ކޮވިޑްގެ ފަރުވާ އަށް ބާކީ ހުރީ 38 އިންސައްތަ އެނދު

މާލެ ސަރަހައްދުގައި ކޮވިޑް-19 އަށް ފަރުވާ ދިނުމަށް ހާއްސަ ކޮށްފައިވާ އެނދުތަކުގެ ތެރެއިން މިހާރު ބާކީ ހުރީ 38 އިންސައްތަ އެނދު ކަމަށް ހެލްތު އެމަޖެންސީ އޮޕަރޭޝަން ސެންޓަރ ގެ ތަރުޖަމާން ޑޮކްޓަރު ނަޒްލާ ރަފީގު ވިދާޅުވެއްޖެއެވެ.

މިކަން ހާމަކޮށް ނަޒްލާ ކުރެއްވި ޓުވީޓެއްގައި ވިދާޅުވީ، މިވަގުތު މާލެ ސަރަހައްދުން ކޮވިޑް-19 އަށް ފަރުވާދެމުންދާ މީހުންގެ ތެރެއިން އެޑްމިޓްކޮށްގެން ފަރުވާ ދިނުމަށް ހާއްސަ ކޮށްފައިވާ އެނދުތަކުގެ 62 އިންސައްތަ އެނދު މިހާރު ބޭނުން ކުރަމުންދާ ކަމަށެވެ. އެގޮތުން، ބަލި ފެތުރުން ކޮންޓްރޯލްކޮށް، އެންމެންގެ ސަލާމަތާއި ރައްކާތެރި ކަމަށް އެކުގައި މަސައްކަތް ކުރަން ޖެހޭ ކަމަށް ޑރ. ނަޒްލާ ވިދާޅުވިއެވެ.

މިވަގުތު ރާއްޖެ އިން ކޮވިޑް-19 އަށް ފަރުވާ ހޯދަމުންދާ މީހުންގެ ތެރެއިން 169 މީހުންނަށް ފަރުވާދެމުން ދަނީ އެޑްމިޓް ކޮށްގެންނެވެ. އޭގެތެރެއިން 10 މީހަކަށް އައިސީޔޫ ގައި ފަރުވާދެމުންދާ އިރު، ފަސް މީހަކަށް ފަރުވާދެމުން ދަނީ ވެންޓިލޭޓަރުގައެވެ. މާލެ ސަރަހައްދުގައި ކޮވިޑް-19 އަށް ފަރުވާދިނުމަށް ހާއްސަ ކޮށްފައިވާ ހުޅުމާލެ މެޑިކަލް ފެސިލިޓީގެ ބެޑް ކެޕޭސިޓީ އަކީ 250 އެވެ. އަދި ޑީއެޗް-11 ގައި ކޮވިޑް-19 އަށް ފަރުވާ ދިނުމަށް 10 އެނދު ހާއްސަ ކޮށްފައިވާ އިރު، ޑީއެޗް-16ގައި 06 އެނދު ހުރެއެވެ.

އަތޮޅުތެރެއިން ކޮވިޑް-19 އަށް ޕޮޒިޓިވްވާ މީހުންނަށް ފަރުވާ ދިނުމަށް ގާއިމް ކޮށްފައިވާ ފެސިލިޓީތަކުގެ ކެޕޭސިޓީއަށް ބަލާއިރު، ހއ. އިހަވަންދޫ ޓްރާންސިޓް ފެސިލިޓީގައި ތިން އައިސީޔޫ އެނދު ހުރެއެވެ. ށ. ފުނަދޫ ކޮވިޑް ފެސިލިޓީ ގައި 20 އައިސީޔޫ އެނދާއި 37 އައިސޮލޭޝަން އެނދު ހުރި އިރު، ބ. އޭދަފުށި ކޮވިޑް މެނޭޖްމެންޓް ފެސިލިޓީ ގައި 20 އައިސީޔޫ އެނދާއި 25 އައިސޮލޭޝަން އެނދު ހުރެއެވެ.

މީގެ އިތުރުން، ލ. ގަމުގައި ގާއިމުކުރި ފެސިލިޓީގައި ހުރީ 15 އައިސީޔޫ އެނދު އަދި 13 އައިސޮލޭޝަން އެނދެވެ. ގއ. ވިލިނގިލީ ކޮވިޑް ފެސިލިޓީގައި 18 އައިސީޔޫ އެނދާއި ފަސް އައިސޮލޭޝަން އެނދު ހުރިއިރު، އައްޑޫގައި 23 އައިސީޔޫ ބެޑް އާއި 20 އައިސޮލޭޝަން އެނދު ހުރެއެވެ.

ފުވައްމުލައް ސިޓީ ގައި ވެސް ޓްރާންސިޓް ކަރަންޓީން ފެސިލިޓީއެއް ހުރެއެވެ.