ރައީސް މައުމޫނަށް އަވަސް ޝިފާއަކަށް ރައީސުލްޖުމްހޫރިއްޔާ އެދިވަޑައިގެންފި
26 އޯގަސްޓު 2020 | ބުދަ 13:05ޕޮޒިޓިވްވެ، ދަރުމަވަންތަ ހޮސްޕިޓަލުގައި އެޑްމިޓް ކުރައްވާފައިވަނީ އަންގާރަ ދުވަހުގެ ރޭ
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ކުރީގެ ރައީސް މައުމޫން އަބްދުލްގައްޔޫމް
ކޮވިޑް-19އަށް ފަރުވާ ހޯއްދަވަމުން ގެންދަވާ ކުރީގެ ރައީސް މައުމޫން އަބްދުލްގައްޔޫމް އަށް އަވަސް ޝިފާއަކަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އެދިވަޑައިގެންފިއެވެ.
ރައީސް މައުމޫނަށް އަވަސް ޝިފާއަކަށް އެދިވަޑައިގެން ރައީސް ޞާލިހު ޓްވީޓް ކުރެއްވިއިރު، ރައީސް މައުމޫން ކޮވިޑް-19އަށް ޕޮޒިޓިވް ވެފައިވަނީ އަންގާރަ ދުވަހު އެވެ. އަދި އަންގާރަ ދުވަހުގެ ރޭގެ ވަގުތެއްގައި ދަރުމަވަންތަ ހޮސްޕިޓަލުގައި އެޑްމިޑް ކުރައްވައި، ރައީސް މައުމޫނަށް ދަނީ ފަރުވާ ދެމުން ނެވެ.
ރައީސް މައުމޫނާއި އެމަނިކުފާނުގެ އާއިލާއިން ވަނީ އެމަނިކުފާނުގެ ހާލުކޮޅު ރަނގަޅު ކަމަށް ވިދާޅުވެފަ އެވެ. އަދި ބަލީގެ އަލާމާތްތައް ހުރީ ވަރަށް ކުޑަކޮށް ކަމަށް އެމަނިކުފާނުގެ ދަރިކަނބަލުން އަދި އާޓްސް، ކަލްޗަރ އެންޑް ހެރިޓޭޖް މިނިސްޓަރ ޔުމްނާ މައުމޫން ވަނީ ވިދާޅުވެފަ އެވެ.
އުމުރުފުޅުން 83 އަހަރުގެ ރައީސް މައުމޫނަކީ މިސަރުކާރުގެ ކޯލިޝަނުގައި ހިމެނޭ އެމްއާރުއެމް ލީޑަރު އެވެ.
މާލެ ސަރަހައްދުގެ ފުރަބަންދަށް ލުއިތަކެއް ދިންފަހުން، ކޮވިޑް-19 އަށް ޕޮޒިޓިވްވާ މީހުންގެ އަދަދު މާލެ ސަރަހައްދުގައި އަންނަނީ ވަރަށް ހަލުވި މިނެއްގައި ފެތުރި ގިނަ ވަމުން ނެވެ. މިހާރަކަށް އައިސް ދުވާލެއްގެ މައްޗަށް 100 އަށްވުރެ ގިނަ މީހުން ކޮވިޑް-19 އަށް ޕޮޒިޓިވްވަމުން ދެއެވެ.
ރާއްޖެއިން މިހާތަނަށް 7047 މީހުން ކޮވިޑް-19އަށް ޕޮޒިޓިވް ވެފައިވާއިރު، 4439 މީހުން ވަނީ ބަލިން ރަނގަޅުވެފައެވެ. މިހާރު ފަރުވާ ދެމުން އަންނަނީ 2580 މީހުންނެވެ. މި ބަލީގައި ރާއްޖެއިން މިހާތަނަށް ވަނީ 28 މީހަކު ނިޔާވެފައެވެ.
