ސީއެސްސީގެ މެމްބަރުކަމަށް އައްޔަނުކުރަން 4 ބޭފުޅަކަށް މަޖިލީހުން ރުހުންދީފި
ސިވިލް ސަރވިސް ކޮމިޝަންގެ 4 މަގާމު ހުސްވެފައިވަނީ މިދިޔަ ޖުލައި މަހުގެ 13 ވަނަ ދުވަހު
ރައްޔިތުންގެ މަޖިލިސް
ސިވިލް ސަރވިސް ކޮމިޝަން (ސީއެސްސީ)ގެ ހުސްވެފައިވާ މެމްބަރުކަމުގެ މަގާމުތަކަށް އައްޔަނުކުރުމަށް ހަތަރު ބޭފުޅަކަށް ރައްޔިތުންގެ މަޖިލީހުން ރުހުންދީފިއެވެ.
ރައްޔިތުންގެ މަޖިލީހުން ރުހުންދިނުމަށް ނިންމާފައިވަނީ އަހްމަދު ނާސިހާއި މުހައްމަދު ފަރުޝަތު އާއި ފާތިމަތު ޝަރީފުގެ އިތުރުން އިބްރާހިމް ރަޝީދެވެ.
ސީއެސްސީގެ މެމްބަރުކަމުގެ މަގާމަށް ކުރިމަތިލެއްވި 41 ފަރާތްތަކާއި އިންޓަވިއު ކުރުމަށްފަހު 13 ބޭފުޅެއްގެ ނަން ހިމެނޭ ލިސްޓެއް މަޖިލީހުގެ މިނިވަން މުއައްސަސާ ތަކުގެ ކޮމިޓީން އެކުލަވާލިއެވެ.
ބުދަ ދުވަހުގެ ޖަލްސާގައި ރިޕޯޓުގައިވާ ލިސްޓުގެ ތަރުތީބުން ވޯޓަށް އަހާފައިވާއިރު މެމްބަރުކަމުގެ މަގާމަށް އައްޔަނުކުރުމަށް ރުހުންދިން އިބްރާހިމް ރަޝީދުގެ ނަން އޮތީ ލިސްޓުގެ ދެ ވަނައިގައެވެ. އޭނާ އައްޔަނުކުރަން ފެންނަކަމަށް 65 މެމްބަރުން ވޯޓު ދެއްވިއެވެ.
ސީއެސްސީއަށް އައްޔަނުކުރަން 66 މެމްބަރުން ވޯޓު ދެއްވި މުހައްމަދު ފަރުޝަތުގެ ނަން ހިމެނެނީ ލިސްޓުގެ ފަސްވަނައިގައެވެ. އޭނާ އަކީ މޯލްޑިވްސް މީޑިއާ ކައުންސިލް (އެމްއެމްސީ)ގެ ސެކެޓްރީ ޖެނެރަލްއެވެ.
ތައުލީމީ ދާއިރާއިން މަތީ ތައުލީމް ހާސިލުކުރައްވާފައިވާ ތިނަދޫ ދެކުނު ދާއިރާގެ މެންބަރު އަބްދުﷲ ސަނީފުގެ ކުރީގެ އަނބިކަނބަލުން ފާތިމަތު ޝަރީފު އައްޔަނުކުރަން ފެންނަކަމަށް 65 މެމްބަރުން ވޯޓު ދެއްވާފައިވާއިރު އޭނާގެ ނަން ހިމެނެނީ ލިސްޓުގެ 8 ވަނައިގައެވެ.
އެ ކޮމިޝަނަށް އައްޔަނުކުރުމަށް މަޖިލީހުން ރުހުން ދިން އަހުމަދު ނާސިހުގެ ނަން އޮތީ ލިސްޓުގެ 10 ވަނައިގައެވެ. ބްރޯޑްކާސްޓިން ކޮމިޝަން (ބްރޯޑްކޮމް)ގެ ސެކްރެޓަރީ ޖެނެރަލް ނާސިހު، މި މަގާމަށް އައްޔަނުކުރުމަށް 67 މެމްބަރުން ވަނީ ވޯޓު ދެއްވާފައެވެ.
ސީއެސްސީގެ 4 މަގާމު ހުސްވީ މިނިވަން މުއައްސަސާތަކާއި ބެހޭ ކޮމިޓީން ސީއެސްސީގެ 4 މެމްބަރަކު ވަކި ކުރުމަށް ނިންމާ މަޖިލީހުގެ ތަޅުމަށް ފޮނުވުމާއި ގުޅިގެން ތިން މެމްބަރަކު އިސްތިއުފާ ދެއްވާ، އެއް މެމްބަރަކު މަގާމުން ވަކި ކުރުމަށް މަޖިލީހުން ފާސްކުރުމާއި ގުޅިގެންނެވެ. މަގާމުން ވަކިކުރުމަށް ތަޅުމަށް ނަން ފޮނުވުމުން އިސްތިއުފާ ދެއްވީ ކޮމިޝަންގެ ރައީސް ކަމުގައި ހުންނެވި ޑރ. އަލީ ޝަމީމާއި، ނައިބު ރައީސް ކަމުގައި ހުންނެވި ޝަހީދު މުޙައްމަދުގެ އިތުރުން މެމްބަރު ޒަކަރިއްޔާ ޙުސައިން އެވެ. އެ ކޮމިޝަންގެ މެމްބަރުކަމުން ވަކިކޮށްފައިވަނީ ކޮމިޝަންގެ މެމްބަރު އިބްރާހީމް ޝަހީޤެވެ.
ސިވިލް ސަރވިސް ކޮމިޝަނުގެ ރައީސް ޑރ.ޢަލީ ޝަމީމާއި، ނާއިބު ރައީސް ޝަހީދު މުޙައްމަދާއި މެމްބަރު ޒަކަރިއްޔާ ޙުސައިނާއި މެމްބަރު އިބްރާހީމް ޝަހީޤާ ގުޅޭގޮތުން މިނިވަން މުއައްސަސާތަކާބެހޭ ކޮމިޓީން ބަލާފައި ވަނީ މައިގަނޑު 5 މައްސަލައެކެވެ. އޭގެ ތެރޭގައި ހިމެނެނީ ސިވިލް ސަރވިސް މުވައްޒަފުން ވަޒީފާއިން ވަކިކުރުމުގައި ގެންގުޅެފައިވާ ނާއިންސާފު ގޮތްތަކުގެ މައްސަލަތަކާއި، އޮފީސްތަކުގެ ބައެއް ޕާމަނަންޓް ސެކްރެޓެރީން އައްޔަންކުރުމުގައި ނުފޫޒުގެ ބޭނުންކުރުމާއި، ކޮމިޝަނުގެ ބައެއް މަޤާމުތަކަށް މުވައްޒަފުން ނެގުމުގައި އަމަލުކޮށްފައިވާ ގޮތާއި، ކޮމިޝަންގެ މެމްބަރުންގެ މެދުގައި ހުރި މައްސަަލަތަކެވެ.
