ވަކީލުންނަށް ރައީސް ޔާމީނާއި ހޯމަ ދުވަހު ބައްދަލު ކުރެވޭނެ: ކަރެކްޝަންސް
24 އޯގަސްޓު 2020 | ހޯމަ 02:13ގައިދީއަކަށް ޤާނޫނީ ވަކީލުންނާއި ބައްދަލު ކުރުމަށް ހުރަސް އަޅާފައި ނުވާނެ ކަމަށް ވިދާޅުވި
ރައީސް އަބްދުﷲ ޔާމީނާއި އެމަނިކުފާނުގެ ޤާނޫނީ ޓީމުގެ ބައެއް މެންބަރުން
މަނީލޯންޑްރިންގެ ކުށް ސާބިތުވެ, ޖަލުހުކުމެއް ތަންފީޒް ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނަށް އެމަނިކުފާނުގެ ޤާނޫނީ ވަކީލުންގެ ޓީމާއި ބައްދަލުވުމުގެ ފުރުސަތު ހަމަޖައްސައިދީފައިވާ ކަމަށް މޯލްޑިވްސް ކަރެކްޝަނަލް ސާރވިސް އިން ބުނެފިއެވެ.
އާދިއްތަ ދުވަހުގެ ރޭ ރާއްޖެ ޓީވީގެ "ފަލަ ސުރުޚީ"ޕްރޮގްރާމްގައި ވާހަކަ ދައްކަވަމުން ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ ރައީސް ޔާމީނަށް އެމަނިކުފާނުގެ ވަކީލުންނާއި ބައްދަލު ކުރުމުގެ އިންތިޒާމް ހޯމަ ދުވަހުގެ 2:00 އަށް ހަމަޖައްސައިދީފައިވާ ކަމަށެވެ.
އަދި ކްރިމިންލް ކޯޓުގެ އެދުމާއި އެކު މީގެ ކުރިން އިންތިޒާމް ނުކުރާ މިންވަރަށް ހޯދަން ޖެހޭ ހުއްދަ ތަކާއި އިތުރު އިންތިޒާމް ތައް ހަމަޖައްސައިދީފައިވާކަން އަހުމަދު މުހައްމަދުފުޅު ފާހަގަ ކުރެއްވިއެވެ.
އެގޮތުން ހެލްތް ޕްރޮޓެކްޝަން އެޖެންސީ (އެޗްޕީއޭ) އާއި މާފުށި ކައުންސިލުން ހޯދަން ޖެހޭ ހުއްދަތައް ހޯދާފައިވާ ކަމަށެވެ. އަދި ޖަލަށް ވަޑައިގަތުމުގެ ދެ ގަޑިއިރު ކުރިން ކަނޑައެޅިފައި ހުންނަ ވިޒިޓް އޮފިސަރަށް ފޯނުން ގުޅައި އެކަން އެންގުމުން އެތެރެއިން ހަމަޖައްސަންޖެހޭ އިންތިޒާމް ހަމަޖެހިގެންދާނެ ކަމަށް އޭނާ ވިދާޅުވިއެވެ.
ރައީސް ޔާމީންގެ ވަކީލުންނަށް އެމަނިކުފާނާއި ބައްދަލުކުރެވޭނެ އިންތިޒާމު ކަރެކްޝަނުން ހަމަޖައްސާފައި ނުވާތީ އެމަނިކުފާނާއި ބައްދަލުވެފައި ނުވާކަމަށް ޤާނޫނީ ޓީމުން މީގެ ކުރިން ވަނީ ބުނެފައެވެ. އެކަމާއި ގުޅޭ ގޮތުން އަހުމަދުފުޅު ވިދާޅުވީ މޯލްޑިވްސް ކަރެކްޝަނަލް ސާރވިސް އިން އެއްވެސް ގައިދީއަކަށް ޤާނޫނީ ވަކީލުންނާއި ބައްދަލު ކުރުމަށް އެއްވެސް އިރެއްގައި ހުރަސް އަޅާ އަދި ހުރަސް އަޅަން މަސައްކަތް ކޮށްފައި ނުވާނެ ކަމަށެވެ.
ވަކިން ޚާއްސަކޮށް ކުރީގައި ރައީސްކަން ކުރައްވާފައި ހުންނެވި ބޭފުޅަކަށް ވީތީ ރައީސް ޔާމީނާއި ދޭތެރޭ މޯލްޑިވްސް ކަރެކްޝަނަލް ސާރވިސްގައި ހެދިފައި އޮތް ކުރީގެ ޚާއްސަ މަޤާމުތައް ފުރުއްވާފައި ތިއްބަވާ ބެފުޅުންނާއި މެދު އަމަލު ކުރަންޖެހޭ ޚާއްސަ އުސޫލުގެ ތެރެއިން ހަމަ އަމަލު ކުރަމުންދާކަމަށެވެ.
ހައިކޯޓުގައި ހިނގި އިސްތިއުނާފްގެ އަޑުއެހުމުގައިވެސް ދައުލަތުގެ މައްޗަށް އެބައްދަލުވުން އިންތިޒާމް ކޮށްދިނުމުގެ ކަންކަން ހަމަޖައްސައިދިނުމަށް އެދިފައިވާ ކަމަށާއި އެކަމާއި ގުޅިގެން މިދިޔަ ޖުލައި މަހު ކަރެކްޝަންސްއިން އިސްވެ ސިޓީއަކުން ބައްދަލުވުމަށް އެދުނުހާ އަވަހަކަށް ބައްދަލުކުރުމުގެ އިންތިޒާމް ހަމަޖައްސައިދޭނެ ކަމަށް ޔާމީންގެ ލޯޔަރުންނަށާއި އަދި ރައީސް ޔާމީނަށް ދަންނަވާފައިވާނެ ކަމަށް އަހުމަދު މުހައްމަދުފުޅު ވިދާޅުވިއެވެ.
ގިނަ ދުވަސްތަކަކަށްފަހު މިހިނގާ އޮގަސްޓް މަހުގެ 4 ވަނަ ދުވަހު ލޯޔަރު ބައްދަލުވުމުކަށް އެދި ފޯމް ހުށަހެޅި ކަމަށާއި ޖަލަށް ވަޑައިގަތުމުން ރައީސް ޔާމީނާއި ބައްދަލުވުމުގެ އިންތިޒާމް ހަމަޖެހޭނެ ކަމަށް އަންގާފައިވާނެ ކަމަށް އޭނާ ވިދާޅުވިއެވެ.
މިދިޔަ ހޯމަ ދުވަހު ވަކީލުންގެ ޓީމުން ރައީސް ޔާމީނާއި ބައްދަލު ކުރުމަށް ގޮސްފައިވަނީ ހޯދަން ޖެހޭ ހުއްދަތައް ނުހޯދާ ހަމަޖެހިފައިވާ އުސޫލްތަކުގެ ބޭރުންނެވެ. އެހެންކަމުން ޔާމީންގެ ލޯޔަރުންގެ ޓީމަށް ވަނީ މާފުއްޓަށް އެރޭ ގޮތް ނުވެ އެމަނިކުފާނާއި ބައްދަލު ނުވެފައެވެ.
