ރައީސް، ޝިންޒޯ އަބޭ އަށް އަވަސް ޝިފާއަކަށް އެދިވަޑައިގެންފި
އަބޭ ޖަޕާނުގެ ބޮޑުވަޒީރުކަމާއި ހަވާލުވެވަޑައިގެންނެވީ 2012 ވަނަ އަހަރު
ރައީސް ސޯލިހު އާއި ޝިންޒޯ އަބޭ
ބަލި ހާލަތު ހުރި ގޮތުން މަގާމުގެ މަސްއޫލިއްޔަތު އަދާނުކުރެވޭތީ ޖަޕާނުގެ ބޮޑުވަޒީރު ކަމުގެ މަގާމުން އިސްތިއުފާ ދެއްވި ޝިންޒޯ އަބޭ އަށް ރައީސް އިބްރާހިމް މުހައްމަދު ސޯލިހު އަވަސް ޝިފާއަކަށް އެދިވަަޑައިގެންފިއެވެ.
މިދިޔަ އަހަރު ރައީސް ސޯލިހު ޖަޕާނަށް ކުރެއްވި ރަސްމީ ދަތުރުފުޅުގައި އަބޭއާ އެކު ނަންގަވާފައިވާ ފޮޓޯއެއް ޓްވިޓާގައި ހިއްސާ ކުރެއްވަމުން އެމަނިކުފާނު ވިދާޅުވީ، އަބޭ އަކީ އާދަޔާ ހިލާފު ލީޑަރެއް ކަމަށެވެ. އަދި އެމަނިކުފާނަކީ ޖަޕާނާ ރާއްޖެއާ ދެމެދުގެ އޮންނަ ގުޅުން ގާތް ކުރުމުގައި ޗެމްޕިއަނެއް ކަމަށް ރައީސް ވިދާޅުވިއެވެ. ރައީސް ސޯލިހު ވަނީ، ސިންޒޯ އަބޭ އަށް އަވަސް ޝިފާއަކަށް އަދި ކާމިޔާބީ އަށް އެެދިވަޑައިގެންފައެވެ.
އަބޭ ޖަޕާނުގެ ބޮޑުވަޒީރުކަމާއި ހަވާލުވެވަޑައިގެންނެވީ 2012 ވަނަ އަހަރުއެވެ. އޭގެކުރިން 2006 ވަނަ އަހަރުން ފެށިގެން 2007 ވަނަ އަހަރަށް ވެސް އަބޭ ވަނީ ޖަޕާނުގެ ބޮޑުވަޒީރުކަން ކުރައްވާފައެވެ. އަބޭގެ ބޮޑުވަޒީރުކަމުގެ މިޓަރމް ހަމަވާނީ އަންނަ 2021 ވަނަ އަހަރުގެ ސެޕްޓެމްބަރ މަހަށެވެ. ސަރުކާރު ހިންގާ މައި ޕާޓީ ލިބެރަލް ޑިމޮކްރަޓިކް ޕާޓީ (އެލްޑީޕީ)އާ އެޕާޓީ އާ ގުޅިފައިވާ އެހެން ޕާޓީތަކުން ވަނީ ޕާޓީގެ ރައީސްކަމާއި ބޮޑުވަޒީރުކަމުގެ ޓަރމް ހަމަވަންދެން އެ މަގާމުތަކުގައި ހުންނެވުމަށް ބާރު އަޅާފައިކަމަށް މީޑިޔާ ރިޕޯޓްތައް ބުނެއެވެ. އަބޭއަކީ ޖަޕާނުގައި އެންމެ ގިނަ ދުވަހު ބޮޑުވަޒީރުކަން މިހާތަނަށް ކުރެއްވި ބޭފުޅާއެވެ. ރިޕޯޓްތައް ބުނާގޮތުން އަބޭ ހުކުރު ދުވަހު ނޫސްވެރިންނާ ބައްދަލު ކުރައްވާނެއެވެ.
އަބޭއަށް ފަހު ދެން ބޮޑުވަޒީރު ކަމަށް ވަޑައިގެންފާނެ ކަމަށް އެންމެ ބޮޑަށް ބެލެވެނީ އަބޭގެ ޑެޕިޔުޓީ އަދި ފިނޭންސް މިނިސްޓަރ ކަމުގައި ހުންނެވި ޓާރޯ އަސޯ އެވެ.
ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ގެ ދެ ވަނަ ވޭވެއް ޖަޕާނަށް އައިސްފައިވާއިރު ވައިރަސް ކޮންޓްރޯލް ކުރުމުގައި އަބޭ ގެންގުޅުއްވާ ސިޔާސަތުތަކަށް ވަނީ ފާޑުކިޔުންތައް އަމާޒުވެފައެވެ. ޖޫން މަހުގެ މެދުތެރެއިން ފެށިގެން ކޮވިޑް-19 އާ ގުޅިގެން އަބޭ މީޑިޔާއާ ބައްދަލުކުރައްވާ ވާހަކަ ދައްކަވާފައެއްނުވެއެވެ. ރިޕޯޓްތައް ބުނާގޮތުގައި ވައިރަސް ކޮންޓްރޯލްކުރުމަށް އަޅުއްވާނެ ފިޔަވަޅުތަކާއި ވެކްސިނެއް ލިބެއްޖެނަމަ ޖަޕާނުގެ މުޅި އާބާދީއަށް ވެކްސިން ލިބޭނެކަމުގެ ވައުދުވެ ވަޑައިގަތުމަށް އަބޭ ދިޔައީ ތައްޔާރު ވެވަޑައިގަންނަވަމުންނެވެ.
