މެންޗެސްޓާ ޔުނައިޓެޑްގެ ކެޕްޓަން ހެރީ މެގުއާ އަނބުރާ އިންގްލެންޑަށް ދިޔުމުގެ ހުއްދަ ކޯޓުން ދީފިއެވެ.

ގްރީސްގެ ޖަޒީރާ ރަށެއް ކަމަށްވާ މައިކޯނޯސްގައި ޗުއްޓީ ހޭދަކުރަމުން އައި މެގުއާ ފުލުހުން ހައްޔަރުކުރީ ހުކުރު ދުވަހުގެ ވަގުތެއްގައެވެ. ގްރީސްގެ ފުލުހުން ހުކުރު ދުވަހު ނެރުނު ބަޔާނެއްގައި ފުލުހުންނާ މާރާމާރީ ހިންގުމާ ގުޅިގެން ތިން ފަތުރުވެރިއަކު މައިކޯނޯސް ޕޮލިސް ސްޓޭޝަނަށް ގެންގޮސްފައިވާ ކަމަށެވެ. އެ ތިން ފިރިހެނުން ޕޮލިސް ސްޓޭޝަނަށް ގެންދިޔައީ ދެބަސްވުމެއް ހިނގުމުން އެ ސަރަހައްދަށް ދިޔަ ފުލުހުންނަށް އެ މީހުން ހުތުރު އެއްޗިސް ކިޔާ އެތަނުން ފުލުހަކު ކޮއްޕާލުމާ ގުޅިގެންނެވެ. އަދި ޕޮލިސް ސްޓޭޝަން ތެރެއިން ހައްޔަރުކުރަން އުޅުމުން އެކަމަށް ދެކޮޅު ހަދައި، ފަހުން އެތަނުން އެކަކު ފުލުހުންނަށް ރިޝްވަތު ދޭން މަސައްކަތްކުރި ކަމަށްވެސް ގްރީސްގެ ފުލުހުން ނެރުނު ބަޔާނުގައި ވަނީ ބުނެފައެވެ.

ހުކުރު ދުވަހު ގްރީސްގެ ފުލުހުން ހައްޔަރުކޮށްފައިވަނީ އުމުރުން 27، 28 އަދި 29 އަހަރުގެ ތިން ފިރިހެނުންނެވެ. މީގެ ތެރެއިން އުމުރުން 27 އަހަރުގެ ފިރިހެނަކީ ޔުނައިޓެޑްގެ ކެޕްޓަން މެގުއާއެވެ. އަދި އަނެއް ދެ މީހުންނަކީ މެގުއާގެ ބޭބެ އާއި ރައްޓެއްސެއް ކަމަށް ރިޕޯޓުތައް ބުނެއެވެ.

މި މައްސަލައާ ގުޅިގެން ހޮނިހިރު ދުވަހުގެ ވަގުތެއްގައި މެގުއާ ކޯޓަށް ހާޒިރުކުރުމުން، އޭނާ ވަނީ ހައްޔަރުން ދޫކޮށްލާފައެވެ. އަދި އަނބުރާ އިންގްލެންޑަށް ދިޔުމުގެ ހުއްދަވެސް ވަނީ ދީފައެވެ. އެކަމަކު ކޯޓުން މައްސަލަ އަދިވެސް ބަލަމުންދާއިރު، މި މަހުގެ 25 ވަނަ ދުވަހު އޮންނަ ޝަރީއަތަށް މެގުއާގެ ވަކީލުން ހާޒިރުވާން ޖެހޭނެ ކަމަށް ވަނީ އަންގާފައެވެ.

މި މައްސަލައާ ގުޅިގެން ޔުނައިޓެޑުން މީގެ ކުރިން ނެރުނު ބަޔާނެއްގައި ވަނީ އެފަދަ ކަމެއް ހިނގައިގެން އުޅޭކަން އެނގޭ ކަމަށާއި، އެ މައްސަލައިގެ ތަހުގީގުގައި މެގުއާ ފުލުހުންނަށް އެއްބާރުލުން ދެމުން އަންނަ ކަމަށް ބުނެފައެވެ.

ޔުއެފާ ޔޫރޮޕާ ލީގުގެ ސެމީފައިނަލްގައި ސެވިއްޔާ އަތުން ޔުނައިޓެޑް ކެޓުމާއެކު، މެގުއާ އައީ އޭނާގެ އާއިލާއާއެކު ގްރީސްގައި ޗުއްޓީ ހޭދަކުރަމުންނެވެ. ދެ ހަފުތާގެ ޗުއްޓީއަކަށް މެގުއާ ގްރީސްއަށް ދިޔައިރު، އަންނަ ސީޒަނުގެ އިނގިރޭސި ޕްރިމިއާ ލީގު އަންނަ ސެޕްޓެމްބަރު މަހުގެ 12 ވަނަ ދުވަހު ފެށުމަށް ވަނީ ނިންމާފައެވެ.