ވިނަރެސް ފްލެޓްތަކުގެ ކުލި ކުޑަކުރިނަމަވެސް ކުންފުންޏަށް މާލީ ބުރައެއް ނެތް: ފަޒުލް
ވިނަރެސްގެ އެގްރީމެންޓަށް ރީ-އެޑްޖެސްޓްމެންޓް ގެނައުމުގެ މަސައްކަތް ދަނީ ކުރަމުން
ވިނަރެސް ފްލެޓްތައް
ވިނަރެސް ފްލެޓްތަކުގެ ކުލި ކުޑަކުރި ނަމަވެސް ކުންފުންޏަށް މާލީ ބުރައެއް ނެތްކަމަށް, އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ބުދަ ދުވަހުގެ ހަވީރު އާބަންކޯގައި ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ، އެތަނުގެ ޑައުންޕޭމަންޓަށް ދައްކާ އަދަދު 50 އިންސައްތަ ކުޑަކުރުމަށް ވަޒީރުންގެ މަޖިލީހުގެ މަޝްވަރާގެ މަތިން ނިންމަވާފައިވާތީ، އެއާ އެގޮތަށް އަމަލު ކުރުމަށް ބޯޑުން ނިންމަވާފައި ވާކަމަށެވެ. އަދި މަހުން މަހަށް ދައްކާ އަދަދުން އާންމުގޮތެއްގައި 4,200 ރުފިޔާ އުނިކޮށްދިނުމަށް ނިންމަވާފައި ވާކަމަށެވެ.
މީގެ އިތުރުން ފަޒުލް ވިދާޅުވީ، މިހާރު ވިނަރެސް ފްލެޓްތަކުގެ އެގްރީމެންޓް ހެދިފައިވާ ފަރާތްތަކާއި، އަދި ފައިސާ ދައްކާފައިވާ ފަރާތްތަކުގެ އެގްރީމެންޓް ރީ-އެޑްޖެސްޓްމެންޓް ގެނައުމުގެ މަސައްކަތް ފަށާފައި ވާކަމަށެވެ. އެ މަސައްކަތްތައް މިހާރު ކުރިއަށްދާތީ، ސޮއިކުރުމަށް ހުރި އެއްބަސްތަކުގެ ޕްރޮސެސްއަށް ލަސްކަމެއް އަތުވެދާނެކަމަށް އޭނާ ވިދާޅުވިއެވެ.
ވިނަރެސްގެ ނުވިކި ހުރި ފްލެޓްތަކަށް އިޝާރާތް ކުރައްވައި ފަޒުލް ވިދާޅުވީ، މިހާރު ހުރީ ޕާކިންގއެއްގައި ކަމަށާއި، ޕާކިންގއިން ރިލީޒްވުމާމެދު އަމަލުކުރާނެ ގޮތެއް ހާމަކުރައްވާނެ ކަމަށެވެ. އެގޮތުން އެ ފްލެޓްތައް ގަތުމަށް ހުޅުވާލާނީތޯ، ނުވަތަ މިހާރު މައްސަލަޖެހިފައިވާ (މިސާލަކަށް ސީ-ލައިފުން ފްލެޓް ލިބުނު) ފަރާތްތަކަށް ފްލެޓްތައް ދޫކުރާނެތޯ ބަލާނެ ކަމަށް ފަޒުލް ވިދާޅުވިއެވެ.
މީގެ އިތުރުން ފަޒުލް ވިދާޅުވީ ވިނަރެސް ފްލެޓްތަކުގެ ސަރަހައްދު ތަރައްގީކުރުމަށް އިތުރު ޓީމްތައް މޮބަލައިޒްކޮށް، މަސައްކަތް ކުރާނެ ކަމަށެވެ. އަދި އުންމީދުކުރައްވަނީ ރޯދައިގެ ކުރިން އެސަރަހައްދުން ރައްޔިތުންނަށް ދިމާވާ ދަތިތަކަށް ހައްލު ހޯދައިދިނުމަށް ކަމަށް ފަޒުލް ވިދާޅުވިއެވެ.
