ކ.އަތޮޅުގެ ޗެމްޕިއަން ޓްރޮފީ ގުރައިދޫއަށް

އެސްޓީއޯ މިނިވަން ޗެމްޕިއަންޗިޕް ފުޓުބޯޅަ މުބާރާތުގެ ކ.އަތޮޅުގެ ޗެމްޕިއަން ޓްރޮފީ ގުރައިދޫއިން އުފުލާލައިފި އެވެ.

ގުރައިދޫއިން ޗެމްޕިއަންކަން ހޯދީ ހުކުރު ދުވަހު ހަވީރު ކުޅުނު އެއަތޮޅުގެ ފައިނަލް މެޗުގައި މާފުށީގެ މައްޗަށް ކުރިހޯދައިގެންނެވެ. މި މެޗް ގުރައިދޫއިން ކާމިޔާބުކުރީ ވާދަވެރި ކުޅުމަކަށްފަހު 1-0 ގެ ނަތީޖާއަކުންނެވެ.

މެޗުގައި ފެނިގެންދިޔަ ހަމައެކަނި ލަނޑު އަދި، ގުރައިދޫއަށް ޗެމްޕިއަންކަން ލިބުނު ލަނޑު ފެނިގެން ގޮސްފައިވަނީ ދެވަނަ ހާފުގެ ތެރޭގަ އެވެ. މެޗުގެ 51 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމުވެސް ހޯދި ނިމާޒް އަހްމަދް އެވެ.

ކ.އަތޮޅުގެ ޗެމްޕިއަންކަން ހޯދި ގުރައިދޫއިން ދެން ކުޅެން ޖެހޭނީ މި މުބާރާތުގެ ޒޯން ބުރުގަ އެވެ. މި އަހަރުގެ ފުޓުބޯޅަ ކަލަނޑަރަށް ގެނައި ބަދަލާއެކު މިނިވަން ޗެމްޕިއަންޝިޕް މުބާރާތައްވެސް ވަނީ ކޮންމެވެސް ވަރެއްގެ ބަދަލުތަކެށް ފެނިގެން ގޮސްފަ އެވެ. އެގޮތުން އަތޮޅު ތަކުގެ ޗެމްޕިއަނުން ޒޯން ބުރެއް ކުޅުމަށްފަހު ޒޯން ބުރުން ޗެމްޕިއަންކަން ހޯދާ ޓީމުތަކުން މާލޭގައި ޒޯން ތަކުގެ ޗެމްޕިއަނުންގެ ބުރެށް ކުޅޭނެ އެވެ. އަދި ޒޯން ތަކުގެ ޗެމްޕިއަނުންގެ ބުރުން އެންމެ ގަދަ ހަތަރު ޓީމު މި ސީޒަނުގެ ދިވެހި ލީގަށް ކޮލިފައި ވާނެ އެވެ.