ބީއެމްއެލްއިން ލޯނުތައް ދެއްކުމުގެ މުއްދަތު ފަސްކޮށްދެނީ

ބޭންކް އޮފް މޯލްޑިވްސް (ބީއެމްއެލް) އިން ނަގާފައިވާ ލޯނުތަކަށް ފައިސާ އަނބުރާ ދެއްކުން ފަސްކޮށްދީފައިވާ 6 މަސް ދުވަހުގެ މުއްދަތު ހަމަވެފައިވާތީ ލޯނަށް ފައިސާ ދެއްކުން ފަސްކުރުމަށް ނިންމާ، ލޯނަށް ފައިސާ ދެއްކުން ފަސްކުރުމަށް އެދި ހުށަހެޅުމުގެ ފުރުސަތު ހުޅުވާލައިފި އެވެ.

މިކަމާއި ގުޅިގެން ބީއެމްއެލް އިން ނެރެފައިވާ ނޫސްބަޔާނެއްގައި ބުނެފައިވަނީ ކޮވިޑް-19 އާ ގުޅިގެން އާންމުންނަށާއި ވިޔަފާރިތަކަށް ކުރިމަތިވެފައިވާ ދަތިތަކުން އަރައިގަތުމަށް އެހީތެރިވުމުގެ ގޮތުން ބޭންކުން ނަގާފައިވާ ލޯނާއި ފައިނޭންސިންގ އަށް ފައިސާދެއްކުން ފަސްކޮށްދިނުމަށް ހުޅުވާލި ފުރުސަތުގައި މިދިޔަ ޖުލައި މަހުގެ ނިޔަލަށް ޕަރސަނަލް، ހައުސިންގ އަދި ވިޔަފާރި ލޯނާއި ފައިނޭންސް ހިމެނޭ ގޮތަށް 17،700 ލޯނު 6 މަސްދުވަހަށް ފަސްކޮށްދިނުމަށް އެދި ހުށަހަޅާފައިވާ ކަމަށެވެ. އަދި މިކަމަށް އެދި ހުށަހަޅާފައިނުވާ ފަރާތްތަކަށް 31 ޑިސެމްބަރގެ ނިޔަލަށް އެފުރުސަތު ހުޅުވާލާފައިވާ ކަމަށް ބީއެމްއެލުން ބުނެއެވެ.

މީގެއިތުރުން ބީއެމްއެލުން ބުނީ ލޯނަށް ދައްކަންޖެހޭ ފައިސާ އަނބުރާދެއްކުން ފަސްކޮށްދީފައިވާ ގިނަ ކަސްޓަމަރުންނަށް ދީފައިވާ 6 މަސްދުވަހުގެ މުއްދަތު މިހާރު ނިމުމަކަށް އައިސްފައިވާ ކަމަށެވެ. އެހެންކަމުން ބޭންކުން ވަނީ ކަސްޓަމަރުންނަށް ލޯނަށް ދައްކަންޖެހޭ ފައިސާ އަނބުރާ ދެއްކުން ފަސްކުރުމަށް އެދި ހުށަހެޅުމުގެ އިތުރު ފުރުސަތެއް ދިނުމަށް ނިންމާފައިކަމަށް ބަޔާނުގައި ބުނެފައިވެއެވެ.

މިގޮތުން ސެޕްޓެމްބަރު މަހުން ފެށިގެން ނޮވެމްބަރު މަހުގެ ނިޔަލަށް ފައިސާދައްކަން ފަށަންޖެހޭ ކަސްޓަމަރުންނަށް މި ފުރުސަތުލިބޭނެ ކަމަށް ބީއެމްއެލުން ބުނެއެވެ. މި ފުރުސަތު ލިބިގެންދާނީ މިހާރުވެސް މޮރަޓޯރިއަމް އެދި ހުށަހަޅާފައިވާ ކަސްޓަމަރުންގެ ތެރެއިން މި މަސްތަކުގައި ފައިސާދައްކަންޖެހޭ ކަސްޓަމަރުންނަށް ކަމަށް ބީއެމްއެލުން ބުނެއެވެ.

ލޯނަށް އަނބުރާ ފައިސާދެއްކުން ފަސްކުރުމަށް އިތުރު ފުރުސަތަކަށް އެދި ހުށަހެޅުމުގެ ޝަރުތު ހަމަވާ ކަސްޓަމަރުންނަށް 8 ސެޕްޓެމްބަރުން ފެށިގެން 03 ނޮވެމްބަރު ގެ ނިޔަލަށް ބޭންކުގެ ޕޯރޓަލް މެދުވެރިކޮށް އެދި ހުށަހެޅޭނެ ކަމަށްވެސް ބީއެމްއެލުން ބުނެއެވެ.

ބީއެމްއެލުން ބުނީ ލޯނަށް އަނބުރާ ދައްކަން ޖެހޭ ފައިސާ ފަސްކޮށްދިނުމަށް އެދި ހުށަހަޅާފައިވާ ފަރާތްތަކުގެ ތެރެއިން ފައިސާ ދެއްކޭނެ ކަސްޓަމަރުން ދެވަނަ ފަހަރަށް ފައިސާދެއްކުން ފަސްކޮށްދިނުމަށް އެދި ކޮންމެހެން ހުށަހަޅާކަށް ނުޖެހޭނެކަމަށެވެ.