ގެޓްސެޓް ލޯނަށް އެދި ހުށަހެޅުމުގެ މުއްދަތު އިތުރުކޮށްފި

ޒުވާން ވިޔަފާރިވެރިން އުފެއްދުމަށް ސަރުކާރުން ކުރިއަށް ގެންދާ 25 މިލިއަން ރުފިޔާގެ ގެޓްސެޓް ލޯނަށް ކުރިމަތިލުމުގެ މުއްދަތު އިކޮނޮމިކް މިނިސްޓްރީން މިއަދު އިތުރުކޮށްފި އެވެ.

އިކޮނަމިކް މިނިސްޓްރީން ކުރިން ހަމަޖައްސާފައި އޮތް ގޮތުން ނަމަ މި އަހަރުގެ ގެޓްސެޓް ލޯނަށް ކުރިމަތިލެވޭނީ މި މަހުގެ 16 އިން 27 ވަނަ ދުވަހުގެ ނިޔަލަށެވެ. ނަމަވެސް އިކޮނޮމިކް މިނިސްޓްރީން ބުރާސްފަތި ދުވަހު ކުރި އިއުލާނެއްގައި ބުނީ ލޯނަށް އެދުމުގެ މުއްދަތު އަންނަ މަހުގެ 18 ވަނަ ދުވަހުގެ ނިޔަލަށް އިތުރުކޮށްފައިވާ ކަމަށެވެ. ސަބަބެއް ކަމަށް ބުނެފައި ވަނީ ގިނަ އަދަދެއްގެ ޒުވާނުން ގެޓްސެޓް ލޯނަށް ކުރިމަތިލާން އަދިވެސް ބޭނުންވާތީ ވީހާ ވެސް ގިނަ ބަޔަކަށް ފުރުސަތު ދިނުމެވެ.

ގެޓްސެޓް ލޯނުގެ ސްކީމުގެ ފުރަތަމަ ބުރުގައި 25 މިލިއަން ރުފިޔާ 74 ފަރާތަކަށް ދީފައިވެއެވެ.

ގެޓްސެޓަކީ 18 އަހަރާއި 35 އަހަރާ ދެމެދުގެ ޒުވާނުންނަށް ހާއްސަކޮށްގެން ހުޅުވާލާފައިވާ ލޯންސްކީމެކެވެ. މި ލޯނަށް އެދެވެނީ ތިން ލައްކަ އާއި އަށް ލައްކަ ރުފިޔާއާ ދެމެދުގެ އަދަދަކަށެވެ.

ގެޓްސެޓަށް ފޯމު ބަލައިގަންނާނީ ބަންދު ނޫން ކޮންމެ ދުވަހެއްގެ ހެނދުނު 10:00 އިން 14:00 އަށެވެ.