ކުޑަކުރި މުސާރަތައް އިޔާދަކޮށްފި
25 އޯގަސްޓު 2020 | އަންގާރަ 06:15ރައްޔިތުންގެ މަޖިލީހުގެ ހުއްދަ އާއި އެކު ކުޑަކުރި މުސާރަތަކަށް ބަދަލު ގެންނަން ހުއްދަ ދީފައި ވަނީ ޖުލައިމަހުގެ ނިޔަލަށް
ފިނޭންސް މިނިސްޓަރި އިބްރާހިމް އަމީރު
ކޮވިޑް-19 އާއި ގުޅުގެން ސަރުކާރުގެ ހަރަދުތައް ކުޑަކުރުމަށް އެޅި ފިޔަވަޅުތަކުގެ ތެރެއިން ކުޑަކޮށްފައިވާ މުސާރަތައް އަލުން އިޔާދަކޮށްފިއެވެ.
ކޮވިޑް-19 އާއި ގުޅިގެން ހަރަދު ކުޑަކުރުމުގެ ގޮތުން ސަރުކާރުން ވަނީ ސިޔާސީ މުވައްޒަފުންގެ މުސާރަ އާއި ސަރުކާރު ކުންފުނިތަކުގެ މެނޭޖިން ޑިރެކްޓަރުންގެ މުސާރަ އަދި ސިވިލް ސާވިސް މުވައްޒަފުންގެ ތެރެއިން 20،000 ރުފިޔާއަށް ވުރެން މަތިން އަސާސީ މުސާރަ ލިބޭ ފަރާތްތަކުގެ މުސާރަ ކުޑަކޮށްފައެވެ. އަދި ރައްޔިޔުންގެ މަޖިލީހުގެ ހުއްދައެކު މަޖިލީހުގެ މެންބަރުން މުސާރަ އާއި ރައީސުލް ޖުމްހޫރިއްޔާގެ މުސާރަ އަދި މިނިވަން މުއްސަސާތަކުގެ މުސާރަތައް ކުޑަކުރި ނަމަވެސް އެގޮތަށް ހުއްދަ ދީފައި ވަނީ ޖުލައި މަހުގެ ނިޔަލަށެވެ.
ފިނޭންސް މިނިސްޓަރު އިބްރާހިމް އަމީރު ސޮއިކޮށްފައިވާ އެސާކިއުލާގައިވަނީ ކޮވިޑް-19 އާއި ގުޅިގެން ދައުލަތުގެ ހަރަދު ކުޑަކުރުމުގެ އުސޫލަށް ފިނޭންސް މިނިސްޓްރީ އިން ގެނަސްފައިވާ ބަދަލުތައް އާންމު ކޮށްފައެވެ. ފިނޭންސް މިނިސްޓްރީ އިން ނެރުނު ނޫސްބަޔާނެއްގައި ވަނީ ކޮވިޑް-19 އާއި ގުޅިގެން އާންމު ކޮށްފައިވާ ހަރަދު ކުޑަކުރުމުގެ ދެ އުސޫލަށް އަމަލު ކުރުން ވަގުތީގޮތުން މެދުކަނޑާލުމަށް ބުނެފައެވެ.
އެގޮތުން ފިނޭންސް މިނިސްޓްރީން މާރޗު 17 ވަނަ ދުވަހުގެ ނިޔަލަށް ހުއްދަ ދީފައިވާ މަގާމުތައް ފިޔަވައި އައު މަގާމުތަކަށް މުވައްޒަފުން ނުނެގުމަށާއި އެއްވެސް އައު މަގާމަކަށް މިނިސްޓްރީގެ ހުއްދަ ނެތި މުވައްޒަފުން ނުނެގުމަށް ވަނީ ބުނެފައެވެ. މިހާތަނަށް މުވައްޒަފުންނަށް ދެމުންނުދާ އެއްވެސް އައު އެލަވަންސެއް ނުދިނުން ސާކިއުލާގައި ބުނެފައިވާ އިރު، ވަޒީފާ އިން ވަކިވާ މުވައްޒަފުންގެ ބަދަލުގައި ވެސް ފިނޭންސްގެ ހުއްދަ ނެތި މުވައްޒަފުން ނުނެގުމަށް ވަނީ ބުނެފައެވެ.
އޭގެއިތުރުން، އިތުރުގަޑީގެ ގޮތުގައި ބަޖެޓްކޮށްފައިވާ މިންވަރުގައި ހަރަދުތައް ހިފެހެއްޓުމަށް، މަސައްކަތްތައް ދުރާލާ ރާވައިގެން ކުރިއަށް ގެންދިއުމަށާއި 14:30 ގައި އޮފީސްތައް ބަންދުކުރުމަށް ފިނޭންސް އިން ބުނެއެވެ.
ފިނޭންސް އިން ވަނީ ދައުލަތުގެ ހުރިހާ އިދާރާއަކުން ރާއްޖެއިން ބޭރަށް ކުރާ ހުރިހާ ދަތުރުތަކެއް ހުއްޓާލުމަށް އަންގާ، ކޮންމެހެން ކުރަންޖެހޭ ދަތުރެއްނަމަ އެ މިނިސްޓްރީގެ ހުއްދަ ހޯދުމަށް ބުނެފައެވެ. އަދި ދައުލަތުގެ އިދާރާތަކުން އަމަލީ މަސައްކަތް ފަށާފައިވާ މަރާމާތުގެ މަސައްކަތްތަކާއި، މަރާމާތަށް މިހާތަނަށް ރައީސް އޮފީހުން ނުވަތަ ފިނޭންސް މިނިސްޓްރީން ހުއްދަ ދީފައިވާ މަސައްކަތްތައް ފިޔަވައި، އިތުރު އެއްވެސް މަރާމާތުގެ މަސައްކަތެއް ނުފެށުމަށް ވެސް ފިނޭންސް ބުނެފައެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގައި ހިމެނޭ ކެޕިޓަލް ހަރަދުތައް ފިޔަވައި އެހެން ހުރިހާ ކެޕިޓަލް ހަރަދުތައް ކުރުން ހުއްޓާލުމަށް ފިނޭންސް މިނިސްޓްރީ އިން ވަނީ އަންގާފައެވެ.
