އިރާނުގެ ރައީސް ހަސަން ރޫހާނީގެ ކޮއްކޯފުޅު ހުސައިން ފަރީދޫން ދެ ދުވަހު ބަންދުގައި ބެހެއްޓުމަށް ފަހު ކަފާލާތުގެ ދަށުން އިރާނު ފުލުހުން ދޫކޮށްލައިފިއެވެ.
ރިޕޯޓުތައް ބުނާގޮތުން ފަރީދޫން ކަފާލާތުގެ ދަށުން ދޫކޮށްލައިފައި ވަނީ ހޯމަ ދުވަހުގެ ރޭ އެތައް މިލިއަން ޑޮލަރު ކަފާލާތުގެ ގޮތުގައި ދެއްކުމަށް ފަހުގައެވެ.
ފަރީދޫންގެ މައްޗަށް ކުރެވޭ ކޮރަޕްޝަނުގެ ތުހުމަތާއި ގުޅިގެން ކުރެވޭ ތަހުގީގުގައި ހޮނިހިރު ދުވަހު އޭނާއާ ސުވާލުކޮށްފައިވާ ކަމަށް ރިޕޯޓުތައް ބުނެއެވެ. ތަހުގީގުގައި ސީދާ ސުވާލު ކުރެވުނީ ކޮންކަމަކަށް ކަން ނޭނގޭއިރު ރިޕޯޓުތައް ބުނާގޮތުން ފަރީދޫން ގެ މައްޗަށް ދަނީ "ގިނަ ކަންކަމަށް ތަހުގީގުތަކެއް ކުރެވެމުންނެވެ."
ފަރީދޫން ހައްޔަރުކޮށްފައިވާއިރު ރައީސް ރޫހާނީ އާއި ޝަރުއީ ދާއިރާ އާއި މެދު އޮތް ނުތަނަވަސްކަން ވަނީ ބޮޑުވެފައެވެ. ފަރީދޫން ހައްޔަރުކޮށްފައި ވަނީ ރައީސް ރޫހާނީ އާ ދައުރަކަށް ވެެރިކަމާ ހަވާލުވެވަޑައިގަތުމުގެ ހަފްތާތަކެއް ކުރިންނެވެ. ރޫހާނީ ވަނީ މެއި މަހު ބޭއްވުނު އާންމު އިންތިޚާބު ބޮޑު ތަފާތަކުން ކާމިޔާބު ކުރައްވާފައެވެ.
ފަރީދޫން އަކީ ރައީސް ރޫހާނީގެ ފުރަތަމަ ދައުރުގައި ރަސްމީ ގޮތެއްގައި މަގާމެއްގައި އުޅުއްވާފައި ނުވާ ބޭފުޅަކަށްވިއަސް ފަރީދޫން އަކީ ރައީސް ރޫހާނީގެ ފުރަތަމަ ދައުރުގައި އެކި މުހިންމު ކަންކަމުގައި ރޫހާނީ އާއި އެކީ އިސްކޮށް އުޅުއްވިި ބޭފުޅެކެވެ. އޭގެތެރޭގައި ދުނިޔޭގެ ބާރުތަކާއި އެކީ ނިއުކްލިއާ ޕްރޮގްރާމުގެ މަޝްވަރާ ގައި ބައިވެރިވުން ހިމެނެއެވެ.
