އެސްޑީއެފްސީގެ ލޯނުތައް ދެއްކުން މި އަހަރުގެ ނިޔަލަށް ފަސްކޮށްދީފި

އެސްޑީއެފްސީ އިން ލޯނު ދޫކޮށްފައިވާ ފަރާތްތަކުން ލޯނު އަނބުރާ ދެއްކުން މި އަހަރު ނިޔަލަށް ފަސްކޮށްދިނުމަށް ނިންމައިފިއެވެ.

މި ނިންމުމަކީ ކޮވިޑް-19 އާ ގުޅިގެން، ކުދި އަދި މެދު ފަންތީގެ ވިޔަފާރިތަކަށް އެހީތެރިވުމުގެ ގޮތުން އެސްޑީއެފްސީން ނިންމި ނިންމުމެކެވެ.

އެސްޑީއެފްސީގެ އެ ނިންމުމާއި ގުޅެގޮތުން އިކޮނޮމިކް މިނިސްޓަރ ފައްޔާޒް އިސްމާއިލް ކުރެއްވި ޓުވީޓެއްގައި ވިދާޅުވީ އެސްޑީއެފްސީ ފަދައިން އެހެނިހެން ބޮޑެތި ބޭންކުތަކުންވެސް ގައުމަށް ދިމާވެފައިވާ ހާލަތަށް ރިއާޔައްކޮށް މިފަދައިން އަމަލު ކުރާނެ ކަމަށް އުންމީދު ކުރާކަމަށެވެ.

އެސްޑީއެފްސީއަކީ ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީ އާއި ފަންނީ ލަފާދިނުމުގެ ގޮތުން މިދިޔަ އަހަރުގެ މާޗް މަހުގެ ތެރޭގައި ހުޅުވިގެން ދިޔަ ކުންފުންޏެކެވެ.

ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ގޮތުން މި އަހަރުގެ ބަޖެޓުގައި ވެސް ވަނީ ގިނަ އަދަދަކަށް ފައިސާ ހިމަނާފައެވެ. އެގޮތުން 2020 ވަނަ އަހަރަށް ފާސްކުރި ބަޖެޓުގައި އެސްޑީއެފްސީއަށް 450 މިލިއަން ރުފިޔާ ކަނޑައަޅާފައިވެއެވެ.