ޕީއެސްޖީއަށް ބަދަލުވާން ބާސާއިން ނޭމާ އަށް ހުއްދަދީފި

ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވާން ބްރެޒިލްގެ ކެޕްޓަން ނޭމާ އަށް ބާސެލޯނާ އިން ހުއްދަ ދީފިއެވެ.

އުމުރުން 25 އަހަރުގެ ނޭމާ ތަމްރީންތަކަށް ނުނިކުމެ ޓްރާންސްފާއާ މެދު ގޮތެއް ނިންމުމަށް ބާސާގެ ކޯޗު އެރްނިސްޓޯ ވަލްވާޑޭ ފުރުސަތު ދީފައިވާ ކަމަށް ރިޕޯޓްތައް ބުނެއެވެ.

ރިޕޯޓްތައް ބުނާގޮތުން މި ހަފްތާތެރޭގައި ޕީއެސްޖީއާއެކު ނޭމާ މެޑިކަލް ހަދާއިރު، އެނާ އެ ކްލަބަށް ބަދަލުވާނީ ވޯލްޑް ރެކޯޑް ފީއެއްގެ ދަށުން 222 މިލިއަން ޔޫރޯއަށް ކަމަށްވެސް ރިޕޯޓްތައް ބުނެއެވެ.

މީގެއިތުރުން ރިޕޯޓްތައް ބުނާގޮތުން ނޭމާ ރިޕްލޭސް ކުރުމަށް ބާސާ އިން އަންނަނީ އާސެނަލްގެ މެސުތް އޮޒިލް ހޯދުމަށް މަސައްކަތްކުރަމުންނެވެ. އެހެންނަމަވެސް މިކަމާ ގުޅިގެން އެއްވެސް ރަސްމީ ބަހެއް އަދި ނުލިބެއެވެ.

ބްރެޒިލްގެ ސަންޓޯސްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާ އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 77 މެޗުގައި 52 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތް އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބުކޮށްފައެވެ.