ޖުލައި މަހު ކުޅުދުއްފުށީ ރީޖަނަލް ހޮސްޕިޓަލުން 10،000އަށް ވުރެގިނަ މީހުން ހިދުމަތް ހޯދި!
ކުޅުދުއްފުށި ރީޖަނަލް ހޮސްޕިޓަލަށް ހިދްމަތް ހޯދަން ދާމީހުން ދުވަހަކަށްވުރެ ދުވަހެެއް އިތުރުވަމުންދޭ
ކުޅުދުއްފުށި ރީޖަނަލް ހޮސްޕިޓަލުގެ މެނޭޖަރ އަހުމަދު ދާއޫދު (ކ)
މިދިޔަ ޖުލައި މަހު ހދ. ކުޅުދުއްފުށީ ރީޖަނަލް ހޮސްޕިޓަލުން (ކޭއާރުއެޗް) 10،000 އަށްވުރެގިނަ މީހުން ހިދުމަތް ހޯދައިފި އެވެ.
ކުޅުދުއްފުށި ރީޖަނަލް ހޮސްޕިޓަލުން ކުޅުދުއްފުށި އޮންލައިނަށް ހިއްސާކޮށްފައިވާ ތަފާސްހިސާބުތަކަށް ރިއާޔަތްކޮށް، ބުނެފައިވަނީ، މިދިޔަ ޖުލައި މަހު އެ ހޮސްޕިޓަލުން 10،145 މީހުން ހިދުމަތް ހޯދާފައިވާ ކަމަށެެވެ. މިދިއަ އަހަރުގެ ޖުލައި މަހު ހިދްމަތް ހޯދާފައިވަނީ 8501 މީހުންނެވެ.
މިއަހަރުގެ ޖޫން މަހު، 9830 މީހުން ހިދުމަތް ހޯދިއިރު، މިދިޔަ 2019 ވަނަ އަހަރުގެ ޖޫން މަހު އެ ހޮސްޕިޓަލުން ހިދުމަތް ހޯދާފައިވަނީ 7401 މީހުންނެވެ.
މިއަހަރުގެ މެއި މަހު 2945 މީހުން ހިދުމަތް ހޯދިއިރު، މިދިއަ އަހަރުގެ މެއި މަހު، 6072 މީހުން ހިދްމަތް ހޯދާފައި ވެއެވެ. އަދި މިއަހަރުގެ އޭޕްރީލް މަހު، 3723 މީހުން ހިދުމަތް ހޯދާފައިވާއިރު، މިދިއަ އަހަރުގެ އޭޕްރީލް މަހު 8554 މީހުން ހިދްމަތް ހޯދާފައި ވެއެވެ.
ކޮވިޑް-19 ގެ ބަލިމަޑުކަމާއެކު މާލެ ސަރަހައްދަށް ބޭސްފަރުވާ ހޯދުމަށް ހުރި ދަތިތަކުގެ ސަބަބުން މާލޭން އުތުރުގެ ގިނަ ބަޔަކު ހިދުމަތް ހޯދައި އަންނަ އެ މަންޒިލަކަށް ކުޅުދުއްފުށި ސިޓީ ވެފައިވެ އެވެ. އެގޮތުން މާލެ އަތޮޅާއި ޅ އަތޮޅުގެ އިތުރުން ބ އަދި ރ އަތޮޅުންވެސް އެ ސަރަހައްދުތަކުގެ ހޮސްޕިޓަލުތަކުން ލިބެން ނުހުންނަށް ފަރުވާ ހޯދުމަށް ކުޅުދުއްފުށި ރީޖަނަލް ހޮސްޕިޓަލަށްދާ ކަމަށް ކުޅުދުއްފުށި އޮންލައިނުން ހާމަކޮށްފައި ވެއެވެ.
ކުޅުދުއްފުށި ރީޖަނަލް ހޮސްޕިޓަލުގެ ޑޮކްޓަރުން އަތޮޅުގެ އެހެން ރަށްތަކާއި އުތުރުގެ ބައެއް ރަށްތަކަށް ޒިޔާރަތްކޮށް ބަލިމީހުން ބެލުގެ ޕްރޮގްރާމެއްވެސް މިއަހަރުގެ ތެރޭގައި ހިންގާފައި ވެއެވެ.
ކުޅުދުއްފުށި ރީޖަނަލް ހޮސްޕިޓަލުން ހިދުމަތް ހޯދަން އަންނަ މީހުން ދުވަހެއް ދުވަހަކަށް އިތުރުވަމުންދާއިރު އެ ހޮސްޕިޓަލްގެ މެނޭޖަރު އަހުމަދު ދާއޫދާ ހަވާލާ ދެއްވައި ކުޅުދުއްފުށި އޮންލައިންގައި ބުނެފައިވަނީ، ކުޅުދުއްފުށިން ރަށުން ބޭރުން އަންނަ ފަރާތްތަކަށް ދަތިވާ ކަންތައްތައް ތަކުރާރުވިޔަ ނުދިނުމަށްޓަކާ މަސައްކަތްތަކެއް ހޮސްޕިޓަލުން ކުރަމުންދާ ކަމަށެވެ. އެގޮތުން ރަށުން ބޭރުން ހިދުމަތް ހޯދުމަށް އަންނަ ފަރާތްތަކަށް ހާއްސަ ގޮތްތަކެއް ހޯދައިދުމުގެ ގޮތުން އެ ރަށްރަށުގެ ހެލްތް ސެންޓަރުތަކާއި ފެރީގެ ހިދުމަތް ދޭ ފަރާތްތަކާ ވާހަކަ ދައްކަމުންގެންދާކަމަށް ކުޅުދުއްފުށި ރީޖަނަލް ހޮސްޕިޓަލުން ބުނެއެވެ.
އަހުމަދު ވިދާޅުވެފައިވަނީ، ދަތިތަކާއެކުވެސް ހޮސްޕިޓަލާއި ކަމާ ގުޅުން ހުރި ސަރުކާރުގެ މުއައްސަސާތަކުގެ އެއްބާރުލުމާއެކު އާ ހިދުމަތްތަކެއް ތައާރަފްކުރެވި ގިނަ ކުރިއެރުންތަކެއްވެސް ހޯދިފައިވާ ކަމަށެވެ. ނަމަވެސް ހޮސްޕިޓަލަށް ދިމާވެފައިވާ ޖާގައިގެން މައްސަލަތަކާއި އެހެނިހެން ހިދުމަތް ފޯރުކޮށްދިނުމަށް ހުރި ގޮންޖެހުންތަކުގެ މައްސަލަވެސް ބޮޑުކަން އަހުމަދު ވަނީ ފާހަގަ ކުރައްވާފަ އެވެ.
އަހުމަދު ވިދާޅުވީ، އެޑްމިޓް ކުރާނެ އެނދު މަދުވުމުގެ ސަބަބުން އިތުރު ޕްރޮސީޖާތައް ފެށުމާއި ހިދްމަތް ފުޅާކުރުމަށް ވެސް ދަތުތަކެއް އެބަހުރި ކަމަށެވެ. މީގެ އިތުރުން، ޕްރައިވެޓް ރޫމްތައް އެއްގޮތަކަށް ވެސް ނެތުމުގެ ސަބަބުން ގިނަ ދަތިތަކެއް އެބަހުރި ކަމަށްވެސް އަހުމަދު ވަނީ ފާހަގަ ކުރައްވާފަ އެވެ. މީގެއިތުރުން ވެސް، މެޑިކަލް ކޮންސިއުމަބްލްސް އަދި ފާމަސިއުޓިކަލްސް ލިބުމުގައިވެސް މިދުވަސްވަރު ދަތިތަކެއް ދިމާވެފައިވާ ކަމަށް ވެސް އަހުމަދު ވިދާޅުވެފައި ވެއެވެ.
ކުޅުދުއްފުށި ރީޖަނަލް ހޮސްޕިޓަލަކީ އަތޮޅުތެރޭގެ އެންމެ ގިނަ މީހުން ހިދުމަތް ހޯދަމުންދާ އެއް ހޮސްޕިޓަލެވެ. އެވްރެޖްކޮށް ދުވާލަކު އެ ހޮސްޕިޓަލުން 300-400 ދެމެދުގެ އަދަދަކަށް މީހުން ހިދުމަތް ހޯދާކަމަށް ވެއެވެ.
