އަނބުރާ މެންޗެސްޓާ ޔުނައިޓެޑަށް އައުމުގެ ދޮރު އެޓީމަށް ކުޅެމުން އައި ޒްލަޓަން އިބްރާހިމޮވިޗް އަށް ވަނީ ހުޅުވާލެވިފައިކަމަށް އެ ކްލަބުގެ ކޯޗު ހޯޒޭ މޮރީނިއޯ ބުނެފިއެވެ.

ނޫސްވެރިންނަށް މައުލޫމާތު ދެމުން މޮރީނިއޯ ބުނީ ޔުނައިޓެޑަށް އަލުން އަނބުރާ އައުމުގެ ފުރުސަތު އިބްރާހިމޮވިޗް އަށް އެބައޮތް ކަމަށާއި، އެ ނިންމުން ނިންމާނީ އިބްރާހިމޮވިޗް ކަމަށެވެ.

މޮރީނިއޯ ބުނީ ޑިސެމްބަރުގެ ކުރިން އިބްރާހިމޮވިޗް އަށް އަނިޔާއިން ސަލާމަތްވެ އެއްކޮށް ފިޓުވެގެން ކުޅުމުގެ ތެރެއަށް ނާދެވޭނެ ކަމަށާއި، އެގޮތުން އުންމީދަކީ ޑިސެމްބަރު ހިސާބުގައި އޭނާ އަލުން އަނބުރާ ޓީމާ ގުޅުން ކަމަށެވެ.

އިބްރާހިމޮވިޗް ހޯދަން ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި އެމެރިކާ، ޗައިނާ، ސްޕެއިން އަދި ޖަރުމަންގެ ކްލަބްތައްވެސް ހިމެނެއެވެ.

އިބްރާހިމޮވިޗްގެ ލިގަމެންޓަށް މިދިޔަ އެޕްރީލްމަހު ލިބުނު އަނިޔާއަށް އޭނާ ފަރުވާ ހޯދަމުންދާއިރު، އެ އަނިޔާއިން އަރައިގަންނަންވެސް އޭނާ އަންނަނީ މަސައްކަތްކުރަމުންނެވެ. އެގޮތުން ރިޕޯޓްތައް ބުނާގޮތުން އިބްރާހިމޮވިޗް ޓްރާންސްފާގެ ކަންތައް ނިންމާނީ އަނިޔާއިން އަރައިގަނެވުމުންނެވެ.

އިބްރާހިމޮވިޗްއާ ބެހޭގޮތުން މީގެ ކުރިން އޭނާގެ އޭޖެންޓް މީނޯ ރިއޯލާ ބުނީ އިބްރާހިމޮވިޗްގެ ބޭނުން ޔުނައިޓެޑަށް ނުހިފޭނަމަ ދެން އޭނާ ބަދަލުވާނީ އަނެއްކާވެސް ޕްރިމިއާ ލިގުގެ ކްލަބަކަށް ކަމަށެވެ.

ފާއިތުވި ސީޒަނުގައި ފްރާންސްގެ ޕީއެސްޖީއަށް ކުޅުމަށްފަހު މިސީޒަނުގައި ޔުނައިޓެޑާއި ގުޅި އޭނާ ވަނީ އެޓީމަށް 46 މެޗު ކުޅެދީ 28 ލަނޑު ކާމިޔާބުކޮށްދީފައެވެ.