އިންޑިޔާގައި ވެއްޓުނު އިމާރާތުގެ ދަށުން 60 މީހުން ސަލާމަތްކޮށްފި
25 އޯގަސްޓު 2020 | އަންގާރަ 11:09މިއިމާރާތުގައި 200 މީހުން ދިރިއުޅޭ
ވެއްޓުނު އިމާރާތުގެ ދަށުން މީހުން ސަލާމަތްކުރުމުގެ މަސައްކަތްކުރަނީ
ހުޅަނގު މަހަރަޝްތްރަ ސްޓޭޓުން ވެއްޓުނު އިމާރާތުގެ ދަށުން 60 މީހުން ސަލާމަތްކޮށްފައިވާ ކަމަށް ސީނިއަރ އޮފިޝަލަކު ވިދާޅުވެއްޖެ އެވެ.
ފަސް ބުރިއަށް ނަގާފައިވާ އިމާރާތް ވެއްޓިފައިވަނީ ހޯމަ ދުވަހުއެވެ. މިއިމާރާތުގައި 200 މީހުން ދިރިއުޅެއެވެ. ވެއްޓިފައިވާ އިމާރާތުގެ ދަށުން މީހުން ސަލާމަތްކުރުމުގެ މަސައްކަތް ކުރަމުން އަންނަ މީހުން ބުނާގޮތުގައި 30 މީހުން އަދިވެސް ވަނީ އިމާރާތުގެ ދަށުގައި ތާށިވެފައެވެ. އަދި އެކަކު ވަނީ މަރުވެފައެވެ.
މިހާދިސާ އާ ގުޅިގެން ފުލުހުން ނެރެފައިވާ ބަޔާނުގައި ބުނެފައިވަނީ މިއިމާރާތުގައި 47 ފްލެޓް ހިމެނޭ ކަމަށެވެ. އަދި އިމާރާތް ވެއްޓުމާއެކު އިމާރާތުގެ ދަށުގައި ތާށިވެފައިވާ މީހުން ސަލާމަތްކުރުމުގެ މަސައްކަތް ކުރަމުން އަންނަކަމަށާއި މޫސުން ގޯސްވުމާއި ކޮވިޑް-19 ގެ ސަބަބުން ކައިރި ހޮސްޕިޓަލްތަކަށް މީހުން ގެންދިޔުމަށް ދަތިތަކާ ކުރިމަތިވެފައިވާ ކަމަށް ބުނެ އެވެ.
އިމާރާތް ވެއްޓެން ދިމާވި ސަބަބެއް އަދި ސާފެއް ނުވެއެވެ. އެހެންނަމަވެސް މިއިމާރާތަށް 10 އަހަރު ވެފައިވާ ކަމަށާއި އިމާރާތުގެ ފައުންޑޭޝަނަކީ ބަލިކަށި ފައުންޑޭޝަނެއް ކަމަށް އޮފިޝަލަކާ ހަވާލާދީ އިންޑިޔާގެ ނޫސްތަކުން ބުނެއެވެ. އިންޑިޔާގައި އިމާރާތް ވެއްޓުމަކީ އާންމުކޮށްވެސް ހިނގާ ކަމެއްކަމަށް މީޑިޔާ ރިޕޯޓްތައް ބުނެއެވެ. އެއީ އިމާރާތް ހެދުމަށް ބޭނުންކުރާ ފެންވަރު ދަށް ތަކެތީގެ ސަބަބުންނެވެ.
2017 ވަނަ އަހަރު އެކަނިވެސް އިންޑިޔާގައި 1161 އިމާރާތެއް ވެއްޓި 1200 މީހުން ވަނީ މަރުވެފައެވެ. އިމާރާތްތައް ވެއްޓުމުގެ ހާދިސާތައް ބޮޑަށް ހިނގާފައިވަނީ ޖޫން މަހާއި ސެޕްޓެމްބަރ މަހާ ދެމެދުއެވެ. އެއީ އިންޑިޔާއަށް އެންމެ ބޮޑަށް މޫސުން ގޯސްވެ ވިއްސާރަކުރާ ދުވަސްވަރެވެ.
