އެމްއެމްޕީއާރުސީގެ ހިޔާނާތުގެ ފައިސާއިން މަނީ ލޯންޑަރ ކުރުމުގެ ކުށް ސާބިތުވެ، ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ފަރާތުން އިސްތިއުނާފް ކުރައްވާފައިވާ މައްސަލައިގެ ޝަރީއަތުގެ އަޑުއެހުމެއް އަންގާރަ ދުވަހުގެ މެންދުރު 13:00 ޖަހާއިރަށް ތާވަލު ކޮށްފިއެވެ.

މި މައްސަލައިގެ ޝަރީއަތުގެ އަޑުއެހުމެއް އަންގާރަ ދުވަހަށް ތާވަލުކޮށްފައިވާއިރު ރައީސް އަބްދުﷲ ޔާމީން އަބްދުލްގައްޔޫމްގެ ފަރާތުން އިސްތިއުނާފް ކުރައްވާފައިވާ މައްސަލައިގެ ބާއްވަން ތާވަލްކުރި އެންމެ ފަހު އަޑުއެހުން ވަނީ ކެންސަލް ކޮށްފައެވެ. އެ އަޑުއެހުމުން ކެންސަލް ކޮށްފައިވަނީ ރައީސް ޔާމީން އެދިވަޑައިގެންނެވުމުގެ މަތިން ކަމަށް ވެސް ހައިކޯޓުން ވަނީ ބުނެފައެވެ.

ރައީސް ޔާމީންގެ ފަރާތުން ހައިކޯޓުގައި އިސްތިއުނާފްކޮށްފައިވާ، މައްސަލައިގެ ޝަރީއަތް އަވަސް ކުރަން، އެމަނިކުފާނާއި އެމަނިކުފާނުގެ ޕާޓީން ބޭނުންވި ނަމަވެސް، މިއީ މިގޮތަށް އަޑުއެހުން ފަސްކުރި ދެވަނަ ފަހަރެވެ. މިދިޔަ ޖުލައި މަހުގެ 8 ވަނަ ދުވަހު، ހުލާސާ ގޮތެއްގައި ވާހަކަ ދެއްކުމުގެ ފަހު ފުރުސަތު ދިނުމުގެ ގޮތުން ބޭއްވި އަޑުއެހުމުގައި ވެސް ރައީސް ޔާމީން ވަނީ އިތުރު އަޑުއެހުމެއް ބާއްވާ ދެއްވުމަށް އެދިވަޑައިގަންނަވާފަ އެވެ. އެގޮތުގެ މަތިން އިތުރު އަޑުއެހުމެއްގެ ގޮތުގައި ބުދަ ދުވަހުގެ އަޑުއެހުން ހައިކޯޓުން ތާވަލް ކޮށްފައިވަނިކޮށް، އަނެއްކާވެސް ރައީސް ޔާމީން އެދިވަޑައިގެންނެވުމުގެ މަތިން މިވަނީ ކެންސަލް ކޮށްފައެވެ.

ރައީސް ޔާމީންގެ ފަރާތުން ހައިކޯޓުގައި އިސްތިއުނާފު ކުރައްވާފައިވަނީ، މަނީ ލޯންޑަރ ކުރުމުގެ ކުށުގެ ދައުވާ އާގުޅިގެން، ކްރިމިނަލް ކޯޓުގައި އެދައުވާ އެމަނިކުފާނުގެ މައްޗަށް ސާބިތުވެ، 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރި މައްސަލައެވެ.

އެމްއެމްޕީއާރުސީގެ ހިޔާނާތުގެ ފައިސާއިން، މަނީ ލޯންޑަރ ކުރުމުގެ ކުށުގެ ދައުވާ އާގުޅިގެން ކްރިމިނަލް ކޯޓުން އެމަނިކުފާނުގެ މައްޗަށް ހުކުމް ކޮށްފައިވަނީ މިދިއަ އަހަރުގެ ނޮވެމްބަރު 28 ގައެވެ.

ގއ. ވޮޑަމުލާގެ އިކުއިޒިޝަން ކޯސްޓްގެ ގޮތުގައި ދައުލަތަށް ލިބެންޖެހޭ 1،000،000 ޑޮލަރު ރައީސް ޔާމީންގެ އެކައުންޓަށް ޖަމާކޮށްފައިވާއިރު، އެމްއެމްޕީއާރުސީގެ އިތުރު މައްސަލަތަކެއްގެ ތަހުގީގުތައް ކުރިއަށްދެ އެވެ. ދާދިފަހުން ވަނީ އެމްއެމްޕީއާރުސީގެ ހިޔާނާތުގައި ހިމެނޭ، ރ. ފުއްގިރި ރިސޯޓެއް ތަރައްގީ ކުރުމަށް ކުއްޔަށް ދިން މައްސަލައެއްގައި މަނީ ލޯންޑަރ ކުރުމުގެ ދައުވާއަކާއި ކޮރަޕްޝަންގެ ދައުވާއެއް ކްރިމިނަލް ކޯޓަށް ހުށަހަޅާފައެވެ. މި މައްސަލާގައި ދައުލަތުން ރައީސް ޔަމީންގެ މައްޗަށް ހޯދުމަށް މަސައްކަތް ކުރާ، ޖުމްލަ ފައިސާގެ އަދަދަކީ 591 މިލިއަން ރުފިޔާއެވެ.