އައްޑޫ ސިޓީގެ ތަރައްޤީ އަށް މިސަރުކާރުން އިހުމާލެއް ނުވާނެ: ރޮޒައިނާ
ރައީސް ސޯލިހުގެ ސަރުކާރުން އައްޑޫ ސިޓީއަށް އިހުމާލެއް ނުވާނެ
އައްޑޫ ސިޓީގެ ރަށްތައް ގުޅުވައިދޭ ކޯސްވޭ
ވޭތުވެދިޔަ ސަރުކާރުތަކުން ހިންގާފައިނުވާވަރުގެ ގިނަ މަޝްރޫއުތައް އަހަރު ދުވަހުގެ ތެރޭގައި އައްޑޫ ސިޓީގައި ހިންގަމުންދާ ކަމަށާއި، ރައީސް އިބްރާހިމް މުހައްމަދު ސޯލިހުގެ ސަރުކާރުން އެ ސިޓީއަށް އިހުމާލެއް ނުވާނެ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
އައްޑޫ ސިޓީގެ ތަރައްޤީ އަށް މި ސަރުކާރުން އެއްވެސް ވަރަކަށް އަޅާނުލާ ކަމަށް ބުނެ ސިޔާސީ އެކި ފަރާތްތަކުން ދަނީ ތަފާތު ޕްލެޓްފޯމްތަކުގައި ވާހަކަ ދައްކަމުންނެވެ. އަދި އިންޑިއާ ސަރުކާރުގެ ގްރާންޓް އެހީގެ ދަށުން އައްޑޫ ސިޓީގައި ހަދަމުންދާ ޕޮލިސް އެކަޑަމީ އަކީ އިންޑިއާގެ މިލިޓަރީ ބޭސްއެއް ކަމަށް ދޭހަވާ މޭރުމުން ވެސް އެފަރާތްތަކުންދަނީ ހަގީގަތާ ހިލާފު ވާހަކަ ފަތުރަމުންނެވެ.
ރާއްޖެޓިވީގެ ސިޔާސީ ދުނިޔެ ޕްރޮގްރާމުގައި ވާހަކަ ދައްކަވަމުން ރޮޒައިނާ ވިދާޅުވީ، މިސަރުކާރުން ރާއްޖޭގެ ތަންތަން ވިއްކަނީ ކަމަށް ބުނެ ފަތުރާ ވާހަކަތަކުގައި އެއްވެސް އަސާސެއް ނެތް ކަމަށެވެ. އަދި ގައުމު ވިއްކާލަން ގާނޫނުތައް ހެދީ އިދިކޮޅު ފަރާތްތަކުން އޭރު ވެރިކަމުގައި ތިއްބަވައިގެން ކަމަށް ރޮޒައިނާ ވިދާޅުވިއެވެ.
ރޮޒައިނާ ވިދާޅުވީ އައްޑޫ ސިޓީގައި ހަދާ ޕޮލިސް އެކަޑަމީގެ މަސައްކަތް އެއްކޮށް ނިމުމުން ދިވެހި ސަރުކާރާ ހަވާލު ކުރުމަށް ހަމަޖެހިފައިވާ ކަމަށެވެ. އަދި އެތަނުގައި އެއްވެސް ވަރަކަށް އިންޑިއާގެ އަސްކަރިއްޔާގެ މަސައްކަތްތަކެއް ހިންގުމަށް ހަމަޖެހިފައިނުވާ ކަމަށް ރޮޒައިނާ ވިދާޅުވިއެވެ.
އޭނާ ވިދާޅުވީ އިންޑިއާއާއި ރާއްޖެއާ ދެމެދު އޮތް ޒަމާންވީ އެކުވެރިކަމުގެ ގުޅުމުގެ ތެރެއިން ކޮވިޑް-19ގެ ހާލަތުގައިވެސް ގިނަ އެހީތެރިކަމެއް ލިބެމުން އަންނަ ކަމަށެވެ. ވަކިން ހާއްސަކޮށް އައްޑޫގެ ތަރައްގީއަށް އިންޑިއާއިން ބޮޑު ހޭދައެއް ކުރަމުން އަންނަ ކަމަށް ރޮޒައިނާ ވިދަޅުވިއެވެ.
ރޮޒައިނާ ވިދާޅުވީ އައްޑޫ ސިޓީގައި ސަރުކާރުން ހިންގަމުންދާ ޕްރޮޖެކްޓްތަކާއި ހިންގުމަށް ހަމަޖެހިފައިވާ ޕްރޮޖެކްޓްތަކުގެ ވާހަކަ އަޑު އިވުމުން އައްޑޫ ރައްޔިތުންގެ ހިތުގައި ނަފްރަތު އުފެއްދުމަށް އިދިކޮޅު ފަރާތްތަކުން ގިނަ މަސައްކަތްތަކެއް ކުރަމުންދާ ކަމަށެވެ.
ސަރުކާރުން ވެފައިވާ ވައުދުތަކާ އެއްގޮތަށް ޕްރޮޖެކްޓްތައް ކުރިއަށްދާކަން ފާހަގަކުރައްވާ ރޮޒައިނާ ވިދާޅުވީ އައްޑޫ ސިޓީގެ ވަކިވަކި ރަށްތަކަށް ބެލި ނަމަވެސް ގިނަ މަޝްރޫއުތަކެއް ކުރިއަށްދާ ކަމަށެވެ. ނަމަވެސް ކޮވިޑާ ގުޅިގެން ބައެއް މަޝްރޫއުތަކަށް މަޑުޖެހުމެއް އައި ނަމަވެސް އެއްވެސް ތަފާތުކުރުމެއްނެތި ހުރިހާ މަސައްކަތްތަކެއް ނިންމުމަށް ސަރުކާރުން މަސައްކަތްކުރާ ކަމަށެވެ.
ރޮޒައިނާ ވިދާޅުވީ ސަރުކާރުން ފަށާފައިވާ މަސައްކަތްތައް ކޮވިޑާ ގުޅިގެން ހުއްޓުމަކަށް އައިސްފައިވާނުވާ ކަމަށާއި މިހާލަތުގައި ވެސް ރައްޔިތުންނަށް ދޭންޖެހޭ ހުރިހާ އަސާސީ ހައްގެއް ރައްޔިތުންނަށް ފޯރުކޮށްދެމުންދާ ކަމަށެވެ. އަދި ކޮވިޑުގެ ހާލަތު މެނޭޖް ކުރުމުގައި ސަރުކާރުން ކުރަމުންދަނީ ހިކުމަތްތެރި މަސައްކަތްތަކެއްކަން ވެސް އޭނާ ފާހަގަކުރެއްވިއެވެ.
