި އޭނާ ވަޒީފާއިން ވަކިކުރީ ސީދާ ރައީސް އޮފީހުން އަންގައިގެން ކަމަށްވެސް ރިޕޯޓްކޮށްފައިވެއެވެ.

އެކަމާއި ގުޅޭ ގޮތުން ރާއްޖެ.އެމްވީއާ ވާހަކަ ދައްކަވަމުން ފެނަކަ ކުންފުނީގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވީ، އެ މުވައްޒަފު ވަޒީފާއިން ވަކިކޮށްފައިވަނީ ސިޔާސީ ސަބަބުތަކަށްޓަކައި ކަމަށް ބުނާ ވާހަކަ އަކީ ސީދާ ދޮގެއް ކަމަށެވެ. ސައީދު ވިދާޅުވި ގޮތުގައި ސިޔާސީ ނުފޫޒުން އެއްވެސް މުވައްޒަފަކު އެ ކުންފުނީގެ ވަޒީފާއިން ވައްކެއް ނުކުރާނެއެވެ. ފެނަކަ އެމްޑީ ވިދާޅުވީ، އެ މުވައްޒަފަކީ ތިން މަސް ދުވަހުގެ ކޮންޓްރެކްޓެއްގައި ކުންފުނީގައި މަސައްކަތްކުރަމުން އައި މުވައްޒަފެއް ކަމަށާއި، ކޮންޓްރެކްޓްގެ މުއްދަތު ހަމަވުމުން އިތުރަށް އައު ކުރަން ބޭނުންނުވާތީ އެކަން އޭނާ އަށް އަންގާފައިވާ ކަމަށެވެ. މައުލޫމާތު ލިބިފައިވާ ގޮތުން ކޮންޓްރެކްޓް އައުކުރަން ކުންފުނިން ބޭނުންނުވީ އަހުލާގީ ސަބަބުތަކަށްޓަކައެވެ.

ރައީސް އާއި ރައްޔިތުންގެ މަޖިލީހަށް ފާޑުކިޔައިގެން ސަރުކާރުގެ ކުންފުނިތަކުގެ މުވައްޒަފުން ވަޒީފާއިން ވަކިކުރާ ކަމުގެ އަޑުތައް ދޭތެރެދޭތެރެއިން ފެތުރެއެވެ. އެއިން ކޮންމެ ފަހަރަކުވެސް އެ ކުންފުނިތަކުން ވަނީ އެ ވާހަކަތައް ދޮގުކޮށްފައެވެ.