އާސެނަލް އަށް ގިނަވެގެން ގެނެވޭނީ ތިން ކުޅުންތެރިން: ވެންގާ
އާސެނަލް އަށް މިފަހަރު ލީގުގެ ފަސްވަނަ ލިބުނުއިރު، އެފްއޭކަޕް ކާމިޔާބުކުރި
އާސެނަލްގެ ކޯޗު އާސެން ވެންގާ
ކުރިޔަށް އޮތް ސީޒަނަށް އާސެނަލް އަށް ގިނަވެގެން ގެނެވޭނީ ތިން ކުޅުންތެރިން ކަމަށް އެ ކްލަބުގެ ކޯޗު އާސެން ވެންގާ ބުނެފި އެވެ.
ބެއިން ސްޕޯޓްސް އަށް ދިން އިންޓަވިއުއެއްގައި ވެންގާ ބުނީ އެހެން ކްލަބްތަކުން ހަރަދުކުރާވަރަށް މިފަހަރު އާސެނަލްއަށް ހަރަދުނުކުރެވޭނެ ކަމަށާއި، އެނެމެ ގިނަވެގެންވެސް ގެނެވޭނީ ތިން ކުޅުންތެރިން ކަމަށެވެ.
ވެންގާ ބުނީ ބޮޑު އަގެއް ދީފައި ގެންނަ ކުޅުންތެރިންނަށްވުރެ ބައެއް ފަހަރު ކުޑަ އަގުގައި ގެންނަ ކުޅުންތެރިން ތަފާތު ދައްކާ ކަމަށެވެ. އެގޮތުން ވެންގާ ބުނީ ކްލަބުން ހަރަދު ކުރަނީ ކިހާ ފައިސާއެއްތޯ ބެލުން މުހިންމު ނޫން ކަމަށާއި، މުހިންމީ ކްލަބް ރަނގަޅަށް މެނޭޖް ކުރެވޭތޯ ބެލުން ކަމަށެވެ.
އާސެނަލް އިން އެ ކްލަބުގެ ކޯޗުކަމުގައި އިތުރު ދެއަހަރު ދުވަސް އާސެން ވެންގާ ބެހެއްޓުމަށް ނިންމާފައިވާއިރު، އެޓީމުގެ އެންމެ މުހިންމު ދެ ކުޅުންތެރިން މެސުތް އޮޒިލް އަދި އެލެކްސަސް ސަންޗޭޒްވެސް ބެހެއްޓުމަށް ކްލަބުން ދަނީ މަސައްކަތްކުރަމުންނެވެ.
މީގެއިތުރުން އެޓީމުން އަންނަނީ ޓްރާންސްފާ ބާޒާރުގައި ކުޅުންތެރިން ހޯދުމުގެ މަސައްކަތްވެސް ކުރަމުންނެވެ. އެގޮތުން ރެއާލް މެޑްރިޑްގެ ފޯވާޑް އަލްވަރޯ މޮރާޓާ އަދި މޮނާކޯގެ ކައިލިއަން އެމްފާބޭވެސް ހޯދުމަށް އެ ކްލަބުން އަންނަނީ މަސައްކަތްކުރަމުންނެވެ.
މިދިޔަ ސީޒަނުގައި އާސެނަލް އަށް ޕްރިމިއާ ލީގުގައި ރަނގަޅު ކާމިޔާބެއް ލިބިފައިނުވި ނަމަވެސް ޕްރިމިއާ ލީގުގެ ޗެމްޕިއަން ޗެލްސީ ބަލިކޮށް އެޓީމު ވަނީ އެފްއޭކަޕް އުފުލާލާފައެވެ. އާސެނަލް އަށް ލީގުގެ ފަސް ވަނަ ލިބިފައިވާއިރު، ކުރިޔަށް އޮތް ސީޒަނުގައި އެޓީމަށް ޗެމްޕިއަންސް ލީގުން ފުރުސަތު ގެއްލޭނެއެވެ.
