ކުޅުދުއްފުށި ހޮސްޕިޓަލުގައި މިސަރުކާރު އައިއިރު ތިބީ 18 ޑޮކްޓަރުން މިއަދު މިވަނީ 45 އަށް އިތުރުކުރެވިފައި
ކޮވިޑް-19 ގެ ހާލަތު އައުމާ ހަމައަށް ފެންވަރު ރަނގަޅު ޑޮކްޓަރުން ހޯދުމަށް ގިނަ މަސައްކަތް ކުރި
ރައީސް ޞާލިހު ކުޅުދުއްފުށި ރީޖަނަލް ހޮސްޕިޓަލް ބައްލަވާ ލައްވާއިރު އަރިހުގައި ހޮސްޕިޓަލްގެ މެނޭޖަރ އަހުމަދު
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ސަރުކާރާ ހަވާލުވެވަޑައިގެންނެވިއިރު، ކުޅުދުއްފުށި ރިޖަނަލް ހޮސްޕިޓަލުގައި ތިއްބެވީ 18 ޑޮކްޓަރުން ކަމަށާއި ނަމަވެސް މިހާރު އެއަދަދު 45 އަށް އިތުރު ކުރެވިފައިވާ ކަމަށް ކުޅުދުއްފުށި ރީޖަނަލް ހޮސްޕިޓަލުން ބުނެފި އެވެ.
ކުޅުދުއްފުށި ރީޖަނަލް ހޮސްޕިޓަލްގެ މެނޭޖަރ އޮފް ހެލްތް ސަރވިސަސް އަހުމަދު ދާއޫދާ "ރާއްޖެއެމްވީ"އަށް ވިދާޅުވީ، ކޮވިޑް-19 ގެ ހާލަތު އައުމާއި ހަމައަށް ފެންވަރު ރަނގަޅު ޑޮކްޓަރުން ހޯދުމަށް ގިނަ މަސައްކަތްތަކެއް ކުރެވި 45 ވަރަކަށް ޑޮކްޓަރުންނަށް އަަދަދު އިތުރުކުރެވި ހިދުމަތް ދެވޭ މީހުންގެ އަދަދުވެސް އިތުުރު ވެގެން ދިޔަކަމަށެވެ.
އަހުމަދު ވިދާޅުވީ، ކޮވިޑް-19 އާ ގުޅިގެން ޑޮކްޓަރުންނާއި ނަރުހުން ހޯދުމުގައި ދަތިކަތެއް އެބަހުރި ކަމަށާއި، ސިއްހީ ނިޒާމު ހަރުދަނާ ކުރުމަށްވެސް ގޮންޖެހުންތަކެއް ހުރި ނަމަވެސް ކޮވިޑް-19ގެ މިހާލަތުގައި ހިދުމަތް ދެވޭނެ އެންމެ ރަނގަޅު ފެންވަރުގައި ހިދުމަތް ދެވެމުންދާތީ އުފާކުރައްވާ ކަމަށެވެ.
އަހުމަދު ވިދާޅުވީ، އެމްއާރުއައި އަދި ބޭހުގެ ކަންތައްތައް ފަދަ ރަނގަޅު ކުރަންޖެހޭ ގިނަކަންކަން ހުރިއިރު މި ސަރުކާރު އައި ފަހުން ސްޕީޗް ތެރަޕީއާއި ސީޓީ ސްކޭންގެ އިތުރުން އެކި ސާޖަރީތަކާއި އާ ހިދުމަތްތައް ހޮސްޕިޓަލުން ދެމުންދާ ކަމަށެވެ.
އަހުމަދު ވިދާޅުވީ، އެޑްމިޓް ކުރާނެ އެނދު މަދުވުމުގެ ސަބަބުން އިތުރު ޕްރޮސީޖާތައް ފެށުމާއި ހިދުމަތް ފުޅާކުރުމަށް ވެސް ދަތުތަކެއް އެބަހުރި ކަމަށެވެ. އަދި މެޑިކަލް ކޮންސިއުމަބްލްސް އަދި ފާމަސިއުޓިކަލްސް ލިބުމުގައިވެސް މިދުވަސްވަރު ދަތިތަކެއް ދިމާވެފައިވާ ކަމަށް ވެސް އަހުމަދު ވިދާޅުވެފައި ވެއެވެ. އަދި މީގެ އިތުރުން، ޕްރައިވެޓް ރޫމްތައް އެއްގޮތަކަށް ވެސް ނެތުމުގެ ސަބަބުން ގިނަ ދަތިތަކެއް އެބަހުރި ކަމަށް އަހުމަދު ވިދާޅުވި އެވެ.
އަހުމަދު ވިދާޅުވީ، ކޮވިޑް-19 ގުޅިގެން މާލެއަށް އަރައި ފޭބުން ދަތިވެފައިވާތީ، ރ، ބ، ޅ އަދި ކ އަތޮޅުން ހިދުމަތް ހޯދުމަށް ގިނަ ބަޔަކު ކުޅުދުއްފުށި ހޮސްޕިޓަލުގެ ހިދުމަތް ހޯދުމަށް އަންނަމުންދާ މިންވަރު ވަރަށް ބޮޑަށް އިތުރުވެފައިވާ ކަމަށެވެ.
ކުޅުދުއްފުށިން ކޮވިޑް-19 އަށް ޕޮޒިޓިވް ކޭސްއެއް ފެނި، ރަށް މޮނީޓަރިންގ ހާލަތަށް ލެވިފައިވާތީ، މިހާރު ކުރިއާލާ އެޕޮއިންޓްމަންޓް ހަމަޖައްސައިގެން، ކުޅުދުއްފުއްޓަށް އާދެވޭނެ އިންތިޒާމުތައް ހަމަޖައްސަމުންދާ ކަމަށްވެސް އަހުމަދު ވިދާޅުވި އެވެ. އެގޮތުން، މިހާރު ވެސް ރ އަތޮޅުންނާއި ބ އަތޮޅުން ކުޅުދުއްފުޓަށް ގިނަ އަދަދެއް ބަޔަކު ސިއްހީ ފަރުވާއަށް އައުމަށް ހަމަޖެހިފައިވާތީ، އެކަންކަން ހަމަޖައްސަމުންދާ ކަމަށް ވެސް އަހުމަދު ވިދާޅުވި އެވެ.
ރާއްޖޭގެ އުތުރުގައި އަޅާ ޓަރޝަރީ ހޮސްޕިޓަލް ކުޅުދުއްފުށި ހިއްކި ބިމުގައި އެޅުމަށް، 130،493 އަކަފޫޓުގެ ބިމެއް ހަމަޖައްސާފައިވާ ކަމަށް ކުޅުދުއްފުށި ކައުންސިލުން ވަނީ ހަމަޖައްސާފަ އެވެ.
