ޑީއެޗްގައި ފަރުވާ ހޯދަމުންދާ ދެ ބަލިމީހަކާއި ގުޅޭގޮތުން ދައްކަމުންދާ ވާހަކަތައް ދޮގުކޮށްފި

ދަރުމަވަންތަ ހޮސްޕިޓަލުގެ 18 ވަނަ ފަންގިފިލާގައި ފަރުވާ ދެމުންދާ 2 ޕޭޝަންޓަކާއި ގުޅޭގޮތުން ދައްކަމުންދާ ވާހަކަތައް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ދޮގުކޮށްފިއެވެ.

ހުކުރު ދުވަހު އައިޖީއެމްއެޗުން ނެރެފައިވާ ބަޔާނެއްގައި ވަނީ ދަރުމަވަންތަ ހޮސްޕިޓަލުގެ 18 ވަނަ ފަންގިފިލާގައި ފަރުވާ ދެމުންދާ 2 ޕޭޝަންޓަކާއި މެދު "ދިވެހި ޗެނަލް" އިން ބުރާސްފަތި ދުވަހުގެ ރޭގެ ވަގުތެއްގައި ގެނެސްދީފައިވާ ޚަބަރަކީ ކަމުގެ ޙަޤީޤަތް އޮޅުވާލައި، ކަނޑައެޅިގެން ދޮގު މަޢުލޫމާތު ހިމެނޭ ގޮތަށް ފަތުރަމުންދާ ޚަބަރެއް ކަމަށެވެ.

Advertisement

އެ ހޮސްޕިޓަލުގައި އެކި ބަލިބައްޔަށް ފަރުވާ ދެމުންދާ ޕޭޝަންޓުގެ ތެރެއިން މި 2 ޕޭޝަންޓުންނަކީ 1 މެއި 2020 ގައި، ކޮވިޑް-19 ގެއޭރުގެ ހާލަތާއި ގުޅިގެން ޓްރީޓޮޕް ހޮސްޕިޓަލަކީ ކޮވިޑް- 19 އަށް ޚާއްޞަ ހޮސްޕިޓަލުގެ ގޮތުގައި ހަމަޖެހުމާއި ގުޅިގެން އެ ހޮސްޕިޓަލަށް ބަދަލުކޮށްފައިވާ އަދި ހޮސްޕިޓަލުގައި ކަނޑައެޅިފައިވާ ނިޒާމުގެ ތެރެއިން ރަޖިސްޓަރީކޮށް، އެނދުމަތިކޮށް، އުޞޫލުތަކާއި އެއްގޮތަށް ފަރުވާ ދެމުންދާ ޕޭޝަންޓުން ކަމަށް ބަޔާނުގައި ވެއެވެ.

އަދި މި ޕޭޝަންޓުންނަކީ އާސަންދައިން ކަވަރ ނުކުރާ ޕްރައިވެޓް ރޫމް ޗާޖް ފަދަ ޚަރަދުތައް ވެސް، ކަނޑައެޅިފައިވާ ޤަވާއިދާއި އެއްގޮތަށް ބަރާބަރަށް ދައްކަމުން އަންނަ ފަރާތްތަކެއްކަން ވަނީ ފާހަގަކޮށްފައެވެ.

އައިޖީއެމްއެޗުން ބުނީ މި ޕޭޝަންޓުންނަކީ އެ ހޮސްޕިޓަލުގެ ސީ.އީ.އޯ އިބްރާހީމް ސަލީމްގެ އާއިލީ ބޭފުޅުންކަމުގައި ޚަބަރުގައި ރިޕޯޓްކޮށްފައިވާއިރު އެއީވެސް ކަނޑައެޅިގެން ދޮގު މަޢުލޫމާތެއް ކަމަށާއި ހޮސްޕިޓަލުގެ ސީ.އީ.އޯ އާއި އެ ޕޭޝަންޓުންނާއި އާއިލީ އެއްވެސް ގުޅުމެއް ނެތް ކަމަށެވެ.

ހޮސްޕިޓަލުގެ އިސްވެރިންނާއި ޑޮކްޓަރުން އަދި ޕޭޝަންޓުން ވެސް ބަދުނާމުވާ ގޮތަށް ކަމުގެ ޙަޤީޤަތް އެއްވެސް މިންވަރަކަށް ސާފުކުރުމެއް ނެތި، އަދި ކޮވިޑް19 ގެ ބަލިމަޑުކަމާއި ގުޅިގެން އެންމެހައި ރައްޔިތުންގެ ހިތުގައި އިންތިހާއަށް ނުތަނަވަސްކަން އުފެދިފައިވާ މި ދަނޑިވަޅުގައި، މިފަދަ ދޮގު ވާހަކަތައް ފެތުރުން އެންމެ ހަރުކަށި އިބާރާތުން ކުށްވެރިކޮށް، ޒިންމާދާރު ކަމާއެކު މަޢުލޫމާތު ފެތުރުމަށް އެ ހޮސްޕިޓަލުން ވަނީ އިލްތިމާސް ކޮށްފައެވެ.