ގިނަ އަހަރުތަކެއް ވަންދެން މެސީއާއެކު މަސައްކަތްކުރަން ބޭނުން: ކޫމަން

ގިނަ އަހަރުތަކެއް ވަންދެން ބާސެލޯނާގެ ކެޕްޓަން ލިއޮނެލް މެސީއާއެކު މަސައްކަތް ކުރަން ބޭނުންވާ ކަމަށް އެ ކުލަބުގެ ކޯޗުގެ މަގާމާ ބުދަ ދުވަހު ހަވާލުވި ނެދަލެންޑްސްގެ ރޮނާލްޑް ކޫމަން ބުނެފިއެވެ.

މީގެ ކުރިން ބާސާއަށް 1989-1995 ށް ކުޅެ، އެ ޓީމާއެކު ޔުއެފާ ޗެމްޕިއަންސް ލީގު ކާމިޔާބުކޮށްފައިވާ ކޫމަން ބާސާއާ ހަވާލުވީ ދެ އަހަރުގެ އެއްބަސްވުމެއްގެ ދަށުންނެވެ. ކޫމަން ބާސާއާ ހަވާލުވިއިރު، އެޓީމު އޮތީ ވަރަށް ބޮޑަށް އަޑިއަޅާލާފައެވެ. އެގޮތުން މި ސީޒަން އެ ކުލަބުން ހުސްއަތާ ނިންމާލިއިރު، މިއީ ފާއިތުވި 12 ސީޒަނުގެ ތެރޭގައި ބާސާއިން ތައްޓެއް ނުލިބި ނިންމާލި ފުރަތަމަ ފަހަރެވެ.

ބުދަ ދުވަހު މަގާމާ ހަވާލުވުމަށްފަހު ކޫމަން ބުނީ ބާސާއެކު މެސީ ހަދާފައިވާ އެއްބަސްވުމުގައި ބާކީ އެއް އަހަރު އެބައޮތް ކަމަށެވެ. އަދި މެސީ އަކީ ދުނިޔޭގެ އެންމެ މޮޅު ކުޅުންތެރިޔާ ކަމަށާއި، ކޮންމެ މީހަކުވެސް އެންމެ މޮޅު ކުޅުންތެރިޔާ އަމިއްލަ ޓީމުގައި ބަހައްޓަން ބޭނުންވާނެ ކަމަށެވެ.

އެގޮތުން ބާސާގެ ކުރިމަގާ މެދު މެސީއާ ވާހަކަ ދައްކާނެ ކަމަށާއި، އޭނާގެ އުންމީދަކީ ގިނަ އަހަރުތަކެއް ވަންދެން މެސީއާއެކު މަސައްކަތްކުރުން ކަމަށްވެސް ވަނީ ބުނެފައެވެ.

ކޫމަން މިހެން ބުނިއިރު، މީގެ ކުރިން މީޑިއާތަކުން ވަނީ މި ސީޒަން ނިމުމާއެކު ބާސާ ދޫކޮށްލަން މެސީ ބޭނުންވާ ކަމަށް ރިޕޯޓުކޮށްފައެވެ. އެކަމަކު ބާސާގެ ރައީސް ޖޯސެފް މާރިއާ ބާޓޮމެއޫ ވަނީ މެސީ ބާސާ ދޫކޮށް ނުދާނެ ކަމަށް ވިދާޅުވެފައެވެ. އަންނަ އަހަރު މެސީގެ އެއްބަސްވުން ހަމަވާއިރު، އޭނާގެ އެއްބަސްވުން އިތުރު ދެ އަހަރަށް އާކުރަން ބާސާއިން މިހާރު މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ.

ކިކޭ ސެޓިއެން ވަކިކޮށް ކޫމަންއާ ބާސާ ހަވާލުކުރިއިރު، މިފަހަރުގެ ޔުއެފާ ޗެމްޕިއަންސް ލީގުން އެޓީމު ވަނީ ލަދުވެތިގޮތަކަށް ކަޓާފައެވެ. އެގޮތުން ކުއާޓަގައި ބާސާ ބަލިވީ ބަޔާން މިއުނިކް އަތުން 8-2 ންނެވެ. މިއީ ޔޫރަޕްގެ މުބާރާތެއްގައި މިހާ ތަފާތު ބޮޑުކޮށް ބާސާ ބަލިވި ފުރަތަމަ ފަހަރެވެ. އަދި މިއީ ފާއިތުވި 74 އަހަރު ތެރޭ އެއް މެޗެއްގައި ބާސާ ކޮޅަށް 8 ލަނޑު ވަން ފުރަތަމަ ފަހަރެވެ.