ކޮވިޑް-19 އިން ރައްކާތެރިވުމުގެ ގޮތުން އާންމު ޚިދުމަތްދޭ ތަންތަނުގައި އަމަލުކުރަންޖެހޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ މިންގަނޑުތަކާއި ހިލާފަށް ހިދުމަތްދޭ ތަންތަނާއި މެދު އަޅާ ފިޔަވަޅުތައް ހަރުކަށި ކުރަން ނިންމައިިފިއެވެ.
ކޮވިޑް-19 އާ ގުޅިގެން އާއްމު ޚިދުމަތްދޭ ތަންތަނުގައި ރައްކާތެރިކަމާއެކު ޚިދުމަތް ދިނުމުގެ އިންތިޒާމް ހަމަޖައްސާފައިނުވާ ތަންތަނާމެދު ފިޔަވަޅު އަޅާނެ އުޞޫލު އެޗްޕީއޭ އިން ވަނީ އާންމުކޮށްފައެވެ.
މި އުސޫލުގައިވާ ގޮތުން އުޞޫލާއި ޚިލާފަށް ތަނުގައި ޚިދުމަތްދޭނަމަ ފުރަތަމަ ފަހަރަށް ނަމަ 48 ގަޑިއިރަށް ތަން ބަންދު ކުރެވޭނެއެވެ. އެއަށްފަހު ދެން ހުޅުވޭނީ 48 ގަޑިއިރު ހަމަވުމުންނެވެ. އަދި ދެވަނަ ފަހަރު ނަމަ ތަން ބަންދުކުރުމުގެ އިތުރަށް އެއްހާސް ރުފިޔާއިން ޖޫރިމަނާ ކުރުމާއެކު އެތަން އަލުން ހުޅުވުމުގެ ހުއްދަ ދެވޭނީ ތިން ދުވަހުގެ ތެރޭގައި ކަމަށް އެޗްޕީއޭ އިން ބުނެއެވެ.
ތަކުރާރުކޮށް އުޞޫލުތަކާ ޚިލާފުވާ ތަންތަން ބަންދު ކުރުމަށްފަހު އެއްހާސް ރުފިޔާއިން ޖޫރިމަނާ ކުރަމުން ގެންދާނެ ކަމަށާއި އަދި އަލުން ހުޅުވުމުގެ ހުއްދަ ދެވޭނީ ފަސް ދުވަހުގެ ތެރޭގައި ކަމަށް ވެސް އެޗްޕީއޭ އިން ބުންޏެވެ.
އެޗްޕީއޭ އިން އެކުލަވާލާފައިވާ މިންގަނޑުތަކާއި އެއްގޮތަށް ތަންތަން ހުރިތޯ ބެލުމަށް ޚާއްސަ އިންސްޕެކްޝަން އޮގަސްޓް މަހުގެ 25 ވަނަ ދުވަހު ފަށާނެ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ވަނީ ބުނެފިއެވެ.
އިންސްޕެކްޝަން ކުރިއަށް ގެންދަނީ އެޗްޕީއޭ އާއި މާލެ ސިޓީ ކައުންސިލް އަދި އިކޮނޮމިކް މިނިސްޓްރީގެ އިތުރުން މޯލްޑިވްސް ރެޑް ކްރެސެންޓް އަދި އެނޫންވެސް ގިނަ ފަރާތްތަކެއް ގުޅިގެންނެވެ.
އެޗްޕީއޭގެ ފުރަތަމަ އިންސްޕެކްޝަން ކުރިޔަށް ގެންގޮސްފައިވަނީ ޖުލައި މަހުގެ 12 ވަނަ ދުވަހުއެވެ. އެ އިންސްޕެކްޝަން ގައި 190 ތަނެއް އިންސްޕެކްޓްކޮށް އެ ތަނުން ބައެެއް ތަންތަނަށް ގައިޑްލައިންއާ އެއްގޮތަށް ކުރިއަށް ގެންދިޔުމަށް އެންގިއެވެ. ދެވަނަ އިންސްޕެކްޝަން ކުރިޔަށް ގެންގޮސްފައިވަނީ ޖުލައި 29ން އޮގަސްޓު 8 ވަނަ ދުވަހުގެ ނިޔަލަށެވެ. އެ އިންސްޕެކްޝަންގެ ތެރެއިން މިންގަނޑުތަކަށް ނުފެތޭ 258 ތަނެއް ބަންދު ކުރެވުނު ކަމަށް އެ އެޖެންސީން ބުނެފައިވެއެވެ.
